OKONG’ANYA 28
28
Chianga chi’abakuani
(Okong’ 39:1–7)
1“Orangerie Haroni, momura omino, amo nabamura baye korwa ase Abaisraeli, bache ase obosio bwao, babe bagonkorera ase emeremo y’obokuani, ere Haroni amo nabamura baye Nadabu, na Abihu, na Eleazari, na Itamari. 2Oroiserie Haroni, momura omino, chianga chinchenu chi’obonene na echi’oboseera. 3Otebie abaroisia abang’aini, abwo naeire obong’aini ne chisemi, baroiserie Haroni chianga, erinde aatananwe abe ogonkorera ase emeremo y’obokuani. 4Ne chianga baramoroiserie nachio echi: Egesembe ki’obokuani, na egesibao ki’obokuani, na eganchwa, na eganchwa ende erobekanirie egoika inse, na ekegogwa, na orokini. Bakorere Haroni amo nabamura baye chianga chinchenu, erio babe bagonkorera ase emeremo y’obokuani. 5Nabwo abaroisia bachiroisie korwa ase chiusi chie chitahabu, na echi’amarionya chire buru, ne chimonyinga, ne chimbariri, amo nechi’egatani engiya.
6“Bakore egesibao ki’obokuani korwa ase chiusi chie chitahabu na echi’amarionya chire buru, ne chimonyinga, ne chimbariri, amo nechi’egatani engiya chisisire; keroisigwe nomoroisia omong’aini. 7Egesibao ekio ki’obokuani kebe nebitwanga bibere bi’amareko, aase gekobwateranigwa. 8Orokini rw’okobwataneria egesibao ekio amo robe rw’egetambaa keria ki’egesibao, keroisirie korwa ase chiusi chie chitahabu, na echi’amarionya chire buru, ne chimonyinga, ne chimbariri, amo nechi’egatani engiya chisisire. 9Orente amagena abere a oiniki, na ase amagena ayio omang’ere amarieta ’abamura ba Israeli: 10amarieta atano na rimo ase rigena erimo, na atano na rimo ase rigena rinde, ase omoroberio bw’okoiborwa kwabo. 11Ase chisemi chi’omoroisia omanyete buya gotura na komang’a ekemanyererio, omang’e amarieta ’abamura ba Israeli ase amagena aria abere. Erio obeke amagena aria ase ebikonde bie chitahabu. 12Oyabeke ase ebitwang’a bi’amareko bi’egesibao keria ki’obokuani, abe ase okoinyora abamura ba Israeli. Naboigo Haroni abogorie amarieta abo ase amareko aye abere, abe ekeinyorio ase obosio bw’Omonene botambe. 13Oture ebikonde bibere bi’etahabu, 14na okore ebichanga bibere bie chitahabu chichenire, bisisire buna engori, bibwatanigwe nebikonde biria.
Egesembe ki’obokuani
(Okong’ 39:8–21)
15“Oroisie egesembe gi’ekina ase omokuani. Omoroisia omong’aini akeroisie ase egetambaa kere buna eki’egesibao ki’obokuani, korwa ase chiusi chie chitahabu, na echi’amarionya chire buru, ne chimonyinga, ne chimbariri, amo nechi’egatani engiya chisisire. 16Egesembe keria kebe keringire rimo. Obotambe bwaye bobe chisentimita emerongo ebere, na ibere, na obogare bwaye boigo. 17Obeke emeng’ororia ene y’amagena e rigori rinene ase egesembe keria. Ase omong’ororia bwe ritang’ani obeke saridio, na topasio, na sumaridi; 18na ase oyo o kabere alimasi, na safiro, na yasipi; 19na ase oyo o gatato hiakinto, na agati, na ametisito; 20na ase oyo o kane kurusolito, na oiniki, na berulo. Amagena ayio onsi abekwe ase ebikonde bie chitahabu. 21Amagena ayio nigo arabe ikomi na abere, abe namarieta ’abamura ba Israeli. Amarieta ayio amang’erwe buna omonto akomang’a ekemanyererio. Kera rigena ribe nerieta ri’egesaku ekemo ki’ebisaku biabo ikomi na bibere. 22Okore ebichanga bie chitahabu chichenire bisisire, bibekwe ase egesembe keria. 