OMOCHANKO 31
31
Yakobo ogotama korwa o Labani
1Bono Yakobo akaigwa aya basinto ba Labani bagoteba ng’a, “Yakobo oirire enibo yonsi ya tata; na ase enibo ya tata onyorire obotenenku obwo bwonsi abwate.” 2Yakobo akarora ng’a Labani oonchokire, tari komorigereria buya buna botambe. 3Erio Omonene agakwana na Yakobo, akamotebia, “Irana gochia ase ense ye chisokoro chiao, ase eamate yao, na inche nimbe amo naye.”
4Ase igo Yakobo agatoma abanto barangerie Raeli na Lea bagende getii ase are korisia amaicho aye. 5Agwo akabatebia, “Narorire ng’a iso tari kondigereria buya rero buna botambe. Korende Nyasae o tata obeire ore amo nainche. 6Inwe momanyete ng’a nabeire ngokorera iso ne chinguru chiane chionsi; 7nonya nabo, iso obeire okong’ainereria, na koonchora eng’eria yane ara ikomi, korende Nyasae tamoete ribaga gonkorera bobe. 8Ekero atebete: Echire nebisembe chibe eng’eria yao, amaicho onsi akabiara echire nebisembe, na ekero atebete: Echire namagwari chibe eng’eria yao, amaicho onsi akabiara echire namagwari. 9Naboigo Nyasae akarusia etugo ya iso, akang’a inche.
10“Ase engaki eria amaicho gachiire rieme nkarigereria, nkarora ase chindoto ng’a chigoree echiaete amaicho amarieme nigo chiare namagwari na ebisembe, ne chimechege. 11Erio omomalaika bw’Omonene akandangeria ase chindoto: Yakobo! Inche ngaitaba: Nao inde aa! 12Agantebia: Imokia amaiso ao, origererie orore, ng’a chigoree echiaete amaicho amarieme nigo chiare namagwari, na ebisembe, ne chimechege, naki narorire onsi aya Labani abeire okogokorera. 13Inche ninche Nyasae oria kwaroche aria Beteli, aria ase kwaumorerete rigena amaguta rikaba esiiro y’ekeinyorio, na okandiera eira. Bono imoka korwa ase ense eye, oirane gochia ase ense eria kwaiboreretwe.”
14Erio Raeli na Lea bakamoiraneria, “Inee! Ntwatigaretie egetari gose omwando ase omochie o tata? 15Tatokorete buna abamenyi? Naki nigo atoonetie, naende akaria enibo eria yonsi. 16Naki enibo eyio yonsi Nyasae arusirie korwa ase tata nigo etotungetie intwe na abana baito. Ase igo ayio onsi Nyasae agotebirie, yakore.”
17Erio Yakobo akaimoka, akariinia abana baye na abakungu baye ase chingamia igoro; 18akaira amaicho aye onsi, na enibo yaye yonsi eyio anyorete ase Padan‐Aramu, akagenda ase ense ya Kanani o Isaka ise. 19Ekero Labani konya achiire konacha ching’ondi chiaye amarionya, Raeli akaiba ebinyasae biaye bi’ogosasimwa, ebiarenge nyomba mwaye. 20Yakobo nigo agendete bobisi korwa o Labani Omoaramu, tamotebetie ng’a nkogenda are sobo. 21Agatama amo nenibo yaye yonsi eye abwate, akaamboka orooche roria Eufarati, akagenda gochia ebitunwa bia Gileadi.
Labani okobwatia Yakobo
22Ase rituko ria gatato Labani agatebigwa ng’a Yakobo otamire. 23Erio Labani akaira abamwabo, bakamobwatia orogendo rw’amatuko atano na abere, akamoikeera ase ebitunwa bia Gileadi. 24Korende Nyasae agachera Labani Omoaramu ase chindoto botuko, akamotebia, “Bwerende, tobaisa kwomania Yakobo, korende okwane nere ase obwororo.”
25Ekero Labani aikeereire Yakobo ang’e, Yakobo nere konya otenenirie eema yaye agwo ase ebitunwa bia Gileadi. Labani nere amo nabamwabo bagatenenia chiema chiabo agwo.
26Labani akaboria Yakobo, “Inki eke gwakorire iga, okweiberia na koira abana baane abasubati buna abasakorwa korwa ase esegi? 27Nase ki gwatamete okeiberia, tigwantebia? Inche anga nagokoobete nomochengo na amatera, na kobugia chikonu na amakano. 28Naki otantigerete ribaga inyunyunte abachokoro baane na abana baane abasubati, mbatebie ng’a bagende buya? Amaene, nigo gwankorerete egento ki’oboriri. 29Ninde nokobua gw’okogokorera amabe, korende Nyasae o iso nakwanete nainche ase obotuko bwaetete, agantebia: Bwerende, tobaisa kwomania Yakobo, korende okwane nere ase obwororo. 30Na bono gwachiire, ekiagera ore namaiga amange ay’aba inka seino, korende naki gwakorete okaiba ebinyasae biane?”
