YOHANA 2

Enyangi agwo Kana

1Naende rituko ria gatato yarenge enyangi agwo Kana ya Galili, na ng’ina Yeso nao arenge. 2Yeso nere konya orangerigwe amo naborokigwa baye ase enyangi. 3Goika edivai egachia kobaremera, ng’ina Yeso akamotebia, “Tibari nedivai.”

4Yeso akamotebia, “Omong’ina, inki inche nde naye? Ensa yane teraika.”

5Ng’ina agatebia abasomba, “Rinde rionsi arabatebie, morikore.”

6Nchiarenge aroro chinsiongo isano nemo chi’amagena, chiabekire aroro ase engencho y’ogwesiberia kw’Abayahudi; kera eyemo nigo yarenge ekerengo gie chigalani emerongo ebere gose etato. 7Yeso akabatebia, “Ichoria chinsiongo echi amache.” Bagachiichoria goika igoro. 8Akabatebia, Bono taa, “moirere omonene bw’omoyega.” Bakamoirera. 9Omonene bw’omoyega agachia koigwa amache aria aonchoretwe koba edivai, tamanya aase yarwa, (korende abasomba ababuuchete amache mbamanyete). Omonene oria bw’omoyega akarangeria omonyuomi, 10akamotebia, “Kera omonto ritang’ani nigo agochaka nedivai ere engiya, goika abanto kobanyure mono, erio orenta eyetari engiya; aye gese nigo ogachete edivai engiya goika bono.”

11Oyio noro omochakano bw’ebikone Yeso akorete, agwo Kana ya Galili, akaorokia obonene bwaye; aborokigwa baye bakamwegena.

12Nyuma ase aya akagenda goika Kapernaumu, ere, na ng’ina, na abamwabo, na aborokigwa baye; bakamenya aroro amatuko amake.

Yeso ogochena Hekalu

(Mat 21:12–13; Mar 11:15–18; Luk 19:45–46)

13Naende Epasaka y’Abayahudi nigo yarenge ang’e, na Yeso agatiira goika Yerusalemu. 14Akarora ase Hekalu ime abanto barenge koonia chiombe, ne ching’ondi, na amaruma, na abaare koonchora chifeta, baikaransete. 15Agakora omocharichi bwe chingori, agasokia bonsi korwa ase Hekalu, ne ching’ondi, ne chiombe; agaitera chibesa chiabo abaare koonchora chibesa, akaonchorana chimesa chiabo. 16Naende akabatebia baria barenge koonia amaruma, “Rusia ebinto ebi aa timokora enyomba ya Tata one koba enyomba y’okoonchoreria.”

17Aborokigwa baye bakainyora ng’a nerikire, “Risemi ri’enyomba yao riandire.”

18Nabo Abayahudi bakamoboria, “Ngekone ki ogotworokia, ng’a nore noboronge bw’ogokora aya?”

19Yeso akabairaneria, “Tagora Hekalu eye, na inche ase amatuko atato ninyetenenie.”

20Abayahudi bakabora, “Hekalu eye yaagachetwe ase engaki y’emiaka emerongo ene na etano nomo, na aye oyetenenie ase amatuko atato?”

21Korende ere nigo akwanete igoro ye Hekalu y’omobere oye. 22Nabo ekero abogetigwe korwa ase abakure aborokigwa baye bakainyora ng’a nigo atebete ring’ana eri, bakegena ririko riria, ne ring’ana riria Yeso atebete.

23Goika agachia kobao Yerusalemu ekero ki’Epasaka ase Rituko Rinene, abanto abange bakariegena erieta riaye, kobarorire ebikone arenge gokora. 24Korende Yeso tegenete asebare, ekiagera nabamanyete bonsi, 25naende ekiagera tarigetie onde amobere kirori igoro ya mwanyabanto; naki ere omonyene amanyete ayare ime ya mwanyabanto.

Currently Selected:

YOHANA 2: EKEGUSIIBBLE

Highlight

Copy