OKONG’ANYA 20
20
Amachiko ikomi a Nyasae
(Okoir 5:1–21)
1Nyasae agakwana amang’ana aya onsi, agateba, 2“Inche ninche Omonene, Nyasae oo, oyokorusetie ase ense ya Misiri, ase ense y’obosomba.
3“Toba ne chinyasae chinde otatiga inche.
4“Tobaisa gwekorera omogwekano bw’ogosasimwa, omogwekano o getongwa kende gionsi kere igoro, gose kere ense, gose kere ime ase amache inse y’ense. 5Tobaisa gosasima gose gokorera emegwekano ekorire, ekiagera inche ninche Omonene, Nyasae oo, Nyasae bwe risemi. Ase engencho y’amabe ’abaibori nigo nkoa abana egesusuro goika ekiaare kia gatato na egia kane, abwo bangechete. 6Korende nigo nkoborokia obwanchani bwane botari koera goika ebiaare chilifu, ase abwo banyanchete na babwatete amachiko aane.
7“Toriatora bosa na korikorera bobe erieta ri’Omonene, Nyasae oo, ekiagera Omonene tagotiga komoa egesusuro omonto oria okoriatora bosa na korikorera bobe erieta riaye.
8“Riinyore rituko ri’Esabato, orirende ribe richenu. 9Amatuko atano na rimo okore emeremo yao yonsi, 10korende rituko ria gatano na kabere nerituko ri’Esabato, riatananetwe na Nyasae oo. Ase rituko erio tokora emeremo ende yonsi, aye, gose omwana oo, omomura gose omoiseke, nonya nomosomba oo, omomura gose omoiseke, gose chitugo chiao, gose omomenyi ore mwao. 11Naki ase amatuko atano na rimo naro Omonene atongete igoro na ense, ne chinyancha, na bionsi ebire imeo; agatimoka ase rituko ria gatano na kabere. Ase ayio Omonene agasesenia rituko ri’Esabato, akariatanana ribe richenu.
12“Sika iso na nyoko, nario oramenye amatuko amange ase ense eye Omonene, Nyasae oo, akoeire.
13“Toita.
14“Totomana.
15“Toiba.
16“Tomotebera omogisangio oo oborimo.
17“Tobaisa kogania enyomba y’omogisangio oo. Tobaisa kogania omokungu bw’omogisangio oo, nonya nomosomba oye, omomura gose omoiseke, gose eng’ombe yaye, gose etigere yaye, gose kende gionsi omogisangio oo abwate.”
Abanto bakoondoka
(Okoir 5:22–23)
18Ekero abanto bonsi baroche okomesa, na koigwa enkoba na eriogi ri’egetureri na korora egetunwa gekoimoka erioki, bakaiguswa, bagatenenera aare. 19Barabwo bagatebia Musa, “Kwana naintwe aye, na intwe inatotegerere, korende onye Nyasae ogokwana naintwe, nigo torakwe.”
20Musa akabairaneria, “Timoondoka! Naki Nyasae nigo achire kobateema inwe, erio agere mogenderere komoiroka, erinde timokora ebibe.” 21Ase igo abanto bagatenena aare, ekero Musa agendete ang’e ase riire riria rimwamu, ase Nyasae arenge.
Amachiko igoro y’ebisasimero
22Omonene agatebia Musa, “Amang’ana aya naro oratebie Abaisraeli: Inwe abanyene mwarorire ng’a nigo nakwanire nainwe korwa igoro. 23Timwekorera chinyasae chinde chie chifeta gose echie chitahabu chi’ogosasimwa; monsasime inche bweka. 24Ong’agachere egesasimero ki’amaroba, onduere ebing’wanso igoro yaye, ebing’wanso bi’ogosambwa, na ebi’omorembe, korwa ase ching’ondi chiao, ne chiombe chiao. Kera aase ndatebe onsasimere, ninchiche asore, ngosesenie. 25Onye gokong’agachera egesasimero ki’amagena, tokeagacha namagena abaachire; ekiagera onye gokoyabaacha nebikorero biao, rirorio kwayabekire riko. 26Naende totiirera ebiriinero igoro, gokogenda ase egesasimero, egetirianda kiao tikebaisa kooroka.”
Currently Selected:
OKONG’ANYA 20: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
