OKONG’ANYA 6
6
1Omonene agatebia Musa, “Bono norore aya ndakorere Farao. Naki ase okoboko kwane gwe chinguru nimobetererie abae abanto baane ribaga bagende, ee, ase okoboko kwane gwe chinguru nabetererigwe abaserie korwa ase ense yaye.”
Okorangerigwa kwa Musa naende
2Nyasae agakwana na Musa, akamotebia, “Inche ninche Omonene. 3Naorokerete Ibrahimu, na Isaka, na Yakobo buna Nyasae Omobui. Korende ase erieta riane Yahwe, gose Omonene, tinamanyekanete asebare. 4Ninche nakorete okobwatana kw’ogotianania nabarabwo ng’a nimbae ense ya Kanani, ense eria barenge buna abamenyi. 5Na bono naigure okwerera kw’Abaisraeli abwo Abamisiri babegete inse y’obosomba, naende ning’inyorete okobwatana koria kwane. 6Ase igo otebie Abaisraeli ng’a, Inche ninche Omonene, ndabarusie korwa ase emeremo emerito inse y’Abamisiri. Nimbatoorie korwa ase obosomba bwaino. Ase okoboko kwane koramboire, na goetera ase ebisusuro ebinene, nimbaboorie. 7Nimbakore mobe abanto baane, na inche nimbe Nyasae oino. Inwe namomanye ng’a ninche Omonene, Nyasae oino, oyokobarusia korwa ase emeremo emerito inse y’Abamisiri. 8Nimbaire goika ense eria nariete eira inyimogetie okoboko kwane koa Ibrahimu, na Isaka, na Yakobo. Nimbayee ebe omwando oino. Inche ninche Omonene.”
9Musa agatebia Abaisraeli amang’ana ayio, korende barabwo tibancha gotegerera, ekiagera tibare konyara koremereria, ase engencho y’emeremo y’obosomba obotindi.
10Erio Omonene agakwana na Musa akamotebia, 11“Genda okwane na Farao, omoruoti o Misiri, omotebie abae Abaisraeli ribaga bagende, barue ase ense yaye.”
12Musa agakwana ase obosio bw’Omonene, agateba. “Onye Abaisraeli baanga konyigwera, naki rende Farao ere arakore anyigwere, inche omonto ebikoba biane bitarokiri.”
13Korende Omonene agakwana na Musa na Haroni, akabachika bagende batebie Abaisraeli na Farao, omoruoti o Misiri, ng’a batomirwe barusie Abaisraeli korwa ase ense ya Misiri.
Omoroberio bw’ororeria rwa Musa na Haroni
14Abanto aba nabwo barenge emetwe ye chiamate chiabo. Abana abamura ba Reuben, omomura omotangi o Israeli, nabwo aba: Hanoki, na Palu, na Hezironi, na Karimi. Aba nabwo chiamate chia Reuben. 15Abana abamura ba Simeoni nabwo aba: Yemueli, na Yamini, na Ohadi, na Yakini, na Sohari, na Sauli, omwana bw’omokungu Omokanani. Aba nabwo chiamate chia Simeoni. 16Aya naro amarieta ’abamura ba Lawi, buna batunyaine ase okoiborwa kwabo: Gerisoni, na Kohati, na Merari. Lawi nigo akoorete emiaka rigana erimo, na emerongo etato, na etano na ebere (137). 17Abana abamura ba Gerisoni nabwo Libini na Simei, ne chiamate chiabo. 18Na abana abamura ba Kohati nabwo aba: Amuramu, na Isari, na Heburoni, na Usieli. Kohati nigo akoorete emiaka rigana erimo, na emerongo etato, na etato (133). 19Na abana abamura ba Merari nabwo Mali na Musi. Aba nabwo chiamate chia Lawi, buna batunyaine ase okoiborwa kwabo.
20Amuramu akanyuoma Yokebedi, omoiseke omwabo ise; na ere akamoiborera Haroni na Musa. Amuramu nigo akoorete emiaka rigana erimo, na emerongo etato, na etano na ebere (137). 21Na abana abamura ba Isari nabwo aba: Kora, na Nefegi, na Sikiri. 22Na abana abamura ba Usieli nabwo aba: Mishaeli na Elisafani, na Sitiri.
23Haroni akanyuoma Elisheba, omoiseke bw’Aminadabu, omoiseke omwabo Nashoni. Ere akamoiborera Nadabu, na Abihu, na Eleazari, na Itamari. 24Na abana abamura ba Kora nabwo aba: Asiri, na Elikana, na Abiasafu. Aba nabwo chiamate chia Kora. 25Eleazari, omwana o Haroni, akanyuoma omoiseke oyomo bw’abaiseke ba Putieli, na ere akamoiborera Finehasi. Abanto aba nabwo barenge emetwe ye chinyomba chi’Abalawi, eamate ase eamate.
26Haroni oria oria amo na Musa nabwo baria Omonene atebetie, “Barusie Abaisraeli ase ense ya Misiri, omoganda ase omoganda.” 27Aba nabwo baria batebetie omoruoti o Misiri ng’a barusie Abaisraeli korwa Misiri. Musa na Haroni nabwo baria baria.
Omonene ogochika Musa na Haroni
28Ekero Omonene akwanete na Musa ase ense ya Misiri 29akamotebia, “Inche ninche Omonene. Otebie Farao, omoruoti o Misiri, amang’ana onsi nkogotebia.” 30Korende Musa akamoiraneria, “Inche nomonto ebikoba biane bitarogeti, naki rende Farao arakore anyigwere?”
Currently Selected:
OKONG’ANYA 6: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
