OKONG’ANYA 36
36
1“Besaleli na Oholiabu amo nabaroisia bande bonsi, aba Omonene konya aeire obong’aini, abare nogwancha kw’ogokora emeremo ende yonsi egwenerete ase okoagacha Obomenyo Obochenu, goika bakore kera emeremo buna Omonene konya achikire.”
Abanto bakorenta ebiegwa ebinge
2Erio Musa akarangeria Besaleli amo na Oholiabu na abaroisia bande bonsi, aba Omonene aeire obong’aini, abare nogwancha, bache, bachake emeremo eria. 3Barabwo bakaegwa korwa ase Musa ebiegwa ebi bionsi Abaisraeli konya barentire ase okoroisia Obomenyo boria Obochenu. Na Abaisraeli bakagenderera korenta ebiegwa biabo kera emambia. 4Erio abaroisia baria abang’aini, abarenge gokora emeremo ende yonsi ase Obomenyo boria Obochenu, nyuma kobatigire emeremo eye baare gokora bagacha ase Musa, 5bakamotebia, “Abanto barentire ebiegwa ebinge goetania ebiaganeirie ase emeremo eria Omonene achigete ekorwe.” 6Ase ayio Musa akarareria abanto bonsi b’egetwori, akabachika, “Onde tabaisa korenta ebiegwa binde goetania ebi konya biasangererigwe ase Obomenyo Obochenu, abe omosacha gose omokungu.” Ase igo abanto bagatiga korenta ebiegwa binde. 7Ebi konya barentire nigo biabete ebinge, bigaetania ebiaganeirie ase emeremo eria yare gocha gokorwa.
Eema y’Obomenyo ekoroisigwa
(Okong’ 26:1–37)
8Abaroisia bonsi abang’aini b’abakori emeremo bakaroisia eema y’Obomenyo. Bakayeroisia nebitambaa ikomi, biroisirie korwa ase chiusi chi’egatani engiya chisisire amo ne chiusi chi’amarionya chimbariri Omoroisia omong’aini akabiroisia, bire nemegwekano y’abakerubi. 9Obotambe bwa kera egetambaa nigo bwarenge obw’ekerengo ki’amaboko emerongo ebere, na atano na atato, na obogare bwaye amaboko ane; bionsi nigo biarenge bi’ekerengo ekemo. 10Bakabwatania ebitambaa bitano amo, bikaba rirondia erimo. Naboigo nebitambaa binde bitano. 11Bagakora ebioro bie chiusi chiburu, bakabibeka ase ensinyo y’egetambaa kere ensinyo y’ensemo ya kera rirondia. 12Bagakora ebioro emerongo etano, bakabibeka ase egetambaa kegochakera rirondia rie ritang’ani, na emerongo etano ase egetambaa kegokoorera rirondia ria kabere. Ebioro bia kera rirondia bigachikana. 13Bagatura ebigobanio bie chitahabu emerongo etano, na ase ebio bakabwatania amarondia ayio amo, akaba eema eyemo y’Obomenyo.
14Erio bakaroisia amarondia ikomi na rimo ay’amanya e chigoree, akaba eema y’ogotuba Obomenyo boria. 15Obotambe bwa kera rirondia nigo bwarenge obw’ekerengo ki’amaboko emerongo etato, na obogare bwaye amaboko ane. Amarondia onsi aya ikomi na rimo nigo arenge ay’ekerengo ekemo. 16Bakabwatania amarondia atano amo, akaba rirondia erimo, naende atano na rimo akaba rirondia erimo. 17Bagakora ebioro emerongo etano, bakabibeka ase ensinyo ye rirondia rinene rie ritang’ani, na emerongo etano ase rirondia rinene ria kabere ase rigochakera. 18Naende bagakora ebigobanio emerongo etano bie chitaai ase okobwaterania amarondia ayio abere, abe eema engima. 19Bagakora rirondia ri’amasankwa e chimingichi aakire etaago, ase ogotuba eema, ne rirondia rinde ri’amasankwa amaterere e ching’iti chia rooche, erirabekwe igoro ye rirondia rie ritang’ani.
20Naende bakaroisia chibao chi’emekonge ase Obomenyo, bagachitenenia. 21Obotambe bwa kera ebao nigo bware obw’ekerengo ki’amaboko ikomi, na obogare okoboko okomo na ekeng’ese. 22Bagakora chintamang’o ibere ase kera ebao, ase chibao echio chirabwateranigwe. Naboigo baroisetie chibao echi chionsi chi’Obomenyo. 23Bakaroisia chibao emerongo ebere ase ensemo ya irianyi. 24Bagakora ne chinterekerero chie chifeta emerongo ene, chibe ibere ibere inse ya kera ebao ase chintamang’o chiaye ibere. 25Nase ensemo ya kabere, nero ya sugusu y’Obomenyo, bakaroisia chibao emerongo ebere, 26ne chinterekerero chiaye chie chifeta emerongo ene, ibere ibere inse ya kera ebao. 27Korende ase ensemo ya nyuma y’Obomenyo, eyerochie bosongo, bakaroisia chibao isano nemo. 28Naende bakaroisia chibao ibere chikaba chikoona chi’Obomenyo ensemo ya nyuma. 29Kera ebao ase echio ibere ekabwatanigwa ne chibao chie chinsinyo, korwa inse goika igoro ase ebonyi entang’ani ere; naboigo bakorete ase chibao echio ibere echiabegetwe ase chikoona ibere. 30Chibao chionsi nigo chiabete isano na isato, ne chinterekerero chiabo chie chifeta ikomi, na isano nemo, ibere ibere inse ya kera ebao.
31Bakabaacha emeriibo etano y’emekonge, eriibe chibao chie rikere erimo ri’Obomenyo, 32na etano ase rikere rinde, na etano ase ensemo ya nyuma, eyerochie bosongo. 33Bakabaacha omoriibo o gati‐gati omogima, ase okoriiba chibao korwa ensinyo eyemo goika eyende. 34Erio bakaooma chibao echio netahabu, bagakora chibonyi chie chitahabu ase emiaro erasoigwe, naende bakaooma emeriibo eria netahabu.
35Bakaroisia etoto ye chiusi chi’amarionya chire buru, ne chimonyinga, ne chimbariri, amo ne chiusi chi’egatani engiya chisisire. Omoroisia omong’aini akayeroisia ekaba emegwekano y’abakerubi. 36Naende bakabaacha chisiiro inye chi’emekonge, bagachiooma netahabu, na ebigobanio biaye bie chitahabu. Bagakora chinterekerero inye korwa ase efeta enyititoire. 37Na ase egesoero ki’Eema bakaroisia egetambaa korwa ase chiusi chi’amarionya chire buru, ne chimonyinga, ne chimbariri, amo nechi’egatani, keroisirie nomoroisia omong’aini. 38Bakabaacha chisiiro isano amo nebigobanio biabo, bakaooma ebisure ne chinuga chiabo netahabu. Chinterekerero chiabo isano nigo chiakorire korwa ase chitaai.
Currently Selected:
OKONG’ANYA 36: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
