LUKA 6

Riborio igoro y’okorenda Esabato

(Mat 12:1–14; Mar 2:23—3:6)

1Rituko ri’Esabato Yeso ngoeta arenge ase emegondo y’engano; aborokigwa baye bakabutora ebigara, bakabibunga namaboko abo, bakabiria. 2Korende abande ase Abafarisai bakababoria, “Naki mogokora eritari borongo gokorwa ase rituko ri’Esabato?”

3Yeso akairaneria, “Timwana gosoma aya Daudi akorete, ekero arenge nenchara, ere na abarenge amo nere, 4buna asoete ase enyomba ya Nyasae, akabogoria na koria emegati yarenge koruegwa ase Nyasae, etare boronge koriegwa nonde otatiga nabakuani boka, naende akaa abwo barenge amo nere?” 5Akabatebia, “Omwana‐o‐mwanyabanto nere Omonene bw’Esabato.”

6Esabato ende agasoa ase esinagogi, akorokereria. Narengeo omonto agwo, okoboko kwaye gw’okorio kwagataete. 7Aborokia b’amariko na Abafarisai bakamotega korora gose namogwenie ase rituko ri’Esabato, banyare komosoera. 8Korende akamanya ebirengererio biabo, agatebia omonto oria okoboko kwaye kwagataete, “Imoka, otenene gati aa!” Akaimoka agatenena. 9Yeso akabatebia, “Nkobaboria nde ring’ana erimo: Mboronge rituko ri’Esabato gokora amaya gose amabe, gotooria obogima gose kobosiria?” 10Akabarigereria bonsi, agatebia omonto oria, “Rambora okoboko kwao!” Agakora bo; okoboko kwaye gokagwenigwa. 11Na barabwo bagaichorwa nokobea, bagatebania barabwo ase barabwo, buna baramokore Yeso.

Yeso ogochora abatomwa ikomi na babere

(Mat 10:1–4; Mar 3:13–19)

12Ase amatuko aria akaimoka akagenda ase egetunwa gosaba; akabao obotuko bwonsi ase ogosaba Nyasae. 13Bogachia gokia mambia akarangeria aborokigwa baye, agachora korwa asebare ikomi na babere, na abwo arogete abatomwa. 14Simion nere arogete Petero, na Anderea momura omwabo; Yakobo na Yohana, Filipo na Baritholomayo, 15na Matayo na Tomas, Yakobo bw’Alufayo, na Simion oyomo bw’Abazelote, 16na Yuda o Yakobo, na Yudas Iskariota, nere oyo omoruete.

17Agatirimboka amo nabarabwo, agatenena aase aateremu, amo nomoganda bw’aborokigwa baye; na omoganda bw’abanto abaruete Boyahudi yonsi, na Yerusalemu, na engegu ya Turo na Sidoni, bagacha komoigwa na kogwenigwa amarwaire abo. 18Na abwo bachandire nebirecha bi’eubi bakagwenigwa. 19Omoganda bwonsi okarigia komokuna, ekiagera chinguru chiare korua asare, chikabagwenia bonsi.

Ogosesenigwa na okoragererigwa

(Mat 5:1–12)

20Yeso akaimokia amaiso aye ase aborokigwa baye, akabora,

“Imosesenirie inwe abamore abataka,

ekiagera oboruoti bwa Nyasae nobwaino.”

21“Imosesenirie inwe abamore nenchara bono,

ekiagera namoigotigwe.”

“Imosesenirie inwe abamokorera bono,

ekiagera namoseke.”

22“Imosesenirie inwe ekero mwanyabanto bakobagecha, na kobarusanania, na kobachaya, na gosaria amarieta aino buna nababe more, ase engencho y’Omwana‐o‐mwanyabanto. 23Goka ase rituko riria, na gochenga, ekiagera ekeene eng’eria yaino nenene igoro; naki chisokoro chiabo nabo chiakorerete ababani engencho eyio eyio.

24“Korende obobe nobwaino inwe abanda, ekiagera mwanyorire omogoko oino.

25“Obobe nobwaino inwe abamoigotete bono, ekiagera namoche koba nenchara.

“Obobe nobwaino inwe abamogoseka bono, ekiagera namoche goichana na korera.

26“Obobe nobwaino inwe, ekero abanto bakobatogia, ekiagera chisokoro chiabo nabo chiakorerete ababani b’oborimo engencho eyio eyio.

