OKONG’ANYA 37
37
Esanduku y’okogacha chibao chirikire Okobwatana kw’ogotianania ekoroisigwa
(Okong’ 25:10–22)
1Erio Besaleli akaroisia Esanduku ye chibao chi’emekonge. Obotambe bwaye nigo bwarenge obw’ekerengo ki’amaboko abere na ekeng’ese, na obogare bwaye okoboko okomo na ekeng’ese, na obotambe bwaye gochia igoro okoboko okomo, na ekeng’ese. 2Akayeooma netahabu echenire, ime na isiko, akayeetanania omong’ororia bw’etahabu. 3Agakora chibonyi inye korwa ase etahabu enyititoire, agachibeka ase amagoro aye ane, ibere ase kera rikere. 4Akabaacha emiaro y’emekonge, akayeooma netahabu. 5Agasoyia emiaro eyio ase chibonyi ime ase okobogoreria esanduku eria. 6Akaroisia ekemumeko gi’etahabu echenire ebe Oboikaranso bw’Amabera. Obotambe bwaye nigo bwarenge obw’ekerengo ki’amaboko abere na ekeng’ese, na obogare bwaye okoboko okomo na ekeng’ese. 7Erio agakora emegwekano y’abakerubi babere ey’etahabu esunyuntire, akayebeka ase chinsinyo ibere chi’Oboikaranso bw’Amabera, 8oyomo ase kera ensinyo, akayekora ekaba egento ekemo n’Oboikaranso bw’Amabera. 9Abakerubi abwo bakarambora chimbaba chiabo igoro y’Oboikaranso bw’Amabera, bakabobekera ekiriri, na amasio abo agachikana; na barabwo bakarigereria Oboikaranso bw’Amabera.
Emesa y’emegati ekoruegwa ase Omonene ekoroisigwa
(Okong’ 25:23–30)
10Akaroisia emesa ye chibao chi’emekonge. Obotambe bwaye nigo bwarenge obw’ekerengo ki’amaboko abere, na obogare bwaye okoboko okomo na obotambe bwaye gochia igoro okoboko okomo na ekeng’ese. 11Akayeoma netahabu echenire, akayeetanania omong’ororia bw’etahabu. 12Erio agakora orosingo rore nobogare bong’ana egesanyi gi’okoboko, na akaroetanania omong’ororia bw’etahabu. 13Naende agakora chibonyi inye korwa ase chitahabu, ne chibonyi echio agachibeka ase chikoona inye ase amagoro aye ane. 14Chibonyi chiria chikabekwa ang’e norosingo, na emiaro eria egasoigwa imeo, erinde emesa enyare kobogorerigwa. 15Akabaacha emiaro eria korwa ase emekonge, akayeooma netahabu. 16Agakora ebikorero biare kobekwa ase emesa igoro: chinteru na ebitaabo ase ubani, ne chisani, korwa ase ebio bagocha koumora ebinyugwa ebikoruegwa; akabiroisia bionsi korwa ase chitahabu chichenire.
Ekebekerero gie chitaya gekoroisigwa
(Okong’ 25:31–40)
17Akaroisia ekebekerero gie chitaya gi’etahabu echenire esunyuntire. Akayeroisia nenterekerero amo ne ritina, na emegwekano y’amamumu na ebisicha; bionsi bikaroisigwa bikaba egento ekemo. 18Nigo kiare ne chinsagia isano nemo, chiasogete korwa ase ritina, isato korwa ase ensemo eyemo, na isato korwa ase ensemo ende. 19Orosagia rwe ritang’ani rokaba nemegwekano etato y’ebisicha binga buna ebi’omolozi, kera ekemo ne rimumu na egesicha, na orosagia rwa kabere boigo rokaba nemegwekano y’ebisicha binga buna ebi’omolozi; ne chinsagia chionsi isano nemo chikaba boigo. 20Ritina rinyene ri’ekebekerero keria rikaba nemegwekano ene y’ebisicha binga buna ebi’omolozi. 21Rimumu erimo rikaba inse ya kera chinsagia ibere chigosoka korwa ase ritina. Ase ayio rikaba rimumu erimo inse ya kera orosagia rw’echio isano nemo chiroisirie chikaba egento ekemo ne ritina. 22Bionsi bikaroisigwa korwa ase ribomba erimo ri’etahabu echenire esunyuntire. 23Naende akaroisia chitaya chiaye isano na ibere, na ebinachi, ne chindogio chiaye chie chitahabu chichenire. 24Ekebekerero keria gie chitaya amo nebikorero biaye bionsi bikaroisigwa korwa ase chitahabu chichenire chi’ekerengo gie chikiro emerongo etano.
Egesasimero ase ubani erasamberwe gekoroisigwa
(Okong’ 30:1–5)
25Akaroisia egesasimero gie chibao chi’emekonge ase ubani erasamberwe. Obotambe bwaye nigo bwarenge obw’ekerengo gi’okoboko okomo, na obotambe bwaye gochia igoro amaboko abere. Emegwekano ye chingunchara ekaroisigwa ekaba egento ekemo negesasimero. 26Agakeooma netahabu echenire, igoro yaye, ne chinsemo chiaye, amo ne chingunchara chiaye, akayeetanania omong’ororia bw’etahabu. 27Agakora chibonyi ibere chie chitahabu, agachibeka inse y’omong’ororia ase chinsemo ibere. Ase chibonyi echio emiaro egasoigwa, erinde egesasimero kenyare kobogorerigwa. 28Na emiaro eria akabaacha korwa ase emekonge, akayeooma netahabu.
Amaguta akweakwa na amanukato akoroisigwa
(Okong’ 30:22–38)
29Naende akaroisia amaguta amachenu akweakwa, na ubani echenire are ne rimisu rigiya, akayaroisia buna omoroisia, oyomanyete buya, aranyare koyaroisia.
Currently Selected:
OKONG’ANYA 37: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