31Yakobo akamoiraneria, akamotebia, “Nigo nobcete, nkarengereria ng’a nobaise kong’ura abana bao abasubati. 32Onde bwensi oranyore obwate ebinyasae biao goika aitwe akwe. Tiga abaminto aba bare aa babe kirori. Rigia! Koranyore kende kiao kere asende, okeire.” Yakobo tamanyete ng’a Raeli obiibire.
33Erio Labani agasoa eema ya Yakobo, na eya Lea, na ey’abakungu baria babere abasomba, tanyora kende. Agasoka korwa ase eema ya Lea, agasoa eya Raeli. 34Korende Raeli konya obisire ebinyasae ebio ase egeikaransero kiaye igoro y’engamia, akaba obiikaranserete. Labani akariga‐rigia eema ime, tabinyora. 35Raeli agatebia ise, “Tata, onyabere, tobaisa kombea, naki tinkonyara koimoka ase obosio bwao, ekiagera nimbwate engencho yaito intwe abakungu.” Nabo akariga‐rigia, tabinyora.
36Erio Yakobo akabea mono, akomania Labani ase okomotogonyera na goteba, “Nkomocha ki nakorire? Nebibe biane nakorire mbiribi, goika kwambwatirie nobororo engencho enga buna eye? 37Kwariga‐rigirie ase ebinto bionsi. Ngento ki kiao kwanyorao narentanire? Kebeke aiga ase obosio bw’abaminto na obw’abamino, batwatanane inche naye. 38Bono inche namenyire bwoo emiaka emerongo ebere. Ching’ondi chiao gose chimbori, ekero chiabwate amarieme, ende terekereti; gose inche tinyenyeti chimingichi chinde chie riicho riao, na gochiria. 39Echiaitetwe ne chinyang’au tingochirentereti, ninche omonyene nachiakanete. Echiaibetwe mobaso gose botuko ogachinsaba korwa ase amaboko aane. 40Eye nero yarenge engencho yane: Riberera ri’omobaso boira rikaba rigonsamba, na obokendu boganchanda botuko, ne chitoro chikaera korwa ase amaiso aane. 41Emiaka eye emeronge ebere imenyete bwoo, nabeire nkogokorera emiaka ikomi na ene ase okonyora abaiseke bao babere, na emiaka etano nomo ase okonyora amaicho ao, na aye kwabeire gokoonchora eng’eria yane ara ikomi. 42Onye Nyasae o tata, Nyasae o Ibrahimu, Nyasae oyio Isaka airogete atarenge amo nainche, amaene, nanga nigo gwanseria bono inde namaboko amasa. Emechando na emeremo yane Nyasae oyerorire, ase igo ere nagotogonyerete obotuko bwaetete.”
Yakobo na Labani bagokora okobwatana
43Labani akairaneria Yakobo, akamotebia, “Abasubati aba nabana baane, na abana babo nabarabwo nabana baane, na amaicho aya, naro nayane, na bionsi ebio oroche nebiane. Bono ninki ndanyare gokorera abana baane na abana babo baiboire? 44Inchuo bono, tokore okobwatana, aye nainche, na korokwo inakobe kirori egati yao nainche.”
45Erio Yakobo akaimokia rigena, akaritenenia ribe esiiro y’ekeinyorio. 46Yakobo agatebia abamwabo, “Sangereria amagena”, na barabwo bakayasangereria, bakayakora etui, bakariera endagera ase etui eyio. 47Labani akayeroka Yegari‐Sahaduta#31:47 Yegari‐Sahaduta (Ekearamaiki), engencho yaye: etui y’oborori., korende Yakobo akayeroka Galeedi#31:47 Galeedi (Ekeibirania), engencho yaye: etui y’oborori. 48Labani akabora, “Etui eye nero kirori egati yane naye rero iga.” Ase ayio akayeroka Galeedi. 49Naende ekarokwa Misipa#31:49 Misipa, engencho yaye: omorobiri bw’okorenda, naki nigo atebete, “Omonene nere orabe ogotorigereria aye nainche, ekero torabe totarochaini. 50Korabe gokobachanda abana baane abasubati, gose gokonyuoma abakungu bande abaao goetania barabwo, manya ng’a nonya monto onde taiyo oyaroche, rora, Nyasae nere kirori egati yao nainche.”
51Erio Labani agatebia Yakobo, “Rigereria etui eye na esiiro eye, natenenirie egati yao nainche. 52Etui eye ebe kirori, na esiiro eye ebe kirori boigo, ng’a tingotamboka etui eye inchiche bwoo, gose aye togoetania etui eye na esiiro eye ochiche bwone, tokorerane amabe. 53Nyasae o Ibrahimu, Nyasae o Nahori, oyorenge Nyasae o ise obo, agambe ase egati yaito.” Ase igo Yakobo agatiana ase Oyio Isaka ise airogete. 54Yakobo akarua ekeng’wanso agwo ase egetunwa, akarangeria abanto baye bache koragera amo nere, bakaba aroro ase egetunwa obotuko obwo bwonsi.
55Mambia chuni Labani akaimoka, akanyunyunta abachokoro baye na abana baye abasubati, akabasesenia; erio akairana gocha bwoye.
Currently Selected:
OMOCHANKO 31: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