Obwanchani ase ababisa

(Mat 5:38–48)

27“Korende nabatebirie inwe abamokoigwa: Ancha ababisa baino, bakorere amaya abwo babagechete, 28basesenie abwo bakobaragereria, basabere abwo bakobakorera bobe. 29Oyo okogoaka orosea oromo, moonchorere noronde, na ere oyogokoura eanga ya isiko, tomorina neya ime. 30Moe kera oyokogosaba; na oyogokoura ebinto biao tomoboria naende. 31Naende buna morigetie abanto babakorere inwe, nainwe mobakorere bo.

32“Komoranche ababanchete inwe, imbuya ki moranyore? Ekiagera nonya nabanyene ebibe nigo banchete abwo babanchete. 33Komorabakorere amaya abwo abakobakorera inwe amaya, imbuya ki moranyore? Ekiagera nonya nabanyene ebibe nabo bagokora. 34Naende komorarue singo ase abanto mosemeretie konyora egento korwa asebare naende, imbuya ki moranyore? Ekiagera nonya nabanyene ebibe nigo bakorua singo ase abanyene ebibe, erinde banyore koreng’ana. 35Korende mwanche ababisa baino, bakorere amaya, na korua singo, motari korengereria konyora egento gi’okoiranerigwa, eng’eria yaino nebe enene, na inwe namobe abana b’Oyore Igoro Mono, ekiagera ere nomuya ase abanto batari nokoiraneria ng’a mbuya mono, nonya nase abang’iti. 36Mobe namabera, buna Iso oino are namabera.

Igoro y’okogambia abande

(Mat 7:1–5)

37“Timogambia, nainwe timokogambigwa; timonachera, nainwe timokonacherwa; abera, nainwe namwaberwe; 38karue, nainwe namoegwe. Ekerengo ekiya keigateire, keinyageire, geichire, nakio abanto barabae inwe ase amaboko aino, ekiagera ekerengo keria mokorengera, nakio morache korengerwa nainwe.”

39Akabatebia omoreng’anio, “Inee! Omouko nonyare koraa omouko onde? Tibakogwa bonsi babere ase engoro? 40Omworokigwa tari omonene kobua omworokia oye, korende kera oyomo gakoorire kworokererigwa nabe buna omworokia oye. 41Inaki okorigereria ekeogoto kere ase eriso ri’oyomino, na omoribo ore ase eriso riao ime toyorochi? 42Gose naki oratebie oyomino: Oyominto, ntige nkorusie ekeogoto kere ase eriso riao ime, na aye omonyene torochi omoribo ore ase eriso riao? Aye omong’ainereria, rusia ritang’ani omoribo ore ase eriso riao, nario orarore buya omanye korusia ekeogoto kere ase eriso ri’oyomino.

43“Naki tori omote omuya okwama amatunda amabe, gose omote omobe okwama amatunda amaya. 44Kera omote nigo okomanyekana ase amatunda aye. Naki ase emetobo abanto tibari gotwa amako, gose ase emenyenya tibari gotwa amasabibu. 45Omonto omuya ase emonga engiya y’enkoro yaye nigo akorua ayare amaya; na omonto omobe ase emonga yaye embe nigo akorua ayare amabe, ekiagera ebiichire ase enkoro, nabio omonwa ogokwana.

Amaroso abere

(Mat 7:24–27)

46“Nase ki mokondoka Omonene, Omonene, na inwe timori gokora aya ngoteba? 47Kera omonto ogocha asende, na koigwa amang’ana aane, na koyakora, nimborokie buna are: 48Nigo agwekaine nomonto oagachete enyomba, agakunya gochia inse mono, akabeka oboroso bwaye igoro ase egetare. Ekero etoigo yachia gocha, eooro egaaka enyomba eria ne chinguru, tiyanyara koyenyegeria, ekiagera oboroso bwaye bwaagachetwe igoro ase egetare. 49Nere oyokoigwa otari gokora iga, nigo agwekaine nomonto oagachete enyomba igoro ase amaroba, etabegetwe oboroso. Nabo eooro ekayeaka ne chinguru, ekagwa bwango, na okogwa kw’enyomba eria gokaba okonene.”

Currently Selected:

LUKA 6: EKEGUSIIBBLE

Highlight

Copy