ABALAWI 27
27
Amachiko igoro y’ebiegwa bikoruegwa ase Omonene
1Omonene agakwana na Musa akamotebia, 2“Otebie Abaisraeli: Onye eira yarietwe ng’a omonto aruegwe ase ogokorera Omonene, na omonto oyio karaboorigwe arueo, goika akorerwe rigori buna iga: 3Rigori ri’omonto omosacha bw’emiaka emerongo ebere goika emerongo etano nomo, nigo rirabe chisekeli chie chifeta emerongo etano, ase ekerengo gi’esekeli egokorerwa ase Obomenyo Obochenu. 4Onye nomokungu nigo rirabe chisekeli emerongo etato. 5Onye nomonto omoke bw’emiaka etano goika emerongo ebere, rigori riaye nigo rirabe, ase omomura chisekeli emerongo ebere, na ase omoiseke chisekeli ikomi. 6Onye nomwana bw’omotienyi oyomo goika emiaka etano, rigori riaye nigo rirabe, ase omomura chisekeli isano, na ase omoiseke chisekeli isato. 7Onye nomonto omogotu bw’emiaka emerongo etano nomo na goetania, rigori riaye nigo rirabe, ase omogaaka chisekeli ikomi na isano, na ase omong’ina chisekeli ikomi.
8“Onye omonto oria orieretwe eira nigo are omotaka mono otanyare goakana rigori riria riabekirwe, rirorio omonto oria nigo ararentwe ase omokuani, nere amokorere rigori koreng’ana nokonyara kw’omonto oyio oriete eira.
9“Onye eira y’omonto oria ariete nigoro y’eng’iti yancheire nainche Omonene ebe ekeng’wanso, ekeegwa buna ekio asende nakebe egechenu. 10Omonto oria takoba ne ribaga koonchoreria eng’iti eria arente eng’iti eng’ao, takoonchoreria eng’iti engiya arente eyere embe, gose eng’iti embe arente eyere engiya. Onye omonto okoonchoreria ching’iti, erio chionsi ibere nachibe chiatananirwe asende. 11Kerabe eng’iti etachenegeti ebe ekeng’wanso ase Omonene, omonto oria ayerente ase omokuani, 12na ere akore rigori ri’eng’iti eria koreng’ana buna ere engiya gose embe. Rigori omokuani arakore, nario erio rirabe. 13Korende onye omonto omonyene oganetie kobooria eng’iti eria, rirorio aakane rigori riria ribekire, na amente eyemo ya isano ase rigori erio.
14“Ekero omonto agwatanana enyomba yaye ebe enchenu ase Omonene, omokuani akore rigori ri’enyomba eria, buna ere engiya gose embe; buna omokuani arakore rigori ri’enyomba eria, nario erio rirabe. 15Onye omonto oria bwatananete enyomba eria aganetie koyebooria ebe eyaye naende, rirorio aakane rigori riria ribekire, na amente eyemo ya isano ase rigori erio; ase igo etigare ebe eyaye.
16“Onye omonto ogwatanana ensemo y’oboremo bw’omwando oye, erio aye oyekorere rigori koreng’ana nekerengo gie chimbusuro chikobusurwa aroro, chimbusuro chi’esairi ebitonga ikomi chiakanwe chisekeli chie chifeta emerongo etano. 17Omonto karaatanane oboremo bwaye korwa ase engaki y’Omwaka bw’Omochengo, rigori erio nario rirabe buna aye kwarikora. 18Korende omonto karaatanane omogondo oye nyuma y’Omwaka bw’Omochengo, erio omokuani akore rigori rie chibesa koreng’ana nemiaka yatigaire goika Omwaka onde bw’Omochengo, na igo nakeyie rigori. 19Omonto oria oraatanane oboremo bwaye asende, onye oganetie kobobooria, aakane rigori riria ribekire, naende amente ensemo ya isano ase rigori erio, na oboremo botigare koba obwaye. 20Onye omonto oria taganeti kobooria oboremo boria, korende aboonerie omonto omoao, rirorio oboremo obwo tibokoboorigwa nonya ng’ake. 21Korende ekero oboremo boria bogochia gotigwa ase engaki y’Omwaka bw’Omochengo, bobe obwatananirwe ase Omonene. Nigo borabe obw’omokuani.
22“Omonto karaatanane ase Omonene oboremo agorete, obwo botari ensemo y’omwando oye, 23omokuani akore rigori ri’oboremo boria koreng’ana nemiaka etigarete goika Omwaka bw’Omochengo. Ase rituko riria kegima omonto oria aakane rigori riria ribekire, ne chibesa echi chibe chiatananirwe ase Omonene. 24Ase Omwaka oria bw’Omochengo oboremo boria boiranerigwe omonyene oria oboonetie, oyio oboremo bwarenge ensemo y’omwando oye.
25“Kera rigori rikobekwa nigo rirareng’anigwe nekerengo gi’esekeli eyio egokorerwa ase Obomenyo Obochenu. (Esekeli eyemo nechigera emerongo ebere.)
26“Korende chitugo chintangi nechiane, ase igo onde tachiatanana, kerabe eng’ombe gose eng’ondi, gose embori; eng’iti entangi nigo ere eyane. 27Korende onye eng’iti eria entangi techenegeti, rirorio omonto oria ayeboorie koreng’ana ne rigori rirabekwe, naende amente ensemo ya isano ase rigori erio, gose onye tekoboorigwa rirorio eoonigwe ase rigori erabekerwe.
28“Korende gento kende gionsi omonto aatananire ase Omonene ase enchera gete kebe ekiaye kegima, kerabe omonto, gose eng’iti gose oboremo bw’omwando oye, egento ekio tikebaisa koonigwa gose koboorigwa. Kera egento giatananirwe nigo kere egechenu mono ase Omonene. 29Omonto onde bwensi bwatananirwe ase ogosirigwa takonyara koboorigwa; omonto oyio goika aitwe akwe.
30“Ensemo ya ikomi y’okwama kwa mogondo, kerabe endagera gose amatunda, ebio nebi’Omonene, ebio nebichenu ase Omonene. 31Onye omonto oganetie kobooria ensemo yaye ya ikomi, nigo aramente eyemo ya isano ase rigori riaye. 32Boigo eyemo ya ikomi y’amaicho e chiombe, gose ching’ondi, gose chimbori, engencho yaye kera eng’iti ya ikomi ye ching’iti chigoeta inse ase enyimbo y’omorisia, nebe enchenu ase Omonene. 33Omonyene eng’iti eria takoriga‐rigereria, onye ere engiya gose embe, na takoyeonchoreria. Onye omonto okoonchoreria ching’iti echio, erio chionsi ibere nchibe chinchenu, tichikoboorigwa.”
34Aya naro amachiko Omonene achigete Abaisraeli goetera ase Musa agwo ase egetunwa gia Sinai.
Currently Selected:
ABALAWI 27: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
