YOHANA 18

Okobwatwa kwa Yeso

(Mat 26:47–56; Mar 14:43–50; Luk 22:47–53)

1Yeso gakwanire amang’ana aya, akaimoka amo naborokigwa baye kogenda ng’umbu y’akarooche Kedron, aase omogondo orenge. Ere na aborokigwa baye bagasoa aroro. 2Na Yudas, oria omoruete naamanyete aase aria, ekiagera Yeso are kogenda aroro ekero ase ekero amo naborokigwa baye. 3Nabo Yudas gaikire konyora omoganda bw’abarwani, na abarendi baruete ase abakuani abanene na Abafarisai, akagenda aroro ne chitaya na ebieri, na ebinto bi’esegi. 4Nabo Yeso, kamanyete onsi ayagochia komonyora, akaoroka, akababoria, “Ning’o mokorigia?” 5Bakamoiraneria, “Yeso Omonazareti.”

Yeso akabatebia, “Ninche ere.”

Yudas nere oyomoruete nigo ateneine amo nabarabwo. 6Nabo ekero Yeso achia kobatebia, “Ninche ere,” bakairana nyuma, bagaaka inse. 7Akababoria eria kabere, “Ning’o mokorigia?”

Bakabora, “Yeso Omonazareti.”

8Yeso akairaneria, “Naikire kobatebia ng’a ninche ere; nabo onye mokondigia inche, batige aba bagende.” 9Erio riikeranigwe ring’ana riria akwanete, “Aba kwang’ete tinsireti nonya noyomo obo.”

10Nabo Simion Petero narenge nomoyio o birende, akayong’usa, agaaka omosomba bw’omokuani omonene, akamobutora ogoto kwaye gw’okorio. Na omosomba oria erieta riaye nigo are korokwa Maliko. 11Erio Yeso agatebia Petero, “Irania omoyio oo ase ekerende kiaye. Inee! Egekombe eke Tata ang’eire, tinkenywera?”

12Abarwani b’esegi amo nomotang’ani obo, na abarendi baria b’Abayahudi bakabwata Yeso, bakamosiba. 13Erio bakamoira ritang’ani ase Anasi oyorenge ise biara Kayafa, oria orenge omokuani omonene omwaka oria. 14Na Kayafa nere oete Abayahudi amang’ana ng’a negwenerete omonto oyomo akwe ase engencho y’abanto.

Petero ogokana Yeso, na omokuani omonene okomoboria

(Mat 26:59–75; Mar 14:54–72; Luk 22:55–71)

15Simion Petero na omworokigwa onde bagatunyana Yeso. Omworokigwa oria onde nigo amanyekanete nomokuani omonene, agasoa amo na Yeso ase egoora y’omokuani omonene, 16korende Petero agatenena gesieri isiko. Nabo omworokigwa oria onde, oyomanyekanete nomokuani omonene agasoka agakwana nomoiseke orenge korenda gesieri, akarenta Petero ime. 17Erio omoiseke oria orenge korenda gesieri akaboria Petero, “Aye tori oyomo bw’aborokigwa baye omonto oyo?”

Ere agakana, “Tari inche.”

18Abasomba baria na abarwani nigo barenge bateneine, bautete omorero bw’amakara, ekiagera obokendu mbwarenge, bakaba ngwota bare omorero. Petero nere nigo arenge amo nabarabwo, ogwota omorero.

19Erio omokuani omonene akaboria Yeso amang’ana igoro y’aborokigwa baye, na amang’ana ’okworokereria kwaye. 20Yeso akamoiraneria, “Inche nakwanire nense maiso marore. Amatuko onsi nigo narenge kworokereria ase chisinagogi na ase Hekalu, aase Abayahudi bonsi baare gosangererekana, gose tintebeti ing’ana bobisi. 21Nase ki okomboria? Boria baria baigwete aya nakwanete nabarabwo; barabwo mbamanyete aya nabatebetie.”

22Gachia gokwana amang’ana aya, oyomo bw’abarendi baria oteneine ang’e, agaaka Yeso oroe, akabora, “Naboigo okoiraneria omokuani omonene?”

23Yeso akamoiraneria, “Onye nakwana bobe, orokia obobe boria, korende onye nakwana buya, ninki okong’akera?”

24Nabo Anasi akamoira osibire ase Kayafa, omokuani omonene.

25Na Simion Petero nigo arenge oteneine ogwota omorero. Bakamotebia, “Aye boigo tori oyomo bw’aborokigwa baye?”

Ere agakana, akabora, “Tari inche.”

26Oyomo bw’abasomba b’omokuani, omoamate bw’oria onachetwe ogoto na Petero, akabora, “Inche tinakoroche ime ase omogondo amo nere?”

27Petero agakana naende. Erio kegima etuoni ekabuga.

Yeso ase obosio bwa Pilato gavuna o Rumi

(Mat 27:1–2,11–14; Mar 15:1–5; Luk 23:1–5)

28Erio bakaira Yeso korwa ase Kayafa goika enyomba enene y’ekegambero. Bokaba bogokiamoka, na barabwo abanyene tibasoa ime ase ekegambero, tibabaisa gocha kobekwa ogotacheneka korende bararia Epasaka. 29Erio Pilato akabachiera isiko, akababoria, “Ngosoera ki mobwate ase omonto oyo?”

30Bakairaneria, “Onye oyo atarenge omokori amabe, anga titwamorenta asore.”

31Erio Pilato akabatebia, “Moire inwe, momogambie ase ogochika kwaino.”

Abayahudi bakamotebia, “Intwe titori ne ribaga goita omonto.” 32Erio ring’ana ria Yeso riikeranigwe, eri akwanete ase okoorokia imakweri ki aranyare gokwa.

33Erio Pilato agasoa ekegambero naende, akarangeria Yeso, akamoboria, “Inee! Naye omoruoti bw’Abayahudi?”

34Yeso akairaneria, “Naye gwatebire ayio aye omonyene, gose nabanto bande bagotebirie amang’ana aya igoro yane?”

35Pilato akairaneria, “Inee! Inche n’Omoyahudi nde? Abanto b’egesaku kiao na abakuani abanene bakorentire asende. Inki gwakorete?”

36Yeso akairaneria, “Oboruoti bwane tibori obw’ense eye. Onye oboruoti bwane mbwarenge obw’ense eye, abasomba baane anga mbandwanerera, tinyara kobekwa ase amaboko ’Abayahudi, korende bono oboruoti bwane ti bori obw’aa.”

37Erio Pilato akamoboria, “Aye nomoruoti rende?”

Yeso akairaneria, “Aye gwatebete ng’a inche nomoruoti. Inche nigo naiboretwe ase engencho y’aya, na ase engencho y’aya, ngacha ase ense, erinde imbe kirori ase ekeene. Kera oyore oyo bw’ekeene nigo akoigwa eriogi riane.”

38Pilato akamoboria, “Ekeene ngento ki?”

Gakwanire ring’ana eri agachiera Abayahudi isiko eria kabere, akabatebia, “Inche tindochi bobe bonde asare. 39Korende inwe more nengencho ng’a nabasiborera omonto oyomo ase ekero ki’Epasaka; nabo morigetie mbasiborere Omoruoti bw’Abayahudi?”

40Erio bagaaka eriogi naende, bakabora, “Tari oyo, korende Baraba!” Baraba ere nigo arenge omouri.

Currently Selected:

YOHANA 18: EKEGUSIIBBLE

Highlight

Copy