OMOCHANKO 36
36
Ororeria rwa Esau
1Oyo noro omoroberio bw’ororeria rwa Esau, nere Edomu. 2Esau akanyuoma abakungu baye korwa ase Abakanani: Ada, omoiseke o Eloni, Omohiti, na Oholibama, omoiseke o Ana, mosinto o Sibeoni, Omohivi, 3na Basemati, omoiseke o Isumaeli, omoiseke omwabo Nebayoti, 4Ada akaiborera Esau Elifasi, na Basemati akaibora Reueli, 5na Oholibama akaibora Yeusi, na Yalamu, na Kora. Aba nabwo abana abamura Esau aiboreretwe ase ense ya Kanani.
6Erio Esau akaimokia abakungu baye, na abamura na abaiseke baye, na abanto bonsi ababwate bwoye, ne chiombe chiaye, ne ching’iti chiaye chionsi echi atugete, na enibo yaye yonsi eyaniberete ase ense ya Kanani; akagenda agaika ase ense ere aare korwa ase Yakobo omwabo. 7Ekiagera babwate enibo enyinge tibare konyara komenya amo; na ense eria tiyare kobaisana bamenye babere bonsi ne chitugo chiabo. 8Ase igo Esau, oyokorokwa naende Edomu, akaba okomenya ase ense y’ebitunwa bia Seiri.
9Oyo noro omoroberio bw’ororeria rwa Esau sokoro bw’Abaedomu, ase ense y’ebitunwa bia Seiri. 10Aya naro amarieta a basinto b’Esau: Elifasi, omomura o Ada moga Esau, na Reueli, omomura o Basemati moga Esau. 11Na basinto b’Elifasi nabwo aba: Temani na Omari, na Sefo, na Gatamu, na Kenasi. 12Timuna nigo arenge omokungu o sere‐sere o Elifasi, mosinto bw’Esau. Ere akaiborera Elifasi Amaleki. Aba nabwo barenge abachokoro abamura b’Ada moga Esau. 13Aba nabwo basinto ba Reueli: Nahati, na Zera, na Sama, na Miza. Aba nabwo barenge abachokoro abamura ba Basemati, moga Esau.
14Na abana aba nabwo abamura ba Oholibama, moga Esau mosubati o Ana, mosinto o Sibeoni: Ere akaiborera Esau Yeusi, na Yalamu, na Kora.
15Aba nabwo barenge abagambi korwa ase ororeria rw’Esau. Basinto b’Elifasi, omomura omotangi bw’Esau, nabwo aba: Omogambi Temani, na omogambi Omari, na omogambi Sefo, na omogambi Kenasi, 16na omogambi Kora, na omogambi Gatamu, na omogambi Amaleki. Aba nabwo barenge abagambi korwa ase ororeria rw’Elifasi, ase ense y’Edomu. Barabwo nabachokoro abamura b’Ada.
17Naba nabwo basinto ba Reueli, mosinto bw’Esau: Omogambi Nahati, na omogambi Zera, na omogambi Sama, na omogambi Miza. Aba nabwo barenge abagambi korwa ase ororeria rwa Reueli ase ense y’Edomu. Aba nabwo abachokoro abamura ba Basemati, moga Esau.
18Naba nabwo abamura b’Oholibama, moga Esau: Omogambi Yeusi, na omogambi Yalamu, na omogambi Kora. Aba nabwo abagambi baiboretwe na Oholibama, mosubati o Ana moga Esau. 19Aba nabwo basinto b’Esau, nere Edomu; naba nabwo abagambi babo.
Ororeria rwa Seiri
20Aba nabwo basinto ba Seiri Omohori, ababiare b’ense eria: Lotani, na Sobali, na Sibeoni, na Ana, 21na Disoni, na Eseri, na Disani. Aba nabwo barenge abagambi b’Abahori, basinto ba Seiri, ase ense y’Edomu. 22Na basinto ba Lotani nabwo Hori na Hemamu, na mosubati omwabo Lotani nigo arenge korokwa Timuna.
23Naba nabwo basinto ba Sobali: Alivani, na Manahati, na Sefo, na Onamu.
24Naba nabwo basinto ba Sibeoni: Aya na Ana. Ana oyo nere onyorete chinsoko chi’amache are morero, ase erooro, ekero arenge korisia chitigere chia Sibeoni ise. 25Na mosinto o Ana nere Disoni, na omoiseke o Ana nere Oholibama.
26Naba nabwo basinto ba Disoni: Hemudani, na Esibani, na Itirani, na Kerani.
27Naba nabwo basinto b’Eseri: Bilihani, na Sawani, na Akani.
28Na basinto ba Disani nabwo Usi na Arani.
29Na abagambi barwete ase Abahori nabwo aba: Omogambi Lotani, na omogambi Sobali, na omogambi Sibeoni, na omogambi Ana, 30na omogambi Disoni, na omogambi Eseri, na omogambi Disani. Aba nabwo abagambi b’Abahori, koreng’ana nebisaku biabo, ase ense ya Seiri.
Abaruoti b’Edomu
31Na abaruoti abagamberete ense y’Edomu ritang’ani moruoti onde bwensi ataragambera Abaisraeli nabwo aba: 32Bela, mosinto o Beori, akaba okogamba ase ense y’Edomu, na omochie oye nigo ore korokwa Dinihaba. 33Bela agakwa, na Yobabu mosinto o Zera, oyo orwete Bosira, akaba okogamba ase ribaga riaye. 34Yobabu nere agakwa, na Husamu bw’ense y’Abatemani akaba okogamba ase ribaga riaye. 35Husamu nere agakwa, na Hadadi, mosinto o Bedadi, akaba okogamba ase ribaga riaye; oyo nere obuete Abamidiani, ase ense ya Moabu na omochie oye nigo ore korokwa Aviti. 36Hadadi nere agakwa, na Samula, oyo orwete Masereka, akaba okogamba ase ribaga riaye. 37Samula nere agakwa, na Sauli, oyo orwete Rehoboti, omochie orenge orooche ensemo, akaba okogamba ase ribaga riaye. 38Sauli nere agakwa, na Baali‐Hanani mosinto o Akibori akaba okogamba ase ribaga riaye. 39Baali‐Hanani, mosinto o Akibori, nere agakwa, na Hadari akaba ogokamba ase ribaga riaye, na omochie oye nigo ore korokwa Pau, na mokaye nigo arenge korokwa Mehetabeli, mosubati o Matiredi, mosubati o Mesahabu.
40Aya naro amarieta ’abagambi barwete ase ororeria rwa Esau, gotunyana chiamate chiabo, na aase bamenyete nigo are namarieta abo: Omogambi Timuna, na omogambi Aliva, na omogambi Yeteti, 41na omogambi Oholibama, na omogambi Ela, na omogambi Pinoni, 42na omogambi Kenasi, na omogambi Temani, na omogambi Mibusari, 43na omogambi Magadieli, na omogambi Iramu. Aba nabwo abagambi barwete ase ororeria rw’Edomu, koreng’ana buna bamenyete chinsemo chiabo ase ense eria bairete ekaba eyabo. (Esau nere sokoro bw’Abaedomu).
Currently Selected:
OMOCHANKO 36: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
