OMOCHANKO 33
33
Yakobo okoumerana na Esau
1Yakobo akaimokia amaiso aye, akarigereria, akarora Esau ogocha amo nabanto amagana ane. Erio agaatanana abana, akaa kera omokungu abaye, Lea, na Raeli, na abakungu baria babere abasomba. 2Akabeka abakungu baria abasomba amo nabana babo batang’ane, na Lea amo nabana baye korwa nyuma yabo, na Raeli na Yusufu akababeka nyuma kegima. 3Ere omonyene agatang’ana bosio bwabo, akaba okona‐gotung’ama inse chintunda isano na ibere goika agaika ase oyomwabo.
4Esau akaminyoka gochia komorotota, akamoboania rigoti riaye, na komonyunyunta, barabwo bakarererana. 5Ekero Esau achia koimokia amaiso aye, akarora abakungu na abana, akamoboria, “Aba naba ng’o more komo?”
Yakobo akamoiraneria, “Aba nabana Nyasae ang’eire inche, omosomba oo, ase obuya bwaye.” 6Erio abakungu baria abasomba bagasuka gochia ang’e, kera oyomo nabana baye, bagatung’ama inse. 7Lea nere boigo agasuka gochia ang’e amo nabana baye, nabarabwo bagatung’ama inse. Nyuma kegima Yusufu na Raeli bagasuka gochia ang’e, nabarabwo boigo bagatung’ama inse.
8Naende Esau akamoboria, “Emeganda eye yonsi twaumerana gochia aa, neya ki?”
Yakobo akamoiraneria, “Engencho yaye inyore ogwancherwa ase obosio bwao, aye omonene one.”
9Esau akamoiraneria, “Oyominto, echi mbwate nching’isaine. Echire echiao, kabe nachirochio.”
10Korende Yakobo akamotebia, “Taibo, onye nanyorire ogwancherwa ase obosio bwao, koranche obwate ekeegwa eke korwa ase okoboko kwane; naki okorora obosio bwao nigo enga buna okorora obosio bwa Nyasae, ase ogwanchera kwanyancheire inche. 11Koranche oire ebiegwa ebi nakorenteire, ekiagera Nyasae onkoreire obuya obonge, na inche nimbwate ebing’isaine.” Naboigo ere akaebereria Esau na ere agancha, akabiira.
12Erio Esau akamotebia, “Eta, togende seito, na inche ningotang’ane.”
13Korende Yakobo akamoiraneria, “Omonene one, nomanyete ng’a abana nebing’werere mbwate, naende chimbori ne ching’ondi nigo chibwate chimanwa chikogonka, ne chiombe boigo. Ching’iti echio chiise koayererigwa ase rituko erimo, nigo chirakwe chionsi. 14Koranche, omonene one, oete otang’ane bosio bwane, inche omosomba oo; na inche nindaae ching’iti echio ng’ora ng’ora, buna orogendo rwabo rong’ana, na abana buna chinguru chiabo ching’ana, goika ng’ike bwoo, omonene one, aaria Seiri.”
15Erio Esau akamotebia, “Ningotigere abanto bande ase aba inde nabwo.”
Korende Yakobo akairaneria, “Bakore ki? Otatiga ndore ng’a nanyorire ogwancherwa ase obosio bwao, omonene one.” 16Ase rituko erio erio Esau akabwatia enchera, akairana gochia Seiri. 17Korende Yakobo akagenderera, agaika Sukoti, akeagachera enyomba, akaagachera na amaicho aye ebigutu. Ase igo aase aria akarokwa Sukoti.
18Yakobo kairanire korwa Padan‐Aramu, agaika buya ase omorembe ase Sekemu, omochie omonene bw’ense ya Kanani, agatenenia eema yaye isiko y’omochie oyio. 19Korwa ase basinto ba Hamori, ise Sekemu, Yakobo akagora oboremo obwo ase rigori rie chifeta rigana erimo, agwo ase atenenetie eema yaye. 20Akaagacha agwo egesasimero, agakeroka Eli‐Elohe‐Israeli.
Currently Selected:
OMOCHANKO 33: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
