OMOCHANKO 37
37
Chindoto chia Yusufu
1Yakobo akaba okomenya ase ense eyio ise amenyete buna omomenyi, ense y’Abakanani. 2Oyo noro omogano bw’ororeria rwa Yakobo.
Yusufu, ekero konya abeire nemiaka ikomi, na etano na ebere, nigo arenge korisia amaicho amo na bamura bamwabo. Omosae oyio akaba ore amo nabamura bamwabo, abana ba Bilia na Silpa, abakungu ba ise. Yusufu akaba okorentera ise amang’ana igoro y’ogokora kwabo okobe.
3Bono Israeli nigo anchete Yusufu kobua abana baye bande bonsi, ekiagera nigo arenge omwana oye bw’obogotu. Akamoroiseria eanga engiya entambe. 4Abamwabo ekero baroche ng’a ise nigo amwanchete ere kobua abamwabo bonsi, barabwo bakamogecha, tibare gokwana amang’ana amaya nere.
5Yusufu akarota chindoto, na ekero atebetie abamwabo chindoto echio, barabwo bakamenta mono komogecha. 6Akabatebia, “Montegerere, moigwe okorota oko narotete. 7Nkarora ng’a intwe nigo twarenge mogondo tokoboa emesaima y’endagera, na omosaima one okaimoka ogatenena boronge, na emesaima yaino ekaba ekoyoetanana, egotung’ama inse ase omosaima one.”
8Abamwabo bakamoboria, “Inee! Aye nigo orengereretie ng’a nigo orabe omogambi oito, otogambere?” Ase igo barabwo bakamenta komogecha mono ase engencho y’okorota kwaye, na ase engencho y’amang’ana aye.
9Naende akarota okorota konde, na okwo agatebia abamwabo, akabora, “Moigwe! Inche nigo narotete okorota konde. Nkarora erioba, na omotienyi, ne ching’enang’eni ikomi nemo chigotung’ama inse ase obosio bwane.”
10Korende ekero atebetie ise na bamura bamwabo amang’ana ayio, ise akamotogonyera, akamoboria, “Nkorota ki okwo okorota? Inee! Inche na nyoko, na bamura bamino, amaene, nigo torache togotung’amere togosasime aye?” 11Abamwabo bakamobwaterwa ribero, korende ise ere akagacha ogokwana okwo ase enkoro yaye, takweba.
Yusufu okoonigwa nabamwabo na koirwa Misiri
12Erio abamwabo bakagenda korisia amaicho a ise ang’e na Sekemu. 13Na Israeli akarangeria Yusufu, akamotebia, “Inee! Abamino tibakari korisia amaicho aaria Sekemu? Inchuo ngotome gochia ase bakare.”
Ere akamoitabera, “Nao inde aa.”
14Ise akamotebia, “Genda bono orore gose abamino mbuya bare amo namaicho, na ondetere amang’ana.” Ase igo akamotoma korwa ase omweya o Heburoni, akagenda agaika Sekemu. 15Omonto oyomo akamonyora, ekero arenge kona‐goetanana ase erooro, na omonto oyio akamoboria, “Inki okorigia?”
16Akamoiraneria, “Nabaminto nkorigia; koranche ontebie aase bakorisia amaicho.”
17Omonto oria akamotebia, “Barure aa, bachiire, naki nigo nabaigwa bagotebania: Tiga togende Dotani.” Erio Yusufu akababwatia korwa nyuma, akabanyora Dotani.
18Barabwo bakamorora ere okare egeka, ritang’ani konya ataraika ang’e asebare, bakagamba buna bamoite. 19Barabwo bagatebania, “Omonyandoto oyio ogocha. 20Bono ntore ne ribaga; tiga tomoite, tomorute ase engoro eyemo ye chingoro chire aa, erio totebe ng’a neng’iti y’orosana yamoriete, na torore chindoto echio chiaye buna chirabe.”
21Reuben ekero ayaigwete, akarigia komotooria korwa ase amaboko abo, akabatebia, “Titomoita akwe.” 22Naende akabatebia, “Timoitera amanyinga aye; morute ase engoro eyemo y’echi chire aa ase erooro, korende timorambora amaboko aino gochia asare ase okomoita.” Ere nigo abatebetie igo, erinde anyare komotooria korwa ase amaboko abo, amoiranie ase ise. 23Ekaba ekero Yusufu achia goika ase abamwabo, barabwo bakamorusia eanga eria engiya entambe abegete, 24bakamobwata, bakamoruta engoro ime. Engoro eyio nigo yarenge bosa, mache tarengeo.
25Erio bagaikaransa inse koragera; bagachia koimokia amaiso abo korigereria, bakarora omoganda bw’Abaisumaeli ogocha korwa Gileadi. Barabwo nigo baare ne chingamia chiabo, chibogoretie ubani, na amaguta akogwenia, na manemane, ase orogendo rwabo baare kogenda Misiri. 26Agwo Yuda agatebia abamwabo, “Inki eratogwenere toite oyominto na kobisa ogokwa kwaye? 27Tiga tomoonie ase Abaisumaeli aba, erinde titobaisa komoita namaboko aito, ekiagera noyominto, toiboire komo.” Na abamwabo bagancherana nere. 28Erio Abamidiani bagaeta aroro, baare gokora oboonchoreria; abamwabo bakarusia Yusufu korwa ase engoro eria, na komooneria Abaisumaeli ase chisekeli chie chifeta emerongo ebere; barabwo bakamoira goika Misiri.
29Reuben agachia koirana korigereria ase engoro, akanyora Yusufu taiyo ase engoro, ere agatandora chianga chiaye, 30akeonchora gochia ase abamwabo, akabatebia, “Omwana timonyoreti ase engoro. Ng’ai rende nkogenda?”
31Erio bakaimokia eanga ya Yusufu, na bakanyenya embori, bakaimokia eanga eria, bakayetobeka ase amanyinga; 32bakagenda nero eanga eria entambe bakayeirera ise, bakamotebia, “Yemanye eanga eye gose ney’omwana oo gose tari ero.”
33Yakobo akayemanya, akabora, “Neanga y’omwana one, amaene neching’iti chi’orosana chiamoitire; Yusufu orirwe.” 34Erio Yakobo agatandora chianga chiaye, akeboyia chigunia kenema kiaye, akaba okomoreera omwana oye engaki entambe. 35Abana baye, abamura na abaiseke bonsi, bakaimoka gochia komoremia, korende akaanga, taremigwa, agateba, “Yaya, goika inkwe, ngende inse ase oboina nkona‐komoreera omwana one.” Ise akaba okona‐kweumia.
36Na Abamidiani baria bakamoonia aaria Misiri ase Potifari, omoteneneri bw’enka ya Farao na omotang’ani bw’abarendi baye bande.
Currently Selected:
OMOCHANKO 37: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
