OMOCHANKO 32
32
Yakobo okoimoka kogenda koumerana na Esau
1Erio Yakobo akagenderera norogendo rwaye, bakaumerana nabamalaika ba Nyasae. 2Na ekero Yakobo abaroche akabora, “Oyo nomoganda o Nyasae!” Ase igo akaroka aase aria Mahanaimu#32:2 Mahanaimu, engencho yaye: ebitwori bibere.
3Yakobo agatoma abatomwa batang’ane kogenda ase Esau omwabo, baike ensemo ya Seiri, ase ense y’Edomu. 4Akabachika batebie Esau omonene oye iga, “Aya naro Yakobo, omosomba oo, agokwana: Nabeire nkomenya ase ense y’obogeni, ense ya Labani goika rero iga; 5nanyorire chiombe, ne chitigere, ne ching’ondi, na abasomba, abamura na abaiseke. Na bono, omonene one, nigo natomire abanto nkomanyie amang’ana ayio, inyore ogwancherwa ase obosio bwao.”
6Abatomwa baria, ekero bairanete ase Yakobo bakamotebia, “Ntwaika o momura omino Esau, ere ngocha are gokorotota ore nabanto amagana ane.” 7Erio Yakobo akaondoka mono na koumata, agaatanana abanto baria barenge amo nere, ne ching’ondi, ne chiombe, ne chingamia, bikaba ebiombe bibere, 8akarengereria ng’a, “Esau karache aumokere ekeombe kie ritang’ani na kogesiria, keria kende nagetooreke.”
9Erio Yakobo agasaba, akabora, “Aye Nyasae o sokoro yane Ibrahimu, Nyasae o Isaka tata, aye Omonene, gwantebetie ng’a: Oirane gochia seino, na eamate yao, na inche ningokorere amaya. 10Inche tingwenereti nonya ng’ake obuya na obwegenwa bwonsi gwankorerete inche, omosomba oo, naki engaki naambogete orooche rwa Yorodan nigo nabwate enyimbo yoka koboko kwane, na bono nabeire ebiombe bibere. 11Koranche ontoorie bono korwa ase okoboko kw’oyominto Esau, ekiagera nairokire ng’a nabaise kong’ita, aite na abakungu na abana. 12Korende aye ngwantebetie: Ningokorere amaya, ninkore ororeria rwao robe buna omokenye o nyancha, otanyare kobareka, ekiagera nomonge.”
13Erio Yakobo akarara aroro ase obotuko obwo; agachora korwa ase etugo eria abwate, echio aranyare koa Esau omwabo ebiegwa. 14Agachora chimbori chiaberi amagana abere, ne chigoree emerongo ebere, ne ching’ondi chiaberi amagana abere, ne chimingichi emerongo ebere, 15ne chingamia chiare gokamwa emerongo etato, amo ne chimori chiabo, ne chiombe chiaberi emerongo ene, ne chintang’ana ikomi, ne chitigere chiaberi emerongo ebere, ne chitigere chinsacha ikomi. 16Akabeka ching’iti echio ase amaboko ’abasomba baye, kera riicho akaribeka ao, agatebia abasomba baye, “Eta motang’ane, na egati ya kera riicho motige ribaga.” 17Agachika omosomba oria bwe ritang’ani, akamotebia, “Esau ominto, ekero araumerane naye, na gokoboria: Noyo ng’o ore? Ng’ai ogochia? Etugo eye otang’anetie, neya ng’o? 18Erio omoiranerie, omotebie: Ney’omosomba oo Yakobo, nekeegwa akorenteire aye omonene one Esau; ere omonyene ngotobwatia are korwa nyuma,” 19Agachika naende oyo o kabere, na oyo o gatato, na abande bonsi abaare gotunyana amaicho, akabatebia, “Motebie Esau amang’ana ayio ayio ekero mokoumerana nere. 20Naende momotebie: Omosomba oo Yakobo ngotobwatia are korwa nyuma.” Ere nigo arengereretie ng’a, “Nimwororobie nebiegwa ebi namotang’aneirie; nyuma yaye nindore obosio bwaye, aande nanyanchere.” 21Naboigo ebiegwa biria bigatang’anigwa gochia bosio bwaye, ere omonyene akarara obotuko obwo aase aria atenenetie eema yaye.
Yakobo ogokinana na Nyasae, naende okorokwa Israeli
22Ase obotuko obwo Yakobo akaimoka, akaira abakungu baye babere, na abasomba baye babere abakungu, na abana baye ikomi nomo, akaamboka orooche rwa Yaboki. 23Akabaimokia, akabaambokia orooche, akaambokia na bionsi ebi arenge nabio. 24Yakobo agatigara ere bweka.
Erio omonto oyomo agacha bagakinana nere, goika bogakiamoka. 25Nere omonto oria, ekero arora ng’a tari kobua Yakobo, akamokuna enengo y’ebachwa, akamoteng’eria, kobagendererete gokinana. 26Erio akamotebia, “Ntige ngende, ekiagera bwakiire.”
Korende Yakobo akamotebia, “Tingokoa ribaga ogende, otaransesenia.”
27Akamoboria, “Naki okorokwa?”
Akamoiraneria, “Yakobo.”
28Erio akamotebia, “Bono tokorokwa naende Yakobo, nigo orarokwe Israeli#32:28 Israeli, engencho yaye: ogokinana na Nyasae, ekiagera mwakinanire na Nyasae na abanto, na aye kwabuire.”
29Yakobo akamoboria, “Koranche, ontebie erieta riao.”
Korende akamotebia, “Nase ki okomboria erieta riane?” Agwo akamosesenia.
30Yakobo akaroka aase aria Penieli#32:30 Penieli, engencho yaye: obosio bwa Nyasae, naki nigo atebete, “Naroranire na Nyasae obosio ase obosio, na obogima bwane bwatoorigwe.” 31Erioba rikaorokera Yakobo kagoeta Penueli, akaba ogosegora, ekiagera ateng’eretigwe enengo y’ebachwa. 32Ase ayio Abaisraeli tibari koria omoki bw’enengo y’ebachwa goika rero iga, ekiagera omonto oria namoteng’eretie Yakobo omoki bw’enengo y’ebachwa yaye.
Currently Selected:
OMOCHANKO 32: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
