OKONG’ANYA 24
24
Okobwatana kw’ogotianania gokobekwa ekemanyererio
1Erio Omonene agatebia Musa, “Tiira gocha aa asende, aye amo na Haroni, na Nadabu, na Abihu, na abagaaka b’Abaisraeli emerongo etano na ebere. Mobeere aare ake, motung’ame inse monsasime. 2Naye Musa bweka orachiche ong’ike ang’e, korende abwo bande tibang’ika ang’e. Na abanto barabwo tibachicha amo naye nonya ng’ake.”
3Musa akagenda agatebia abanto amang’ana onsi aya Omonene akwanete, na amachiko aye onsi. Abanto bonsi bakamoiraneria ase eriogi erimo, bakabora, “Amang’ana ayio onsi Omonene akwanire inatoyakore.” 4Erio Musa akarika amachiko onsi ay’Omonene. Akaimoka mambia chuni, akaagacha egesasimero egetunwa mbarabare, agatenenia amagena ikomi na abere abe ekeinyorio ki’ebisaku ikomi na bibere bi’Abaisraeli. 5Agatoma abamura b’Abaisraeli barue ebing’wanso bi’ogosambwa, banyenyere Omonene chieri chi’ekeng’wanso ki’omorembe. 6Musa akabogoria ekeng’ese ki’amanyinga aya, akayabeka egetaabo ime, na ekeng’ese kende akanyororokeria egesasimero. 7Erio akaimokia ebuku y’okobwatana kw’ogotianania agasomera abanto baigwe. Barabwo bakabora, “Natoyakore onsi aya Omonene akwanire, na tomoigwere.”
8Musa akaimokia amanyinga aria arenge egetaabo ime, akanyororokeria abanto, akabora, “Aya namanyinga ’okobwatana okwo Omonene akorire ase ogotianania nainwe ase okobaa amachiko aya onsi.”
9Erio Musa, na Haroni, na Nadabu, na Abihu, na abagaaka baria emerongo etano na ebere b’Abaisraeli bagatiira gochia egetunwa igoro, 10bakarora Nyasae bw’Abaisraeli. Inse y’amagoro aye nigo arenge buna amagena e rigori rinene akorokwa safiro, are nobokenonoku buna obore igoro. 11Omonene tarambora okoboko kwaye kobakorera bobe abagaaka baria b’Abaisraeli. Barabwo kobarorire Nyasae, bakaria na konywa.
Musa ase egetunwa gia Sinai
12Omonene agatebia Musa, “Tiira gocha aa asende egetunwa igoro, obeere aiga, na inche nkoe chibao chi’amagena chire namachiko onsi aya narikireo, ayio ogochia kworokereria abanto.” 13Musa akaimoka amo nomosomba oye Yoshua, agatiira gochia egetunwa kia Nyasae. 14Agatebia abagaaka baria, “Motoganye aiga goika ekero torairane asemore. Rora Haroni na Huri nao bare aiga amo nainwe; onye omonto ore nobokong’u bonde, agende ababorie.”
15Erio Musa agatiira gochia egetunwa igoro, ne riire rikagetuba. 16Obonene bw’Omonene bogacha bokabeera igoro y’egetunwa gia Sinai, ne riire rikagetuba ase engaki y’amatuko atano na rimo. Rituko ria gatano na kabere Omonene akarangeria Musa korwa riire ime. 17Ase Abaisraeli obonene bokarorekana buna omorero ogosiria, ase egetunwa igoro. 18Musa agasoa riire ime, agatiira gochia egetunwa igoro, akabeera aroro ase engaki y’amatuko emerongo ene, omobaso na obotuko.
Currently Selected:
OKONG’ANYA 24: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
