ABALAWI 26
26
Ogosesenigwa ase abaigweri
(Okoir 7:12–24; 28:1–14)
1Naende Omonene agakwana, “Timobaisa kweroiseria emegwekano mochie gosasima, gose gotenenia ase ense yaino emegwekano, gose chisiiro, gose rigena ribachire rire nemegwekano, ase okobisasima, ekiagera inche ninche Omonene, Nyasae oino. 2Morende Chisabato chiane na mosike Obomenyo bwane Obochenu. Inche ninche Omonene.
3“Komorabwatie aya nachikire, na kobwata amachiko aane na koyakora, 4erio nimbatwerie embura ase engaki egwenerete, na ense inayaame endagera, na emete y’emegondo yaame amatunda. 5Okwama kwaino nakobe okonene, na mogenderere koora goika engaki y’ogotora amasabibu eike, na mogenderere gotora amasabibu goika engaki y’ogosimeka eike; na inwe namonyore endagera enyinge, naende momenye ase ense yaino ase obotoereru.
6“Nindete omorembe ase ense yaino, na inwe namorare motari kwoboa monto onde bwensi. Nindusie ching’iti chi’orosana chirueo, ne chisegi tichikobao. 7Namoserie ababisa baino, nababugwe ase amasio aino, baitwe nemioro. 8Abanto baino batano nababue abanto rigana erimo, na abanto baino rigana erimo nababue abanto chilifu ikomi; ababisa baino nababugwe ase amasio aino, baitwe nemioro. 9Nimbasesenie moibore abana abange, momenteke. Ninkore okobwatana kwane kw’ogotianania kogenderera koba nainwe. 10Namogenderere koria endagera enkoro ere enyinge ase ebiage, na ekiagera ere enyinge mono namoyerusie aroro, erinde monyore ribaga mobeke enyia. 11Nimenye ase egati yaino ase Obomenyo bwane Obochenu; tinkobatiga nonya ng’ake. 12Nintaare amo nainwe; inche nimbe Nyasae oino, na inwe mobe abanto baane. 13Inche ninche Omonene, Nyasae oino, nabarusetie korwa ase ense ya Misiri, erinde timobaisa koba abasomba aroro; inche nasaretie chinguru chi’Abamisiri, nkabuna amakorogoto barabwo babegete ase amareko aino, nkabatiga mokaruao mogwesigoria.
Egesusuro ase abatakoigwera
(Okoir 28:15–68)
14“Korende onye timokonyigwera gose kobwata amachiko aya onsi, 15na onye timokobwatia aya nachikire, naende komoraange emeroberio yane echikire, na timokora amachiko aane onsi, korende mobe mogosaria okobwatana kwane kw’ogotianania, 16rirorio nainche nimbakorere amang’ana aya: Nimbarentere omoondoko mobosokano, na oborwaire bw’okoria emebere, na obw’ogosaria amaiso, na obw’ogokoora obogima. Namobusure chindagera, korende timokonyora gento, ekiagera ababisa baino nabwo barachirie. 17Nimbe mamincha yaino, na inwe namobugwe nababisa baino. Abanto babagechete nabwo barabagambere, na inwe namobugwe nababisa baino. Abanto babagechete nabwo barabagambere, na inwe mobe mogotama nonya monto onde tari okobabwatia.
18“Amang’ana aya onsi karabe abanyorire, na inwe mogenderere kwanga konyingwera, erio nario ndabae egesusuro ara gatano na kabere ase engencho y’ebibe biaino. 19Ninsarie chinguru chi’oboenenu, ninkore igoro oome pa, abe buna ekioma, embura tetwa, ne riroba ri’ense yaino rioome pa, ribe buna etaai. 20Emeremo yaino emekong’u morabe mogokora, nigo erabe bosa, ekiagera ense yaino tekwama endagera, na emete tekwama amatunda.
21“Onye naende mokogenderera koba mamincha yane na kwanga konyigwera, nindete amaakwa amange asemore, ara gatano na kabere, buna ebibe biaino biragwenere. 22Nimbatomere ching’iti chintindi chi’orosana chiite abana baino, ne chitugo chiaino, chibakeyie mobe abake goika chinchera chiaino chibe bosa.
