OKONG’ANYA 4
4
Nyasae okoa Musa okobua gw’ogokora ebikone
1Erio Musa akairaneria, “Korerende onye barabwo bakwanga konyegena, gose koigwa amang’ana aane, inki rende ndakore? Aande nigo baratebe: Omonene takoorokereti.”
2Omonene akamoboria, “Inki ekio obwate koboko kwao?”
Musa akairaneria, “Nenyimbo.”
3Omonene akamotebia, “Yerute inse!” Na ekero Musa ayeruta inse, ekaonchoka ekaba eng’iti, na Musa agatama korwa asere. 4Erio Omonene akamotebia, “Rambora okoboko kwao, oyebwate ekemincha.” Musa akarambora okoboko, akayebwata, na ase okoboko kwaye ekaonchoka, ekaba enyimbo naende. 5Na Omonene akamotebia, “Okore igo, na barabwo inabegene ng’a inche Omonene, Nyasae bwe chisokoro chiabo, Nyasae o Ibrahimu, na o Isaka, na o Yakobo nakoorokera.”
6Naende Omonene akamotebia, “Soyia okoboko kwao eanga ime ase egekuba kiao.” Musa agakora boigo; na ekero akorusetie akanyora ng’a kwabeire okorabu se ase oborwaire bwa ukoma. 7Naende Omonene akamotebia, “Irania okoboko kwao eanga ime ase egekuba kiao.” Musa agakora bo, na ekero akorusetie akanyora ng’a kwabeire buya, buna omobere oye ore. 8Omonene akamotebia, “Onye tibakwegena amang’ana ao, gose tibagwancha ase egekone kie ritang’ani, rirorio mbanche ase egia kabere. 9Onye tibakwegena nonya nase ebikone ebio bibere, gose gwancha amang’ana ao, goika obuuche amache make korwa ase orooche rwa Naili, oyaitere ase ense enyomo; amache ayio orabuuche korwa ase orooche naonchoke abe amanyinga ase ense enyomo.”
10Erio Musa akamotebia, “Koranche, Omonene, inche tindi omonto omanyete gokwana buya, nonya nkorwa kare, gose korwa riria gwachagete gokwana nainche, omosomba oo. Tindi omwango bw’ogokwana, na oromeme rwane nororito.”
11Omonene akamoiraneria, “Ning’o oete mwanyabanto omonwa? Ning’o omokorete abe rimama, gose omotino, gose abe okorora, gose omouko? Inee! Tari inche Omonene? 12Bono genda! Ninkoe amang’ana ogochia gokwana na gokworokereria aya ogochia goteba.”
13Korende Musa akamoiraneria, “Omonene, koranche, otome omonto onde omoao oyo oranche.”
14Erio Omonene akaba nendamwamu egwoka igoro ya Musa, akamotebia, “Inee! Haroni omino, oria Omolawi, takaiyo? Nimanyete ng’a ere nere omonto omanyete gokwana buya. Naama! Ngocha are gokorotota; ere ekero arakorore nabe nomogoko omonene. 15Aye nokwane nere, omotebie aya agochia gokwana. Inche nimbae inwe babere amang’ana mogochia gokwana, na koborokereria aya morakore. 16Nere orabe ogokwana nabanto ribaga riao; ere abe omokwani oo, na aye obe ribaga ria Nyasae asare. 17Aye obogorie enyimbo eyio koboko kwao, nero orakorere ebikone.”
Musa okoirana gochia Misiri
18Musa akairana gochia ase Yetero, ise biara, akamotebia, “Koranche, ong’e ribaga ng’irane Misiri korora abaminto gose moyo bare.” Yetero akamotebia, “Ee, ogende nomorembe.”
19Omonene agakwana na Musa aaria Midiani, akamotebia, “Irana gochia Misiri, ekiagera baria bonsi barigetie kogoita bakure.” 20Musa akaimokia mokaye na abana baye, akabariinia etigere igoro, na barabwo bakairana gochia ase ense ya Misiri. Ere akabogoria enyimbo ya Nyasae koboko kwaye.
21Erio Omonene agatebia Musa, “Bono ekero orairane Misiri, origererie buya ng’a nokore ase obosio bwa Farao amakumia onsi aya nakoeire okobua gw’okoyakora. Korende ninkong’ie enkoro yaye, na ere tagotiga abanto bagende. 22Erio omotebie Farao: Aya naro Omonene agoteba: Abaisraeli nomwana one omotangi. 23Inche nagotebirie: Moe omwana one ribaga agende gonkorera korende koraange, rirorio nigo ndaite omwana oo omotangi.”
24Kobare nchera kogenda, Omonene akaumerana na Musa aase baare gotimokera, akarigia komoita. 25Erio Sipora akaimokia rigena riare erioge, agasara omwana oye risankwa ria isiko ri’ekiimo kiaye ki’obosacha akarikunia amagoro a Musa, akabora, “Amaene, nigo ore omonyuomi one bw’amanyinga.” 26Agwo Omonene agatiga Musa, tamoita. Erio omokungu oyio agateba, “Omonyuomi bw’amanyinga ase engencho y’okwaroka.”
27Omonene agatebia Haroni, “Genda gochia ase erooro orotote Musa.” Erio akagenda, akaumerana nere ase egetunwa kia Nyasae, akamonyunyunta. 28Musa agatebia Haroni amang’ana onsi Omonene amotebetie, na igoro y’ebikone bionsi amochigete akore. 29Musa na Haroni bakagenda, bagasangereria abagaaka bonsi b’Abaisraeli. 30Haroni akabatebia amang’ana onsi Omonene atebetie Musa, na ere agakora ebikone biria ase amaiso ’abanto. 31Erio abanto bakegena; na ekero baigwete ng’a Omonene bwechandeire Abaisraeli, na ororire emechando yabo, barabwo bagatung ama inse, bakamosasima.
Currently Selected:
OKONG’ANYA 4: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
