YOHANA 20

Okobokigwa kwa Yeso

(Mat 28:1–10; Mar 16:1–8; Luk 24:1–12)

1Bono ase rituko rie ritang’ani ri’echuma Mariamu; Magidalena akagenda ase oboina kobogokia moka, ekero botarakiamoka buya, akarora ng’a rigena riarusigwe korwa ase oboina. 2Erio akagenda bwango goika ase Simion Petero, na ase omworokigwa oria onde, oria Yeso anchete, akabatebia, “Barusirie Omonene korwa ase oboina, korende titomanyeti aase bamobeka.”

3Petero agasoka, akagenda amo nomworokigwa oria onde, bakabwatia enchera kogenda oboina. 4Bakaminyoka chimbero bonsi babere amo. Omworokigwa oria onde akaminyoka bwango kobua Petero, akaba oyo bwe ritang’ani goika ase oboina, 5agatung’ama, akarora ebitambaa bireo, korende tasoa ime. 6Erio Simion Petero agacha, akamotunyana, agasoa oboina ime, akarora ebitambaa bireo, 7na egetambaa keria ki’omotwe oye tikiabekire amo nebitambaa binde, korende nigo kiaringire, kebekire ao gioka. 8Erio agwo omworokigwa oria onde orenge bwe ritang’ani goika ase oboina agasoa, akarora, akeegena. 9Naki konya tibaramanya ririko, ng’a nemogwenerete koboka korwa ase abakure. 10Erio aborokigwa baria bakagenda chinsobo.

Yeso okoorokera Mariamu Magidalena

(Mar 16:9–11)

11Korende Mariamu nigo ateneine isiko ang’e noboina, okorera; nabo gakorera, agatung’ama, akarigereria ime ase oboina. 12Erio akarora abamalaika babere, barenge ne chianga chindabu, baikaransete, oyomo ase omotwe, naende oyomo ase amagoro, agwo aase omobere o Yeso obegetwe. 13Barabwo bakamoboria, “Omokungu, inki okorera?”

Akabairaneria, “Nekiagera barusirie Omonene one, na timanyeti aase bamobeka.”

14Kagokwana aya akeonchora gochia nyuma, akarora Yeso oteneine, tamanya ng’a n’Yeso. 15Yeso akamotebia, “Omong’ina, ninki okorera? Ning’o okorigia?”

Ere agakaga ng’a nomorendi bw’omogondo, akamotebia, “Omonene, onye naye kwamoira, ntebia aase kwamobeka, na inche nimorusie.”

16Yeso akamotebia, “Mariamu.”

Ere akeonchora, akamotebia ase Ekeibirania, “Raboni!” (Okoonchorwa kwaye, Omworokia).

17Yeso akamotebia, “Tonkuna, ekiagera tindagenda ase Tata one, korende genda ase abaminto, obatebie, ng’a nkogenda nde ase Tata one oyore Iso oino, ase Nyasae one oyore Nyasae oino.”

18Mariamu Magidalena akagenda, agatebia aborokigwa amang’ana ng’a, “Narorire Omonene”, naende ng’a omotebirie aya.

Yeso okoorokera abatomwa

(Mat 28:16–20; Mar 16:14–18; Luk 24:36–49)

19Ase omogoroba bwe rituko rie ritang’ani ri’echuma, na ebisieri kobiasiekirwe aase agwo aborokigwa barenge, ekiagera bairogete Abayahudi, Yeso agacha, agatenena gati‐gati akabatebia, “Omorembe obe asemore!”

20Gakwanire aya, akaborokia amaboko aye ne rikere riaye. Erio aborokigwa bakagoka kobachia korora Omonene. 21Yeso akabatebia eria kabere, “Omorembe obe asemore! Buna Tata antomete, naboigo nainche nabatomire inwe.”

22Gakwanire aya, akabautera omoika, akabatebia, “Nyora Omoika Omochenu. 23Bande bonsi moraabere ebibe, baabeirwe; naende bande bonsi morasiekere ebibe, basiekeirwe.”

Yeso okoorokera Tomas

24Ko Tomas, oyomo bwa baria ikomi na babere, oyokorokwa Barongo, tarenge amo nabarabwo ekero Yeso achete. 25Erio aborokigwa bande bakamotebia, “Twarorire Omonene.” Korende ere akabatebia, “Ntarochi amaboko aye na ebimanyererio bi’emesumari, na kobeka ekiara kiane aase emesumari yamobetete, na kobeka okoboko kwane rikere riaye ime, tinkwegena nonya ng’ake.”

26Nyuma y’amatuko atano na atato aborokigwa baye nao barenge naende ase enyomba eria ime, na Tomas amo nabarabwo. Yeso agacha ekero ebisieri bisiekire, agatenena gati‐gati, akabora, “Omorembe obe asemore!” 27Erio agatebia Tomas, “Renta aiga ekiara kiao. Orore amaboko aane. Renta okoboko kwao, okobeke ase rikere riane; toba oyotegeneti, korende oyo bwegenete.”

28Tomas akamoiraneria, “Omonene one, na Nyasae one!”

29Yeso akamotebia, “Iga kwegena ekiagera kwandora; mbasesenirie abatarochi ko begenire.”

Engencho yagerete enchili eye ekarikwa

30Nabo mbire ebikone binde ebinge Yeso akorete ase amasio ’aborokigwa baye bitarikiri ase ebuku eye, 31korende ebi biarikirwe, erinde monyare kwegena ng’a Yeso nere Kristo, Omwana o Nyasae; naende ase okwegena mobe nobogima ase erieta riaye.

Currently Selected:

YOHANA 20: EKEGUSIIBBLE

Highlight

Copy