OKONG’ANYA 25
25
Ebiegwa bi’Obomenyo Obochenu bw’Omonene
(Okong’ 35:4–9)
1Omonene agakwana na Musa, akamotebia, 2“Batebie Abaisraeli ng’a bandetere ebiegwa; aye obisangererie korwa ase kera omonto oyoranche kobirua asende. 3Na ebiegwa orasangererie korwa asebare nabio ebi: chitahabu, ne chifeta, ne chitaai; 4chiusi chi’amarionya chire buru, ne chimonyinga, ne chimbariri; egatani engiya na amanya e chimbori; 5amasankwa e chimingichi aakire etaago, na amasankwa amaterere e ching’iti chia rooche, ne chibao chi’emekonge; 6amaguta e chitaya, na ebinto bi’okoroisia amaguta akweakwa, na ebi’okoroisia ubani; 7amagena e rigori rinene, buna oiniki na ayande, akobekwa ase egesibao ki’omokuani na ase egesembe kiaye. 8Obatebie bandoiserie Obomenyo Obochenu, na inche inyare komenya ase egati yabo. 9Mondoiserie Obomenyo na ebinto bionsi ebirabeo, buna ndakworokie.”
Esanduku y’okogacha chibao chirikire oborori
(Okong’ 37:1–9)
10“Mondoiserie Esanduku ye chibao chi’omokonge. Obotambe bwaye bobe obw’ekerengo ki’amaboko abere na ekeng’ese, na obogare bwaye okoboko okomo na ekeng’ese, na obotambe bwaye gochia igoro okoboko okomo na ekeng’ese. 11Oyeoome netahabu echenire ime na isiko, oyeetananie omong’ororia bw’etahabu. 12Okore chibonyi inye chie chitahabu chinyititoire, ochibeke ase amagoro aye ane, ibere ase kera rikere. 13Obaache emiaro ebere y’emekonge, oyeoome netahabu. 14Osoyie emiaro eyio ase chibonyi ime ase okobogoreria Esanduku eria. 15Emiaro eyio goika ebe ime ase chibonyi echio, terusigwao. 16Ime y’Esanduku eria obeke chibao echi chirikire oborori, echi ndakoe.”
Oboikaranso bw’Amabera
17“Oroisie ekemumeko gi’etahabu echenire kebe Oboikaranso bw’Amabera. Obotambe bwaye bobe ekerengo ki’amaboko abere na ekeng’ese, na obogare bwaye okoboko okomo na ekeng’ese. 18Naende okore emegwekano y’abakerubi babere ey’etahabu esunyuntire, oyebeke ase chinsinyo ibere chi’Oboikaranso bw’Amabera, 19oyomo ase kera ensinyo. Oyekore ebe egento ekemo n’Oboikaranso bw’Amabera. 20Abakerubi abwo barambore chimbaba chiabo igoro y’Oboikaranso bw’Amabera, babobekere ekiriri, na amasio abo abe achikaine, na barabwo barigererie Oboikaranso bw’Amabera. 21Oterekerere Oboikaranso bw’Amabera igoro y’Esanduku eria. Erio obeke imeo chibao echi chirikire oborori, echi ndakoe. 22Agwo ninchiche ng’umerane naye. Korwa igoro y’Oboikaranso bw’Amabera, gati‐gati y’abakerubi aba babere bare igoro y’Esanduku ere ne chibao chirikire oborori, nimbe ngokwana naye igoro y’amachiko aya ngochia koa Abaisraeli goetera asore.”
Emesa y’emegati erabe ekoruegwa ase Nyasae
(Okong’ 37:10–16)
23“Oroisie emesa ye chibao chi’emekonge. Obotambe bwaye bobe obw’ekerengo ki’amaboko abere, na obogare bwaye okoboko okomo, na obotambe bwaye gochia igoro okoboko okomo na ekeng’ese. 24Oyeoome netahabu echenire, oyeetananie omong’ororia bw’etahabu. 25Erio obeke orosingo robe nobogare bong’ana egesanyi gi’okoboko, na oroetananie omong’ororia bw’etahabu. 26Okore chibonyi inye chie chitahabu ase emesa eria, ochibeke ase chikoona inye ase amagoro aye, 27ang’e norosingo; na emiaro esoigwe imeo, erinde emesa enyare kobogorerigwa. 28Obaache emiaro eria korwa ase emekonge, oyeoome netahabu, nero emesa erabogorerigwe. 29Oroisie chinteru na ebitaabo ase ubani, ne chisani, korwa ase ebio bagocha koumora ebinyugwa ebikoruegwa. Obiroisie bionsi korwa ase chitahabu chichenire. 30Ase emesa eyio obeke emegati erabe ekoruegwa asende, imbe nkoyerora botambe.”
Ekebekerero gie chitaya
(Okong’ 37:17–24)
31“Oroisie ekebekerero gie chitaya gi’etahabu echenire esunyuntire, okeroisie na enterekerero amo ne ritina na emegwekano y’amamumu na ebisicha, bionsi bibe egento ekemo. 32Chinsagia isano nemo chibe chigosoka korwa ase ritina, isato korwa ase ensemo eyemo, na isato korwa ase ensemo ende. 33Orosagia rwe ritang’ani robe nemegwekano etato y’ebisicha binga buna ebi’omolozi, kera ekemo kebe ne rimumu na egesicha, na orosagia rwa kabere boigo robe nemegwekano etato y’ebisicha binga buna ebi’omolozi; ne chinsagia chionsi isano nemo chibe boigo. 34Ritina rinyene ri’ekebekerero keria ribe nemegwekano ene y’ebisicha binga buna ebi’omolozi, kera ekemo kebe ne rimumu na egesicha. 35Rimumu erimo ribe inse ya kera chinsagia ibere chigosoka korwa ase ritina. Ase ayio amamumu abe inse ye chinsagia echio isano nemo, chiroisigwe chibe egento ekemo ne ritina. 36Amamumu ayio amo ne chinsagia biroisigwe bibe egento ekemo ne ritina, bionsi biroisigwe korwa ase ribomba erimo ri’etahabu echenire esunyuntire.
37“Oroisie chitaya isano na ibere, ochibeke igoro y’ekebekerero keria, erinde chimoreke gochia bosio. 38Ebinachi ne chindogio chiaye biroisigwe korwa ase chitahabu chichenire. 39Okorere chitahabu chichenire chikiro emerongo etano ase okoroisia ekebekerero gie chitaya amo nebikorero biaye. 40Origererie buya obikore buna nakworogetie ase egetunwa.”
Currently Selected:
OKONG’ANYA 25: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
