OKONG’ANYA 7
7
1Omonene agatebia Musa, “Rora nagokorire obe buna Nyasae ase Farao, na Haroni akwane nere buna omobani oo. 2Goika otebie oyomino Haroni ayio onsi nagochikire, na ere akwane na Farao, amotebie ng’a ae Abaisraeli ribaga barue ase ense yaye. 3Korende ninkong’ie enkoro ya Farao; nonya nabo ninkore ebikone ebinge na amakumia amange ase ense ya Misiri. 4Korende Farao takobaigwa. Inche nindambore okoboko kwane igoro y’Abamisiri na kobaa ebisusuro ebinene, na nindusie emeganda yane, abanto baane Abaisraeli, korwa ase ense ya Misiri. 5Ekero ndarambore okoboko kwane igoro y’Abamisiri, na korusia Abaisraeli korwa asebare, erio nario Abamisiri baramanye ng’a inche ninche Omonene.” 6Musa na Haroni bagakora buna Omonene abachigete. 7Ekero keria bakwanete na Farao, Musa nigo arenge nemiaka emerongo etano na etato (80), na Haroni emiaka emerongo etano na etato, na etato (83).
Enyimbo ya Haroni
8Omonene agatebia Musa na Haroni, 9“Ekero Farao arababorie ng’a mokore egekone, erio aye Musa otebie Haroni abogorie enyimbo yaye, ayerute inse bosio bwa Farao, na ero neonchoke ebe eng’iti.” 10Musa na Haroni bakagenda ase Farao, bagakora buna Omonene abachigete. Haroni akaruta enyimbo yaye bosio bwa Farao na bw’abasomba baye, na ero ekaonchoka ekaba eng’iti. 11Erio Farao akarangeria abanto abanyasemi na abaragori, na abwo abaringoria ba Misiri bagakora boigo ase oborogi bwabo. 12Kera oyomo obo akaruta enyimbo yaye inse, na chirochio chikaonchoka, chikaba ching’iti chinene; korende enyimbo ya Haroni ekamera chinyimbo chiabo. 13Enkoro ya Farao nigo yarenge enkong’u, na buna Omonene atebete, taigwera Musa na Haroni.
Amache akoonchoka koba amanyinga
14Omonene agatebia Musa, “Farao okong’irie enkoro yaye, bwangire koa abanto aba ribaga bagende. 15Ankio mambia, ekero Farao aragende rooche, naye ogende otenene ase engegu, omoganye aroro. Enyimbo eria yaonchogete ekaba eng’iti, oyebogorie koboko kwao. 16Omotebie ng’a: Omonene, Nyasae bw’Abiabirania, ontomire ngotebie ng’a oe abanto baye ribaga bagende komokorera ase erooro. Naye goika bono toraigwa. 17Ase igo Omonene otebire iga: Ase ring’ana eri ndakore, nario oramanye ng’a ninche Omonene. Rigereria, ning’ake amache ’orooche rwa Naili nenyimbo eye mbwate koboko kwane, na amache aya naonchoke abe amanyinga. 18Ne chinswe chire ase orooche ime inachikwe, chigunde, na orooche narotioke bobe, na Abamisiri nabasinywe konywa amache aria.”
19Erio Omonene agatebia Musa amotebie Haroni, “Imokia enyimbo yao, orambore okoboko kwao igoro ase amache onsi ay’Abamisiri, ase chindooche chiabo na ase ebirooche, ase amatibo onsi ne chinsoko. Amache ayio onsi aonchoke abe amanyinga. Naboigo amanyinga abe ase ense yonsi ya Misiri, nonya nase chintuba na ase chinyongo chionsi.”
20Musa na Haroni bagakora buna Omonene abachigete. Haroni akaimokia enyimbo yaye, agaaka orooche bosio bwa Farao na bw’abasomba baye, na amache ayare imeo akaonchoka, akaba amanyinga. 21Ne chinswe chiare ase orooche chigakwa, na orooche rokagunda na gotioka, na Abamisiri bagasinywa konywa amache aria. Amanyinga akaba ase ense yonsi ya Misiri. 22Erio abaringoria ba Misiri bagakora boigo ase oborogi bwabo. Farao akagenderera gokong’ia enkoro yaye, na buna Omonene konya atebire, tabaigwa. 23Farao akairana kogenda bwoye, amang’ana aria tayabeka ase omoyo oye. 24Abamisiri bonsi bagakunya‐kunya mbarabare y’orooche ase okorigia amache bakonywa, ekiagera tibare konyara konywa amache a rooche.
25Amatuko atano na abere akaera korwa riria Omonene aagete orooche rwa Naili.
Currently Selected:
OKONG’ANYA 7: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
