OKONG’ANYA 8
8
Ebioto bikorentwa
1Erio Omonene agatebia Musa, “Genda otebie Farao: Aya naro Omonene agoteba: Bae abanto baane ribaga bagende gonkorera. 2Korende koraange kobaa ribaga bagende, rirorio inche ning’ake ense yao yonsi ase okorenta ebioto. 3Orooche rwa Naili naroichorwe nebioto, na birobio nabitiire korwa aroro, nabisoe nyomba mwao, na enyomba yao y’okorara, amo noborere bwao; nabisoe ne chinyomba chi’abasomba bao na echi’abanto bao, ase amariko ao ase okogekera emegati, na ase ebituba biao bi’ogokonyera obosie. 4Ebioto ebio inabikogenderere omobere oo, na ey’abanto bao, na ey’abasomba bao.”
5Erio Omonene agatebia Musa, “Motebie Haroni abwate enyimbo yaye, ayeimokie igoro ye chindooche, na ebirooche, na amatibo, erinde agere ebioto bigende igoro ase ense yonsi ya Misiri.” 6Haroni akarambora okoboko kwaye igoro y’amache onsi a Misiri, na ebioto bigatiira, bigatuba ense eyio yonsi. 7Na abaringoria bagakora boigo ase oborogi bwabo, bakarenta ebioto igoro ase ense ya Misiri.
8Erio Farao akarangeria Musa na Haroni, akabatebia, “Mosabe Omonene arusie ebioto korwa ase ense na korwa ase abanto baane, na inche ning’ee abanto baye ribaga bagende koruera Omonene ekeng’wanso.”
9Musa agatebia Farao, “Ase amasikani ao, naye orantebie ngaki ki ndagosabere aye amo nabasomba bao, na abanto bao, erinde ebioto birue asore na ase chinyomba chiao, bitigare koba ase orooche rwa Naili oka.”
10Farao akairaneria, “Ng’ankio.”
Musa akamotebia, “Nigo erabe buna gwateba, erinde omanye ng’a onde tari buna Omonene, Nyasae oito. 11Ebioto nabirue asore na ase chinyomba chiao, ase abasomba bao na ase abanto bao; binde tibigotigara otatiga ase orooche rwa Naili oka.” 12Musa na Haroni bakarua o Farao, na Musa akaboria Omonene arusie ebioto ebio amorenterete Farao. 13Omonene agakora buna Musa amoboretie, na ebioto ebio biare ase chinyomba, na ase chigoora, na aande onsi isiko, bigakwa. 14Abanto bakabisangereria, bakabibeka chitui chinyinge, na ense yonsi egatioka bobe. 15Korende ekero Farao aroche ng’a amang’ana abeire buya, agakong’ia enkoro yaye naende, na buna Omonene atebete, akaanga koigwa Musa na Haroni.
Chinsona chikorentwa
16Omonene agatebia Musa, “Motebie Haroni aimokie enyimbo yaye aake orotu rwe riroba, na rororwo naroonchoke robe chinsona ase ense ya Misiri.” 17Barabwo bagakora bo. Haroni akarambora okoboko kwaye, agaaka riroba nenyimbo yaye, na orotu rokaonchoka rokaba chinsona, na chirochio chikaroma mwanyabanto ne chitugo. Orotu rwonsi rwe riroba rokaonchoka rokaba chinsona. 18Abaringoria nabarabwo bagateema korenta chinsona ase oborogi bwabo, korende tibanyara. Chinsona echio chikaba aande onsi, ase mwanyabanto na ase chitugo. 19Abaringoria bagatebia Farao, “Eke nekiara kia Nyasae.” Korende Farao agakong’ia enkoro yaye, na buna Omonene atebete, akaanga kobaigwa.
Chingi chikorentwa
20Omonene agatebia Musa, “Oche oimoke mambia chuni ekero Farao agochia kogenda rooche, otenene ase obosio bwaye, omotebie: Aya naro Omonene agoteba: Bae abanto baane ribaga bagende bankorere. 21Onye tokoa abanto baane ribaga, rirorio nintome chingi chinyinge igoro yao na abasomba bao, na igoro y’abanto bao ne chinyomba chiao. Chinyomba chi’Abamisiri inachiichorwe ne chingi, nonya nense eyio yonsi bamenyete. 22Korende ase rituko erio nintige ensemo ya Goseni, ase abanto baane bamenyete; chingi echio tichigochiao, erio nomanye ng’a ninche Omonene bw’ense eye. 23Ninkore ogwatananeka egati y’abanto baane na abao. Ankio egekone eke nagekoreke.” 24Omonene agakora ayio. Chingi chigacha ase obonge mono ase chinyomba chia Farao, na echi’abasomba baye, na ase ense yonsi ya Misiri. Na ense eria egasarigwa ne chingi chiria.
25Erio Farao akarangeria Musa na Haroni, akabatebia, “Genda moruere Nyasae oino ekeng’wanso, korende naiga ase ense yaito.”
26Musa akamoiraneria, “Titokonyara gokora igo, ekiagera intwe ntoruere Omonene, Nyasae oito, ekeng’wanso ekeragechie Abamisiri. Na onye Abamisiri bagotorora tokorua ekeng’wanso buna ekio, Inee, tibagocha gotoaka amagena? 27Goika togende orogendo rw’amatuko atato gochia ase erooro, erinde toruere Omonene, Nyasae oito, ekeng’wanso buna atochigete.”
28Farao akabora, “Nimbae ribaga mogende moruere Omonene, Nyasae oino, ekeng’wanso ase erooro, korende timogenda aare, naende monsabere inche.”
29Musa akamoiraneria, “Bono buna nkorua asore nimosabe Omonene arusie chingi korwa asore aye Farao, na ase abasomba bao, na ase abanto bao, ankio mambia. Korende aye Farao, tokora obong’ainereria naende, na kwanga koa abanto ribaga bagende baruere Omonene ekeng’wanso.”
30Erio Musa akarua o Farao, agasaba Omonene. 31Omonene agakora buna Musa atebete, akarusia chingi chiria ase Farao, na ase abasomba baye, na ase abanto baye; tichiatigara nonya neyemo. 32Korende Farao agakong’ia enkoro yaye nonya nengaki eyio, taa abanto ribaga bagende.
Currently Selected:
OKONG’ANYA 8: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
