LUKA 7

Omosomba bw’omotang’ani bw’abarwani rigana okogwenigwa

(Mat 8:5–13)

1Agachia gokoora amang’ana aye onsi ekero abanto bamoigwete, agasoa Kapernaumu. 2Omosomba oyomo bw’omotang’ani bw’abarwani rigana konya onyarekire ang’e nogokwa; ere nomonto anchete mono. 3Agachia koigwa amang’ana igoro ya Yeso, agatoma asare abagaaka b’Abayahudi komoboria ache agwenie omosomba oye. 4Na barabwo bagachia goika ase Yeso, bakamosorora, bakabora, “Nagwenerete omokorere ring’ana eri, 5ekiagera nanchete egesaku giaito, naende natoagacherete esinagogi yaito.”

6Yeso akagenda amo nabarabwo. Goika agachia koba tari are ase enyomba yaye, oria omotang’ani bw’abarwani agatoma abasani asare, okomotebia, “Omonene, tibwerosia, ekiagera inche tinyisaini aye orasoe inse y’ekerama kiane. 7Ase ayio nigo neroche ng’a tinyisaini gocha asore; korende kwana ring’ana rioka, na omosomba one nagwene. 8Naki inche nomonto mbekire inse ase okobua, naende ninde nabarwani inse yane. Kondatebie oyo: Genda, ogenda, na oyonde: Inchuo, ocha; na omosomba one: Kora iga, okora.”

9Yeso agachia koigwa aya, agakumia asare, akeonchorera omoganda orenge komotunyana, akabora, “Nabatebirie: Nonya nase Abaisraeli tindanyora okwegena okore buna oko.”

10Nabo baria batometwe bagachia koirana nyomba mwaye, bakanyora omosomba oria otimokire.

Okobokigwa kw’omwana omomura bw’omoboraka ase Naini

11Nyuma ase aya akagenda omochie okorokwa Naini; aborokigwa baye bakagenda amo nere, na abanto abange. 12Nabo, agachia goika ang’e ase egeita ki’omochie, rora, agwo nkiarengeo egetondo kebogoirie gocha isiko, omwana omomoima ase ng’ina, na ng’ina nomoboraka orenge, na abanto abange b’omochie mbarenge amo nere. 13Na ekero Omonene achia komorora akamororera amabera, akamotebia, “Torera!”

14Akagenda ang’e, agakuna ekige; ababogoria ekige bagatenena. Erio agakwana, “Omomura, nagotebirie, imoka!” 15Omonto oria egetondo akaboka, agaikaransa, agachaka gokwana. Yeso akamomoa ng’ina. 16Omoondoko okabwata bonsi, bagatogia, Nyasae, bakabora, “Omobani omonene oorokire ase egati yaito!” Na “Nyasae ocheire abanto baye!” 17Chinkuma chiaye chigasarera ase ense yonsi ya Boyahudi, na ense yonsi yaetanaine.

Yohana Omobatisi

(Mat 11:2–19)

18Aborokigwa ba Yohana bakamotebia aya onsi. 19Yohana akarangeria babere ase aborokigwa baye, akabatoma ase Omonene komoboria, “Aye naye oria ogocha, gose toganye omoao?” 20Ekero abanto abwo baikire asare, bakamotebia, “Yohana Omobatisi ototomire asore, okobora: Aye naye oria ogocha, gose toganye omoao?”

21Ase engaki eria akagwenia abanto abange abarenge namarwaire, na emechando, na babwatire nebirecha ebibe; na abange abarenge emeuko akabaramokia amaiso abo, bakarora. 22Akabairaneria, akabatebia, “Genda motebie Yohana ayamwarora na ayamwaigwa: Abarenge emeuko nkorora bare, abarenge amagata ngotaara bare, abarenge noborwaire bwa ukoma basibekire, abarenge emetino nkoigwa bare, abare ebitondo nkobokigwa bare, na abataka nkoranderigwa bare amang’ana amaya. 23Nasesenirie onde bwensi otagochiri nainche.”

24Na abatomwa baria ba Yohana bachia kogenda, agachaka gotebia omoganda igoro ya Yohana, “Inki mwachiete korora aria ase erooro? Egetonto gekonyegerigwa nembeo? 25Ninki mwachiete korora? Nomonto oboyirie chianga chinterere? Rigereria, abakweboyia chianga chingiya mono, na koria obwansu bw’omogoko, nigo bare ase chinyomba chi’abaruoti. 26Ninki mwachiete korora? Omobani? Ee, nabatebirie: Oyore omonene kobua omobani, 27ekiagera oyio nere amang’ana aya arikire igoro yaye,”

“Rigereria, inche natomire omotomwa one ase obosio bwao,

oyo oratang’ane koroisia enchera yao.