23“Komorabe mwanyorire egesusuro ekio gionsi timong’iranera, korende mogenderere koba maminche yane, 24rirorio boigo nimbe mamincha yaino, erio inche omonyene imbae egesusuro ara gatano na kabere buna ebibe biaino biragwenere. 25Nindete esegi asemore, inyeruserie egesiomba, ekiagera mwasaririe okobwatana kwane kw’ogotianania. Komorabe mogosangererekana ase emechie yaino korigia obotamero, nimbatomere amarwaire amabe abaite, goika mobekwe ase amaboko ’ababisa baino. 26Ninkeyie chindagera chiaino chibe chinke; abakungu ikomi barugere eriko erimo, na barabwo babarengere endagera ensinini, na inwe namoyerie, korende timokoigota.
27“Komorabe mwanyorire emechando eye yonsi, na mogenderere kwanga konyigwera na koba mamincha yane, 28erio nario naende ndabae egususuro ara gatano na kabere ase engencho y’ebibe biaino. 29Enchara nebe enene mono goika morie emebere y’abana baino, abamura na abaiseke. 30Ninsarie obotunwa bwaino ase mogosasimera, nintagore ebisasimero biaino ase mogosambera amanukato, erio intugute emebere yaino ekwete igoro y’emegwekano yaino mogosasima etari moyo. Inche nimbaange kegima. 31Nintagore emechie yaino ebe amatombe, ninsarie kegima aase aino ase mogosasimera; tingwanchera ebing’wanso biaino, ebio tibikoba rimisu rikongwenera. 32Ninsarie nsarie ense yaino kegima goika ababisa baino bache komenya imeo bakumie buna esaregete. 33Nimbaserebanie mogende komenya ase egati y’abanto b’ebisaku, nimbatunyanerie esegi, naende ninsarie ense yaino ebe bosa, na emechie ebe amatongo. 34Ekero mokare ase ense y’ababisa baino, na ense yaino negendererete koba amatongo, ero negokere engaki y’ogotimoka okwo inwe mwayetangete. 35Ekero ense eria egendererete koba amatongo netimoke ogotimoka okwo motayeete ekero mwamenyeteo.
36“Nimbatige inwe, abwo moratigare ase ense y’ababisa baino mobe nobwoba ase chinkoro chiaino ime, goika eriogi rie rito ri’omote rikonyegerigwa nembeo naribagose motame; ee, namotame buna omonto ogotama kagoserigwa korwa ase esegi, namogwe nonya onde tari kobabwatia. 37Namogochane buna abanto bagotama korwa ase esegi, nonya monto onde tari kobabwatia. Timokonyara koba ne chinguru chi’okorwania ababisa baino. 38Namokwe mosirere ase ense y’ababisa baino, na ense yabo nebamere kegima. 39Baria bare abake asemore baratigare bare moyo agwo ase ense y’ababisa baino nabasirere aroro ase engencho y’ebibe biabo, naboigo nase engencho y’ebibe bie chisokoro chiabo nabasire buna chisokoro chiabo chiasirete.
40“Erio abwo baratigare goika baorokie ebibe biabo, naende baorokie ebie chisokoro chiabo, abwo batabete abegenwa asende, na ekiagera baangete konyigwera, 41bakagera nkaba nendamwamu asebare goika nkabaira ase ense y’ababisa babo. Onye chinkoro chiabo echio chire chinkong’u chigwekeyia, na barabwo banche konyora egesusuro ki’ebibe biabo, 42erio nario ndainyore okobwatana kwane k’wogotianania okwo nakorete na Yakobo, na Isaka, na Ibrahimu, naende ning’inyore ense eria nabaete. 43Ense eria netigwe nabarabwo, erinde egokere engaki y’ogotimoka kwaye ekero etari nabanto. Abanto abwo nabanyore egesusuro, ekiagera bangete kobwata amachiko aane, na bakaanga kobwatia emeroberio yane nachigete. 44Korende nonya nabo ase engaki eyio ekero bagendererete komenya ase ense eria y’ababisa babo, inche tinkobaanga gose kobatiga, na tinkobaseria. Tingotiga okobwatana kwane kw’ogotianania nakorete nabarabwo, ekiagera ninche Omonene, Nyasae obo. 45Ase engencho yabo ning’inyore okobwatana kw’ogotianania nakorete ne chisokoro chiabo, echio narusetie korwa ase ense ya Misiri ase obosio bw’abanto b’ebisaku, erinde imbe Nyasae obo. Inche ninche Omonene.”
46Eyio nero emeroberio echikire amo namachiko Omonene aruete goetera ase omonwa o Musa, agwo ase egetunwa gia Sinai, ebe ase egati yaye na Abaisraeli.
Currently Selected:
ABALAWI 26: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