23Okore boigo chibonyi ibere chi’etahabu, ochibeke ase emego ya igoro y’egesembe keria. 24Osiberanie ebichanga ebi bibere bie chitahabu ase chibonyi chi’emego ya igoro y’egesembe keria. 25Chinsinyo chinde chi’ebichanga biria bibere ochisiberanie nebikonde biria bibere, naende obibwateranie bionsi ase ebitwanga bi’amareko bire bosio ase egesibao ki’obokuani. 26Okore chibonyi chinde ibere chie chitahabu, ochibeke ase egesembe keria ase emego ebere ya inse korwa nyuma, echigete egesibao. 27Naende okore chibonyi chinde ibere chie chitahabu, ochibwateranie ase ebitwanga biria bibere bi’amareko bi’egesibao bire bosio, ang’e nomobarero, igoro y’orokini rw’egesibao. 28Chibonyi chiria chibekire ase egesembe chibwateranigwe ne chibonyi chi’egesibao neusi eburu; erio egesembe keria kebeere orokini igoro, tigecha gosuka. 29Naboigo Haroni arabogorie amarieta ’abamura ba Israeli ase egesembe keria gi’ekina igoro y’enkoro yaye ekero agosoa ime y’Aase Aachenu, ayarente abe ekeinyorio botambe ase obosio bw’Omonene.
30“Obeke Urimu na Tumimu (engencho yaye omobaso na oboikeranu) ime y’egesembe gi’ekina bibe igoro y’enkoro ya Haroni, ekero akogenda ase obosio bw’Omonene. Ekero Haroni are ase obosio bw’Omonene abogorie ekiorokererio gi’ekina botambe ase engencho y’Abaisraeli.”
Chianga chinde chi’abakuani
(Okong’ 39:22–31)
31“Okore eganchwa korwa ase egetambaa keroisirie ne chiusi chire buru chioka. 32Obochore engoro gati gati, ase omotwe ogosoera, oyebeke ekenario buna egi’esati, techa gotandoka. 33Okore emegwekano y’amatunda e rikomomanga korwa ase chiusi chi’amarionya chire buru, ne chimonyinga, ne chimbariri, oyebeke eetanane omoringero o inse. Ase egati ya kera omogwekano bwe rikomomanga obeke chindege chie chitahabu. 34Naboigo ebe emegwekano ye rikomomanga bwateranie ne chindege chie chitahabu bietanane omoringero o inse bw’eganchwa. 35Haroni goika ayebeke ekero agokora emeremo y’obokuani, na eriogi rie chindege chiria riigweke ekero agosoa Aase Aachenu ase obosio bw’Omonene, na ekero agosoka, tabaisa gokwa.
36“Okore ebao y’etahabu echenire, na buna omonto akomang’a ekemanyererio omang’ere amang’ana ayio:” “Achenirwe ase Omonene”. 37Oyesiberanie bosio bw’ekegogwa ne chiusi chire buru. 38Haroni ayebogorie ase obosio bwaye igoro. Ase igo abogoreranie na korusia amamocho are nebiegwa ebiraatananwe, ebi Abaisraeli barabe bakoruera Omonene. Haroni nigo arabe okoyebogoria botambe ase obosio bw’Omonene.
39“Oroisie eganchwa entambe amo nekegogwa korwa ase chiusi chi’egatani engiya, na orokini rwe chiusi chire ne chirangi ao ao.
40“Erio oroiserie abamura ba Haroni chiganchwa, ne chinkini; naende obaroiserie ebigogwa emechoro bi’ogosika na ebi’oboseera: 41Obekere Haroni, momura omino, amo nabamura baye, chianga echio. Erio obaake amaguta, obaatanane na kobachena, babe bagonkorera ase emeremo y’obokuani. 42Obaroiserie chisirwari chi’egatani, chigoika amariagati abo, chibe chigotuba obogetirianda bwabo. 43Haroni na abamura baye goika bachibeke botambe ekero bagosoa Eema y’Omosangererekano, gose kobakogenda ase egesasimero gokora emeremo y’obokuani Aase Aachenu ime, tibabaisa kwerentera okomocha na gokwa. Oko nogochika koragenderere ase Haroni na ororeria rwaye.”
Currently Selected:
OKONG’ANYA 28: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
