OKONG’ANYA 18
18
Yetero ogocha gokwania Musa
1Yetero, omokuani o Midiani, ise biara Musa, akaigwa amang’ana onsi aya Nyasae akoreire Musa na Abaisraeli, abanto baye, na buna Omonene abang’anyetie korwa Misiri. 2Erio Yetero agacha, akarentana Sipora, moka Musa. Musa konya omoiranirie ase ise. 3Naboigo akarentana Gerisomu na Elieseri, abana abamura babere ba Musa. (Musa nigo atebete, “Nabeire omomenyi ase ense engeni”, na akaroka omwana oyomo Gerisomu. 4Naende agateba, “Nyasae o tata obeire omokonyi one, agantooria korwa ase ogoita gwa Farao”, na akaroka oria onde Eliezeri.)
5Nabo Yetero, ise biara Musa, amo na moka Musa na abana baye babere, bagacha ase erooro aase Musa konya atoorire ase egetunwa kia Nyasae. 6Agatoma amang’ana ase Musa, okomotebia, “Inche Yetero, iso biara, nachire amo na mokao na abana baye babere.” 7Erio Musa agasoka komorotota, agatung’ama na komonyunyunta. Ekero bakwananirie bagasoa ase eema. 8Musa agatebia ise biara aya onsi Omonene akorerete Farao amo n’Abamisiri ase engencho y’Abaisraeli, na obokong’u bwonsi obwo banyorete inchera, naende buna Omonene abatooretie. 9Yetero akagoka ase amaya onsi Nyasae akorerete Abaisraeli ase okobatooria korwa ase amaboko ’Abamisiri, 10akabora, “Omonene atogigwe, oyo obatooretie abanto baye korwa ase amaboko ’Abamisiri, na korwa ase Farao, obatooretie korwa ase obosomba obwo. 11Bono namanyire ng’a Omonene nomonene kobua chinyasae chinde chionsi, ekiagera atooririe abanto baye korwa ase Abamisiri abwo babaenenerete.” 12Erio Yetero akarentera Nyasae ekeng’wanso ki’ogosambwa na ebing’wanso binde bi’okonyenywa. Haroni amo nabagaaka bonsi b’Abaisraeli bagacha bakaragera amo na ise biara Musa, ase obosio bwa Nyasae.
Abagambi bagochorwa
(Okoir 1:9–18)
13Rituko ria kabere Musa agaikaransa kogamba ebina bi’abanto; na abanto nigo barengeo bamoetanaine korwa mambia goika mogoroba. 14Ekero ise biara Musa aroche onsi aya Musa are gokorera abanto, akamoboria. “Inki eke ogokorera abanto? Naki oikaransete aye bweka, na abanto bagoetanaine korwa mambia goika mogoroba?”
15Musa akamoiraneria, “Nekiagera abanto bagonchichera, bakorigia oboraai bwa Nyasae. 16Ekero bomanire nigo bagocha asende, na inche nabagambera ebina biabo na kobamanyia emeroberio ya Nyasae na amachiko aye.”
17Yetero agatebia Musa, “Enchera eye y’okobagambera ebina biabo teri engiya. 18Nigo okorosigwa, aye amo nabanto aba bonsi bare aa. Naki emeremo eye nemerito mono asore, tokonyara koyekora aye bweka. 19Bono ntegerera, ngotebie chisemi chingiya orakore, na Nyasae nabe amo naye. Aye kabe oyo ogotenenera abanto ase obosio bwa Nyasae, na komoirera amang’ana abo. 20Goika oborokererie amachiko na emeroberio, na obatebererie buna ebagwenerete babe na gokora. 21Korende ochore abanto abamoirogete Nyasae, abegenwa, abatakorigia riaaki, abaranyare koba abaraai b’abanto b’emeganda elifu, ne rigana, na emerongo etano, na ikomi. 22Otige barabwo babe bakogambera abanto ebina bia botambe. Ebina ebikong’u birobio bakobirentere, korende ebire ebike babigambe barabwo boka. Ase enchera eyio egurube yao tekoba endito mono, ekiagera barabwo mbayebogorie amo naye. 23Korakore igo, buna Nyasae aragochikere, aye nonyore chinguru chi’okogenderera, na abanto aba bonsi nabagende chinka chiabo bare nomorembe.”
24Musa agancha amang’ana aya ise biara amosemetie. 25Agachora abanto b’Abaisraeli abaranyare gokora emeremo eyio, akababeka babe abaraai b’Abaisraeli, b’emeganda elifu, ne rigana, na emerongo etano, na ikomi. 26Barabwo bakaba bakogamba ebina bi’abanto botambe. Ebina ebikong’u baba bakobirentera Musa, korende ebire ebike baba bakobigamba abanyene.
27Erio Musa agakooba ise biara, akamotiga okogenda ase ense yaye.
Currently Selected:
OKONG’ANYA 18: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
