MALAKI 3
3
1Omonene bw’Emeganda nigo agoteba iga: “Rora, nintome omotomwa one andoiserie enchera, na Omonene oyio mokorigia nache mobosokano ase Hekalu yaye; nere omotomwa bw’okobwatana kw’ogotianania oyio moganetie. Ee, ngocha are.”
2Korende ning’o oranyare gotenena koremereria rituko ri’Omonene, na ning’o oranyare gotenena ase ogwekengera ekero akooroka? Ere nigo anga buna omorero bw’omoturi ebioma, na buna esabuni y’omosibia chianga. 3Ere naikaranse buna oyo ogosamba na gosibia chifeta. Ere nachene Abalawi, abasibie buna chitahabu ne chifeta chigosibigwa, erinde banyare korua ebing’wanso bi’oboronge ase Omonene. 4Erio ebing’wanso bi’Abayuda, na ebi’abanto ba Yerusalemu, bigokie Omonene, buna ase amatuko aria a kare, na ase emiaka ya kare.
5Omonene bw’Emeganda nigo agoteba iga: “Nimbaike ang’e ase okonacha ekina. Nimbe kirori omwango igoro y’abarogi na abatomani, na abagotiana oborimo, na abagokorera abarikwa emeremo bobe ase okobarina ching’eria chiabo, na abagokorera ababoraka ne chintakana bobe, na abakoonchorana oboronge bw’abamenyi, korende tibanyirogeti.
Ogoakana ensemo ya ikomi
6“Inche Omonene tindi koonchoka, na ase engencho eyio, inwe ab’ororeria rwa Yakobo timwasiretigwe. 7Korwa ase amatuko e chisokoro chiaino inwe mwagoberete mogatiga emeroberio yane echikire, timwayebwatete. Bono inche Omonene bw’Emeganda nigo ngoteba iga: Ing’iranera, nainche nimbairanere. Korende inwe nigo mokoboria: Tokoiranere ase inchera ki? 8Inee! Omonto nanyare konyibera inche Nyasae ebiane? Korende inwe mwanyibeire ebiane. Inwe nigo mokoboria: Ninki twakoibeire? Mwanyibeire ensemo ya ikomi na okoruegwa konde. 9Mwaragererigwe nokoragererigwa, ekiagera inwe egesaku eke gionsi mwanyibeire ebiane. 10Inwe renta ensemo ya ikomi eng’ikeranu ase ekungo y’enyomba yane, erinde endagera ebe ase enyomba yane. Ase enchera eyio inwe monteeme gose tinkobaigorera ebibao bia igoro mbaumorere ogosesenigwa okonge mono gotari korengeka. Nabo inche Omonene bw’Emeganda ngoteba. 11Nintogonyere ebigosaria okwama kwe riroba riaino, tibigosaria, gose amasabibu aino takoaroroka kare amarere. Nabo inche Omonene bw’Emeganda ngoteba. 12Erio abanto b’ebisaku bionsi inababaroke abasesenirie, ekiagera ense yaino nebe y’okogokia. Nabo inche Omonene bw’Emeganda ngoteba.”
Eira ya Nyasae y’amabera
13Omonene nigo agoteba iga: “Inwe mwakwanire amang’ana amakong’u igoro yane. Korende nigo mokoboria: Mang’ana ki amakong’u twakwanire igoro yao? 14Inwe mwatebire: Okomokorera Nyasae, ayio namang’ana a bosa. Mbuya ki twanyorire ase okobwata amachiko aye, gose ase ogotaara ase obosio bw’Omonene bw’Emeganda tore nomoichano? 15Bono nigo tokoroka abwo bare abaenenu ng’a mbasesenirie. Abakori amabe nabwo bagendererete konyora amaya; tari ayio oka, korende nonya nekero bagoteema Nyasae nigo bagokonywa.”
16Erio abanto abwo bamoirogete Omonene bakaba bagokwana barabwo ase barabwo; Omonene agategerera, akaigwa amang’ana abo, na ebuku y’ekeinyorio ekarikwa ase obosio bwaye ase okoinyora abwo bamoirogete na barengereretie igoro y’erieta riaye. 17Omonene bw’Emeganda nigo agoteba iga: “Abanto aba mbabe abanto baane bori ase rituko erio ndakore ring’ana, nimbarorere amabera buna omonto akorora amabera ase omwana oye okomokorera. 18Erio imorore ogwatananeka ase egati y’omonyaboronge na omokori amabe, na ase egati y’oyogonkorera inche Nyasae na oria otari gonkorera.”
Currently Selected:
MALAKI 3: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
