OKONG’ANYA 3
3
Nyasae okorangeria Musa
1Musa nigo arenge korisia riicho ria Yetero ise biara, omokuani o Midiani, akariraa gochia bosongo y’erooro, agaika Horebu, egetunwa kia Nyasae. 2Agwo omomalaika bw’Omonene akamoorokera ase omogwekano bwe risase ri’omorero riare gwoka korwa ase egetutu gati. Musa akarigereria, akarora ng’a nonya kiare gwoka, tikiare koyia keere. 3Musa akarengereria, “Nigo ngoeta korwa moino ndore okorora oko kw’ogokumia, imanye naki egetutu eke getari koyia keere.”
4Ekero Omonene aroche ng’a Musa oikire ang’e arore, akamorangeria korwa ase egetutu ime, “Musa! Musa!”
Musa agaitaba, “Nao inde aa.”
5Nyasae akamotebia, “Tobaisa goika ang’e aa. Rusia ebikoroto biao, ekiagera aase agwo oteneine naachenu.” 6Naende akamotebia, “Inche ninche Nyasae bwe chisokoro chiao, Nyasae o Ibrahimu, na o Isaka, na o Yakobo.” Erio Musa agatuba obosio bwaye, ekiagera nigo airogete korigereria Nyasae.
7Omonene akabora, “Amaene narorire emechando y’abanto baane abwo bakare Misiri; naigure buna bakorera ase engencho y’abwo bakobachanda, na inche namanyire kegima obororo bwabo. 8Nigo naikire mbatoorie korwa ase amaboko ’Abamisiri, mbatiirie korwa ase ense eria, mbaire ase ense engiya engare, eyere entenenku ere namabeere na amooke, emenyire n’Abakanani, na Abahiti, na Abaamori, na Abaperisi, na Abahivi, na Abayebusi. 9Ekerero ki’Abaisraeli giaikire asende, naende narorire buna Abamisiri babachandire. 10Ase ayio, inchuo bono, ngotome gochia ase Farao, naye orusie abanto baane Abaisraeli korwa Misiri.”
11Korende Musa akamotebia Nyasae, “Inche ninche ng’o, ngende ase Farao ndusie Abaisraeli korwa Misiri?”
12Nyasae akamoiraneria, “Inche nimbe amo naye, na eke nakio kerabe ekemanyererio asore ng’a ninche omonyene nagotoma: Ekero orabe kwarusirie abanto abwo korwa Misiri inamobe mogonsasimera inche Nyasae oino ase egetunwa eke.”
13Erio Musa agatebia Nyasae, “Kondagende ase Abaisraeli na kobatebia: Nyasae bwe chisokoro chiaino ontomire asemore, amaene, barabwo baramboria: Erieta riaye, nere ng’o? Inaki rende ndabatebie?” 14Nyasae akairaneria Musa, “INCHE NINCHE INDE BUNA INDE. Obatebie Abaisraeli: INCHE INDE ontomire asemore.” 15Naende Nyasae akamotebia, “Goika otebie Abaisraeli: Omonene, Nyasae bwe chisokoro chiaino, Nyasae o Ibrahimu, na o Isaka, na o Yakobo ontomire asemore; erio nario erieta riane kare na kare; ase erio nigo ndabe nkoinyorwa nebiaare ase ebiaare. 16Genda, osangererie abagaaka b’Abaisraeli, obatebie ng’a: Omonene, Nyasae bwe chisokoro chiaino, Nyasae o Ibrahimu, na o Isaka, na o Yakobo nang’orokera, agantebia ng’a mbatebie: Amaene, narorire aya Abamisiri bakobakorera, 17na igo narengereirie kobang’anyia korwa Misiri ase mogochandwa, na kobaira ase ense y’Abakanani, na Abahiti, na Abaamori, na Abaperisi, na Abahivi, na Abayebusi, ense entenenku ere namabeere na amooke.
18“Na abagaaka b’Abaisraeli inabaigwe amang’ana ao. Erio mogende, aye na barabwo, ase omoruoti o Misiri, momotebie: Omonene, Nyasae bw’Abaibirania, natoorokera; na bono twagosabire, otoe ribaga togende orogendo rw’amatuko atato gochia ase erooro, erio toruere Omonene, Nyasae oito, ekeng’wanso. 19Korende inche omonyene nimanyete ng’a omoruoti o Misiri takobaa ribaga mogende atabetereirie nokoboko kwane gwe chinguru. 20Inche nindambore okoboko kwane, ng’ake Abamisiri namaakwa ’ogokumia ndakore ase egati yabo. Erio nyuma babae ribaga mogende.
21“Nimbae abanto baane ogwancherwa ase obosio bw’Abamisiri; ekero moragende, timokogenda more namaboko amasa. 22Kera omokungu asabe omogisangio oye, na omokungu onde bwensi omenyete nyomba mwaye, ebinto bie chifeta na ebie chitahabu amo ne chianga; mobibekere abana baino, abamura na abaiseke. Ase enchera eyio nero morasakore Abamisiri.”
Currently Selected:
OKONG’ANYA 3: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
