OKONG’ANYA 5
5
Musa na Haroni ase obosio bw’omoruoti o Misiri
1Erio Musa na Haroni bakagenda ase Farao, bakamotebia, “Aya naro Omonene, Nyasae bw’Abaisraeli, agoteba: Bae abanto baane ribaga bagende bankorere Rituko Rinene aaria ase erooro.”
2Farao akairaneria, “Omonene nere ng’o inyigwe amang’ana aye, na koa Abaisraeli ribaga bagende? Inche timomanyeti Omonene, gose tinkoa Abaisraeli ribaga bagende.”
3Barabwo bakamotebia, “Nyasae bw’Abaibirania natoorokera. Koranche, otoe ribaga togende orogendo rw’amatuko atato gochia ase erooro, erinde toruere Omonene, Nyasae oito, ebing’wanso, tabaisa gocha gotoita namarwaire gose nemioro.”
4Omoruoti o Misiri akabairaneria, “Musa na Haroni, nase ki mogotenenia abanto korwa ase emeremo yabo? Irana gochia ase emeremo yaino y’obosomba.” 5Naende Farao akabora, “Abanto aba babeire abange kobua abanyene ense eye. Naende morigetie kobarusia ase emeremo yabo.”
6Ase rituko erio erio Farao agachika abwo abachandi amo nabateneneri, akabatebia, 7“Timoa abanto aba naende chimboba ase ogokorera amatabori, buna mware kobaa agwo ritang’ani. Tiga bagende barabwo boka kwerigeria chimboba. 8Korende mobabetererie bakore omobaro bw’amatabori oyo baare gokora ritang’ani, batari koyokeyia. Barabwo naboro. Ase ayio nigo bakona‐koboria ng’a: Toe ribaga togende koruera Nyasae oito ekeng’wanso. 9Bae abanto abwo emeremo emerito mono, baisaneke nero, na tibabaisa gotegerera amang’ana ’oborimo.”
10Abachandi abwo na abateneneri bagasoka bagatebia abanto, “Farao otebire iga: Tinkobaa inwe chimboba naende. 11Genda inwe mweka mwerigerie chimboba aande onsi morachinyore; korende goika mokore omobaro bw’amatabori oria o botambe, timokoyokeyia nonya ng’ake.” 12Abanto abwo bagesiarera ase ense yonsi ya Misiri na kwerigeria obonyansi ribaga rie chimboba. 13Abachandi baria bakagenderera kobabetereria, bagoteba, “Goika mokore kera rituko omobaro bw’amatabori buna konya mogokora ekero mware korenterwa chimboba.” 14Abachandi abwo babekire na Farao bakaba bagoaka abateneneri b’Abaisraeli, abwo babegetwe gotenenera emeremo, bakabatebia, “Naki motaikeranetie omobaro oino bw’amatabori igoro na rero, oyio konya mogokora botambe?”
15Erio abateneneri b’Abaisraeli bakagenda ase Farao, bagateba, “Inki ogotokorera iga intwe abasomba bao? 16Chimboba titori koegwa, korende nigo tokona‐kobetererigwa ng’a tokore amatabori. Na bono intwe, abasomba bao, nigo tokona‐goakwa; korende okomocha nokw’abanto bao.”
17Farao akabairaneria, “Inwe naboro mono. Nakio gekogera mogoteba ng’a: Toe ribaga togende toruere Omonene ekeng’wanso. 18Irana gochia ase emeremo yaino. Timokorenterwa chimboba, korende goika mokore omobaro bw’amatabori, oria oria mochikire gokora.” 19Abateneneri b’Abaisraeli bakarora ng’a basoire ase obokongu ekiagera batebetigwe ng’a. “Goika moikeranie kera rituko omobaro oria oria bw’amatabori.”
20Ekero baare korua ase Farao, bakanyora Musa na Haroni agwo nchera babaganyete, 21bakabatebia, “Omonene abarigererie na konacha ekina, ekiagera mwatokorire koba rimisu riibe ase Farao na ase abasomba baye. Mwababekeire emioro maboko abo batoite.”
Ogosaba kwa Musa
22Erio Musa akairana gochia ase Omonene, akamotebia, “Omonene, nase ki ogokorera abanto aba amabe buna aya? Inki rende gwantomera inche? 23Naki korwa riria nagendete ase Farao gokwana amang’ana ao omentire gokorera abanto bao bobe mono, na aye torakora kende ase okobatooria.”
Currently Selected:
OKONG’ANYA 5: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