28Nigo nkobatebia: Ase baria baiboire nabakungu, mobani onde taratoka ore omonene kobua Yohana, korende oyore omoke ase oboruoti bwa Nyasae nomonene komobua.” 29(Abanto bonsi na abarusia ebango bagachia koigwa aya, bakaorokia oboronge bwa Nyasae, ekiagera babatisetwe ase ebatiso ya Yohana; 30korende Abafarisai na abanto b’amachiko bagakana omoroberio o Nyasae asebare abanyene, ekiagera tibabatisetwe na Yohana.)

31Omonene akabora, “Ninki ndagwekanie abanto b’ekegori eke? Barabwo ninki bagwekaine? 32Nigo bagwekaine nabana baikaransete ase echiiro, bakorangerania, bakobora,”

“Twababugeirie ebiroria, na inwe timotengeti;

tweumirie, na inwe timorereti.

33Naki Yohana Omobatisi nigo achete, tare koria omogati, gose tare konywa edivai; na inwe mogoteba: Nabwatire nekerecha. 34Omwana‐o‐mwanyabanto ochire, okoria na konywa, na inwe mogoteba: Rora, nomonto omoribobe, ogotinda edivai, omosani bw’ababangi ebango na abanyene ebibe! 35Korende obong’aini bwa Nyasae bwamanyekanire koba oboronge ase abana baye bonsi.”

Yeso ogoakwa amaguta amagoro, na omoreng’anio bw’abasira babere

36Omonto oyomo bw’Abafarisai akamogania ache koria endagera amo nere. Agasoa ase enyomba y’Omofarisai oria, agaikaransa ase endagera. 37Na rora, omokungu oyomo ase omochie oria, oyorenge omonyene ebibe, agachia konyora amang’ana ng’a oikaransire ase enyomba y’Omofarisai oria, akarenta echuba ye rigena rirabu ere namaguta e rimisu rigiya, 38agatenena korwa nyuma, ang’e namagoro aye, okorera. Agachaka komoiyereria amariga aye ase amagoro aye, na koyatinyia netukia y’omotwe oye, okonyunyunta amagoro aye, na koyaaka amaguta aria. 39Omofarisai, oria omorangeretie, agachia koyarora akeboria ase omoyo oye ime, ogoteba, “Omonto oyo, onye nomobani orenge, anga namomanya oyo ng’a nere ng’o, gose mokungu ki oyo okomokuna, ng’a nomonyene ebibe.”

40Yeso akamotebia, “Simion, ninde ne ring’ana nkogotebia.”

Akabora, “Omworokia, kwana.”

41“Omonto oyomo omorua singo orenge nabasira babere; oyomo omoriete esira ye chidinari amagana atano, na oyo o kabere emerongo etano. 42Barabwo tibarenge na gento bagoakana. Akabaabera bonsi babere. Gaki, ase abwo, ning’o oramwanche kobua?”

43Simion akairaneria, “Igo ndabore ng’a, noria bwaberetwe ebinge.”

Yeso akamotebia, “Kwanachire boronge.” 44Akeonchorera omokungu oria, agatebia Simion, “Kwarorire omokungu oyo? Inasoa mwao, tikwang’a amache ay’ogwesibia amagoro, korende oyo osibirie amagoro aane namariga aye, na koyatinyia netukia y’omotwe oye. 45Tonyunyunteti, korende ere korwa ekero nasoete aa tatigete konyunyunta amagoro aane. 46Tong’ageti omotwe one amaguta, korende ere ong’akire amagoro aane amaguta agotioka buya. 47Ase engencho eyio nagotebirie, obwanchani bwaye bworokirie ng’a ebibe biaye ebinge biabeirwe; ere oyokwaberwa ebike nigo anchete ake.” 48Agatebia omokungu oria, “Kwabeirwe ebibe biao.”

49Na baria baikaransete amo nere bagachaka goteba ase emioyo yabo ime, “Nere ng’o oyo oranyare kwabera ebibe?” 50Agatebia omokungu oria, “Okwegena kwao kwagotooririe; genda nomorembe.”

Currently Selected:

LUKA 7: EKEGUSIIBBLE

Highlight

Copy