OMOCHANKO 40
40
Chindoto chi’abasibwa babere
1Ekaba nyuma y’amang’ana ayio, omoteneneri bw’ebinyugwa bia Farao na omoteneneri oye bw’abaroisia emegati bakamochera omonene obo, omoruoti o Misiri. 2Ase igo Farao akabea abateneneri abwo babere, omoteneneri bw’ebinyugwa na omoteneneri bw’abaroisia emegati. 3Akababeka barendwe ase enyomba yomotang’ani bw’abarendi, ase echela eyio Yusufu nere asibetwe. 4Omotang’ani bw’abarendi akabeka Yusufu abe okobarigereria na kobakorera, na barabwo bakabeera ase egesibo ase engaki enke.
5Ase obotuko obomo bonsi babere, omoteneneri oria bw’ebinyugwa na omoteneneri bw’abaroisia emegati b’omoruoti o Misiri, abwo basibetwe echela, bakaba bakorota chindoto. Kera oyomo akarota okorota kwaye okware nengencho eng’ao korwa ase okw’oyonde. 6Ekero Yusufu agendete mambia kobarigereria akabanyora nigo baichanete. 7Ase igo akaboria abateneneri abwo ba Farao, abarenge amo nere ase egesibo ase enyomba y’omonene oye, akabora, “Naki moichanete iga rero?”
8Barabwo bakamoiraneria, “Nigo twarotete chindoto, na onde tari oranyare gototebia engencho ye chindoto chiaito.”
Yusufu akabatebia, “Nigoro ya Nyasae kobatebia engencho yaye. Komoranche, mochintebie.”
9Omoteneneri bw’ebinyugwa agatebia Yusufu okorota kwaye, akabora, “Ase okorota kwane nigo naroche omosabibu ore ase obosio bwane, 10na omosabibu oyio nigo orenge ne chinsagia isato; bwango ogasomoria, ogasokia ebisicha, na okaama ebisago bi’amasabibu amatobu. 11Na egekombe kia Farao nigo nakebwate ase okoboko kwane; nkabogoria amasabibu aria, nkayamitera ase egekombe kia Farao, nkaa Farao egekombe eke koboko kwaye.”
12Yusufu akamotebia, “Engencho y’okorota okwo nero eye: Chinsagia echio isato, ayio namatuko atato. 13Nyuma y’amatuko atato Farao nakorusie aiga, akoe ogosika, akoiranie ase emeremo yao, na aye nobe gokomoa egekombe koboko kwaye, buna kware komoa agwo ritang’ani, ekero kwarenge omoteneneri bw’ebinyugwa biaye. 14Korende ekero oranyore amaya, ong’inyore nainche, ondorere amabera. Koranche nagosabire onyatore ase Farao, ondusie ase enyomba eye, 15ekiagera nigo naibetwe korwa ase ense y’Abaibirania, nonya naa tinkoreti ing’ana rinde riibe riagwenerete kombeka ase echela.”
16Ekero omoteneneri bw’abaroisia emegati aroche ng’a okoonchora okwo nigo kwabete okuya, agatebia Yusufu, “Nainche boigo nigo narotete. Nkarora ng’a inyetwegete chinteru isato chire nemegati emerabu ase omotwe one. 17Ase oroteru rwa igoro kegima yarengeo emegati y’ebisaku ao ao yaroiseretigwe Farao, korende chinyoni chigacha chikayeria korwa ase oroteru igoro, oro netwegete ase omotwe one.”
18Na Yusufu akamoiraneria, “Engencho y’okorota okwo nero eye: Chinteru echio isato, ayio namatuko atato. 19Nyuma y’amatuko atato Farao nakoimokie, agosunge ase omote igoro ne chinyoni nachirie chinyama chi’omobere oo.”
20Rituko ria gatato, erio riaare ri’okoinyora okoiborwa gwa Farao, ere agakorera abasomba baye bonsi omoyega, akabarusia echela baria babere, omoteneneri bw’ebinyugwa na omoteneneri bw’abaroisia emegati, ase egati y’abasomba baye. 21Akairania omoteneneri bw’ebinyugwa ase emeremo yaye y’obonyoisia, na ere akaba okomoa Farao egekombe ase okoboko kwaye; 22korende omoteneneri bw’abaroisia emegati ere akamosunga ase omote igoro, buna Yusufu abanorete chingencho chie chindoto chiabo. 23Nonya nabo oyio omoteneneri bw’ebinyugwa taba okoinyora Yusufu, korende akamweba.
Currently Selected:
OMOCHANKO 40: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
