YOHANA 3

Yeso ogokwana na Nikodemo

1Narengeo omonto oyomo bw’Abafarisai, erieta riaye Nikodemo, omonene bw’Abayahudi. 2Oyo igo achete ase Yeso botuko, akamotebia, “Rabii twamanyire ng’a nomworokia ore, kwarure ase Nyasae, ekiagera omonto onde tari oranyare gokora ebikone ebi ogokora aye, otatiga Nyasae abe amo nere.”

3Yeso akamoiraneria, “Ekeene, ekeene, nagotebirie: Omonto ataiboiri eria kabere, takonyara korora oboruoti bwa Nyasae.”

4Nikodemo akamoboria, “Naki omonto aranyare koiborwa kabeire omogaaka? Nanyare gosoa enda ya ng’ina eria kabere aiborwe?”

5Yeso akamoiraneria, “Ekeene, ekeene, nagotebirie: Omonto ataiboiri ase amache na Omoika, takonyara gosoa ase oboruoti bwa Nyasae. 6Ekeiboire ase omobere nomobere; na ekeiboire ase Omoika nomoika. 7Tokumia ekiagera nagotebia: Goika oiborwe naende. 8Embeo nigo ekogusa aase erigetie, na egeturi kiaye nigo ogokeigwa, korende tomanyeti aase ekorwa gose aase ekogenda; naboigo na kera omonto oiboirwe ase Omoika.”

9Nikodemo akamoboria, “Naki aranyare koba aya?”

10Yeso akamoiraneria, akamotebia, “Inee! Aye nomworokia bw’Abaisraeli, na aya toyamanyeti? 11Ekeene, nagotebirie: Eri tomanyete nario togokwana, na eri toroche twariorokia; na oborori bwaito timori kobwancha. 12Onye nkobatebia amang’ana ’ense, na inwe timokoyegena, naki moregene kondabatebie amang’ana a igoro? 13Naende monto onde tari ogendete igoro, otatiga ere oyoigete korwa igoro, Omwana‐o‐mwanyabanto. 14Naende buna Musa aimokereretie eng’iti ase erooro, naboigo na Omwana‐o‐mwanyabanto goika aimokererigwe igoro; 15erinde monto onde bwensi oyomwegenire tasira, korende abe nobogima bwa kare na kare.”

16“Naki Nyasae ayianchete ense, goika akarua Omwana oye omomoima, erinde monto onde bwensi oyomwegenire tasira, korende abe nobogima bwa kare na kare. 17Naki Nyasae tatomete Omwana oye ase ense agambie ense, korende ense etoorigwe nere. 18Oyomwegenire takogambigwa oyotegeneti oikire kogambigwa, ekiagera atariegeneti erieta ri’Omwana omomoima o Nyasae. 19Na eke nakio ekina ng’a omobaso ochire ase ense, korende abanto bagancha omosunte kobua omobaso, ekiagera ogokora kwabo kwarenge okobe. 20Naki kera oyogokora amabe nigo agechete omobaso, gose tagocha ase omobaso, ogokora kwaye tikobaisa koorokigwa. 21Korende oyogokora ekeene nigo agocha ase omobaso, ogokora kwaye kororekane ng’a nigo gwakorirwe ase Nyasae.”

Yohana Omobatisi okogenderera koba kirori o Yeso

22Nyuma ase aya Yeso na aborokigwa baye bakagenda goika ense ya Boyahudi. Akabeera aroro amo nabarabwo, akabatisa. 23Yohana nere nigo arenge kobatisera aria Ainon, ang’e na Salimu, ekiagera amache amange narengeo. Abanto bakamochiera bakabatiswa. 24Naki Yohana konya tarabekwa echela.

25Nabo okoamererania gokaoroka ase egati y’aborokigwa ba Yohana na Omoyahudi oyomo ase amang’ana ogwesibia. 26Bagachiera Yohana, bakamotebia, “Omworokia, ere oyorenge amo naye ng’umbu ya Yorodan, oyio kwaorogetie aye, oyio nao are akobatisa, na abanto bonsi nkomochiera bare.”

27Yohana akairaneria, “Omonto takonyara konyora ring’ana rinde rionsi otatiga aegwe korwa igoro. 28Inwe abanyene mwambereire kirori ng’a natebete: Inche tari Kristo, korende natomirwe imotang’anere. 29Oyore nomoriakari nere omonyuomi, korende omong’wansi oye nigo agotenena na komoigwa, ogokera eriogi ri’omonyuomi; naboigo omogoko one oikeranire bono.” 30Ere goika amenteke, korende inche nkee.

Oyochire korwa igoro

31“Oyochire korwa igoro, oyio nigo are igoro ase onsi; oyore bw’ense noyo bw’ense, nigo agokwana amang’ana ’ense; ere oyochire korwa igoro nigo are igoro ase onsi. 32Nigo akoba kirori ase aya arorire na koyaigwa; gose onde tari oyobwanchire oborori bwaye. 33Oyobwanchire oborori bwaye oorokirie Nyasae maiso marore, ng’a noyo bw’ekeene. 34Naki ere oyotometwe na Nyasae nigo agokwana amang’ana a Nyasae; naki Nyasae tari komoa Omoika ase ekerengo. 35Tata omwanchire Omwana, omoeire bionsi ase amaboko aye. 36Oyoramwegene Omwana nare nobogima bwa kare na kare; oyotaigwereti Omwana takorora obogima, korende endamwamu ya Nyasae nigo emoikaranserete.”

Currently Selected:

YOHANA 3: EKEGUSIIBBLE

Highlight

Copy