OMOCHANKO 34
34
Sekemu ogosaria Dina
1Dina, omoiseke o Lea, oyio Lea aiborerete Yakobo, akagenda kororana nabaiseke b’ense eria. 2Ekero Sekemu, omwana o Hamori Omohivi, omonene bw’ense eria, amoroche, akamobwata, akarara nere, akamosareria obwekungi bwaye. 3Korende nyuma y’ayio agakorera Dina, omoiseke oyio o Yakobo, buya, akamwancha na gokwana nere amang’ana amaya. 4Sekemu agakwana na Hamori ise, akamotebia, “Mborerie omoiseke oyo abe mokane!”
5Ekero Yakobo achia koigwa ng’a Sekemu osaririe Dina, omoiseke oye, abana baye ngetii barenge korisia, ase igo Yakobo agakira‐kiri goika bakairana inka. 6Hamori, ise Sekemu, akaimoka akagenda o Yakobo gokwana nere. 7Abamura ba Yakobo, ekero bachia koigwa ayio, bagacha korwa getii, bakaigwa obororo, bakaba nekeririanda ekenene mono, ekiagera Sekemu akorete obokayayu ase Abaisraeli ase okorara nomoiseke o Yakobo, ring’ana ritagwenerete gokoreka.
8Hamori agakwana nabarabwo, akabora, “Omomura one Sekemu omwanchire omoiseke oino, komoranche amonyuome. 9Tonyuomerane intwe nainwe, motoe abaiseke baino, naintwe tobae abaito. 10Inwe nabo moramenye egati yaito, aiga ase ense yaito ribaga ndireo asemore, moramenye na koonchoreria, mwenyorere enibo.” 11Sekemu agatebia ise Dina na bamura bamwabo, “Nyanchere aya naboria asemore, kende gionsi moramborie nindue. 12Mborie enibo ende yonsi na ebiegwa boigo, nimbae buna moraganie, kogicha mong’e omoiseke oyo abe mokane.”
13Erio abamura ba Yakobo bakairaneria Sekemu na Hamori ise ase okong’ainereria, ekiagera konya osaririe Dina, omoiseke omwabo. 14Bakairaneria, “Titokonyara gokora ring’ana eri, komoa omonto otarogeti, omoiseke ominto, ekiagera ayio nigo arabe obosooku asetore. 15Natonyare gwancha okoboria kwaino ase ring’ana erimo rioka, nario eri: Komoranche mobe buna intwe, kera omonto omosacha ore asemore arokigwe. 16Erio natobae abaiseke baito, na intwe toire abaino, tomenye amo, tobe abanto abamo. 17Korende motancheti mwarokigwe, rirorio nigo torarusie omoiseke ominto aa, togende nere.”
18Amang’ana abo akagwenera Hamori na omomura oye Sekemu. 19Omomura oyio tatebana gokora ring’ana riria, ekiagera omoiseke oria o Yakobo konya omogweneire. Bono Sekemu nigo asikire kobua abande bonsi ase eamate yabo.
20Ase igo Hamori na Sekemu, omomura oye, bakagenda ase egeita ki’omochie obo, bagakwana nabanto babo, bakabatebia, 21“Abanto aba babeire abasani baito, tiga bamenye ase ense yaito, babe abaonchoreria, ekiagera ense eye nenene, nebaisaine. Intwe tonyuome abaiseke babo, na barabwo banyuome abaito. 22Barabwo banchire komenya seito babe obomo naintwe, korende mbaganetie tokore ring’ana erimo, nario eri, ng’a kera omosacha ore asetore arokigwe buna barabwo barogete. 23Amaicho abo, na enibo yabo, na etugo yabo yonsi, Inee, tibikoba ebiaito? Tiga twancherane nabarabwo rioka, bamenye aa seito.” 24Abanto bonsi abamenyete ase omochie oria, bakaigwera Hamori na omomura oye Sekemu, na kera omosacha oyomenyeteo akaarokigwa.
Abamura ba Yakobo bagoakana abanto ba Sekemu egesiomba
25Ase rituko ria gatato ekero abwo barogete barenge koromwa mono, abamura babere ba Yakobo, Simeoni na Lawi, bamura ba ng’ina omo na Dina, bakaimoka nemeyio ya birende, bagasoa ase omochie ime mobosokano, bagaita abasacha bonsi abarengeo. 26Bagaita Hamori amo nomomura oye nemeyio ya birende, bakarusia Dina omwabo mwa Sekemu, bakagenda nere. 27Erio abamura bande ba Yakobo bagachiera abwo baitetwe na bagasakora omochie, ekiagera konya basaririe omoiseke omwabo; 28bakaira ching’ondi, ne chiombe, ne chitigere, na bionsi ebiarenge ase omochie ime, na bionsi ebiarenge ase emegondo boigo. 29Bagasakora enibo yabo yonsi, na abana babo, na abakungu babo, na bionsi ebiarenge ase chinyomba bakabiira. 30Erio Yakobo agatebia Simeoni na Lawi, “Inwe mwambekire ase emechando, mwankorire ntioke bobe egati y’abanto b’ebisaku bi’ense eye, Abakanani na Abaperisi. Inche na abanto baane nabake tore; barabwo baise gosangererekana na kong’umokera nigo barang’ite na gonsiria amo nabanto baane.”
31Korende barabwo bakamoiraneria, “Inee! Nabo barabwo bagwenerete bakorere omoiseke ominto buna omokungu omotayayi?”
Currently Selected:
OMOCHANKO 34: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
