OKONG’ANYA 14
14
Okwamboka Enyancha Embariri
1Omonene agakwana na Musa, akamotebia. 2“Batebie Abaisraeli ng’a bairane gochia Pi‐Hahiroti, batoore agwo ase egati ya Migidoli na enyancha kororia Baali‐Sefoni ase enyancha mbarabare. 3Farao narengererie ng’a Abaisraeli batantanire enchera bakogenda, na erooro yabatangire tibagenda. 4Inche ninkong’ie enkoro ya Farao, ache kobabwatia korwa nyuma yaino, na inche ninyenyorere ogotogigwa ase okobua Farao amo nomoganda oye bwonsi, na Abamisiri bamanye ng’a ninche Omonene.” Abaisraeli bagakora buna batebetigwe.
5Ekero Farao, omoruoti o Misiri, atebetigwe ng’a Abaisraeli batamire, ere amo nabasomba baye bakaonchora ebirengererio biabo, bagateba, “Inki eke twakora? Tokaa Abaisraeli ribaga korua aa ase barenge gotokorera.” 6Farao akabeka egari yaye y’esegi ang’e, akaira abarwani baye amo nere. 7Naende akaira chigari amagana atano na rimo, echi achorete, amo ne chigari chinde chionsi, na abariini chituoni bachiriinete. 8Omonene agakong’ia enkoro ya Farao, omoruoti o Misiri, na ere akabwatia Abaisraeli korwa nyuma, ekero barabwo bang’anyete bare nobomwenu. 9Abamisiri bakababwatia korwa nyuma amo ne chibarasi chionsi, ne chigari chia Farao, na abariini chibarasi chiaye, na abarwani baye bonsi, bakabanyora batoorire enyancha mbarabare, ang’e na Pi‐Hahiroti kororia Baali‐Sefoni.
10Ekero Farao abeire ang’e kobaikeera, Abaisraeli bakerigereria, bakarora Abamisiri bakobabwatia korwa nyuma. Erio agwo barabwo bakaba nobwoba obonene, bakarera ase Omonene. 11Bagatebia Musa, “Inee! Chimbeera tichiarenge Misiri? Nase ayio ogatorenta toche gokwera aa ase erooro? Igo gwatokorera bobe ekero gwatorusia korwa Misiri! 12Titwagotebetie ayio aaria Misiri? Tokagotebia ng’a: Totige tokorere Abamisiri. Naki anga mbuya tware gokorera Abamisiri kobua gokwera aiga ase erooro.”
13Musa akairaneria abanto, “Timwoboa, motenene bokong’u! Igo namorore buna Omonene arabatoorie rero; naki Abamisiri aba moroche rero iga, timokobarora naende nonya ng’ake. 14Omonene nabarwanere inwe, na inwe mokire‐kiri rioka.”
15Omonene akaboria Musa, “Inki okorera asende? Batebie Abaisraeli bagenderere bosio. 16Aye imokia enyimbo yao, na orambore okoboko kwao igoro y’enyancha, erinde yaatananeke, Abaisraeli banyare goeta egati y’enyancha ase ense enkamoku. 17Rora, ninkore chinkoro chi’Abamisiri chibe chinkong’u, barabwo mbababwatie korwa nyuma. Nabo inche inyenyorere ogotogigwa ase okobua Farao amo nemeganda yaye yonsi, ne chigari chiaye, na abariini chibarasi chiaye. 18Na Abamisiri nabamanye ng’a ninche Omonene, ekero nkwenyorera ogotogigwa ase okomobua Farao amo ne chigari chiaye na abariini chibarasi chiaye.”
19Erio omomalaika bw’Omonene, oyio otang’aine omoganda bw’Abaisraeli, akairana nyuma yabo. Ne riire riria riateneine buna esiiro bosio bwabo rikairana nyuma yabo, 20rikabeera gati y’omoganda bw’Abaisraeli na oyo bw’Abamisiri. Agwo riire riria rikabao amo nomosunte; korende ase obotuko riire rikarenta oborabu. Na ase obotuko obogima omoganda oyomo toikanete ang’e noyonde.
21Erio Musa akarambora okoboko kwaye igoro y’enyancha; na Omonene agasukia enyancha gochia nyuma ne chinguru chi’omwaga okorwa moocha okagusa obotuko obogima. Naboigo agakora enyancha koba ense enkamoku. Amache agaatananeka, 22na Abaisraeli bagaeta egati y’enyancha ase ense enkamoku. Amache akaba agotenena buna orwaki ensemo ya borio na ensemo ya bomosi asebare. 23Na Abamisiri bagasoa na kobabwatia gochia gati y’enyancha amo ne chibarasi chionsi chia Farao, ne chigari chiaye, na abariini chibarasi. 24Bwachia koba mambia, Omonene akaba origereretie omoganda bw’Abamisiri korwa ase esiiro y’omorero na eye riire, akabatantania. 25Omonene akagokora amagoro e chigari chiabo, goika bagasinywa kogenda bosio. Erio Abamisiri bagateba, “Tiga totame korwa ase Abaisraeli, ekiagera Omonene nkobarwanera are mamincha yaito intwe Abamisiri.”
26Omonene agatebia Musa, “Rambora okoboko kwao igoro y’enyancha, erinde amache airanerane igoro y’Abamisiri, ne chigari chiabo amo nabariini chibarasi.” 27Musa akarambora okoboko kwaye igoro y’enyancha, na ekero bogokiamoka, amache akairana ase konya are botambe. Abamisiri bagachaka gotama, bakamerwa naro. Naboigo Omonene akabasiria ase enyancha gati‐gati. 28Amache akairanerana, akamera chigari, na abariini chibarasi amo nomoganda bwonsi bw’abarwani ba Farao, abatunyanete Abaisraeli, gochia ase enyancha. Monto onde tatigara nonya noyomo. 29Korende Abaisraeli bakagenderera goeta egati y’enyancha ase ense enkamoku, amache akaba ateneine buna orwaki ensemo ya borio na ensemo ya bomosi asebare.
30Naboigo ase rituko riria Omonene atooretie Abaisraeli korwa ase amaboko ’Abamisiri; na Abaisraeli bakarora Abamisiri bakwete bacheng’enenete ase engegu y’enyancha. 31Na ekero Abaisraeli baroche buna Omonene aorokirie okobua kwaye okonene igoro y’Abamisiri, bakamoiroka Omonene, bakamwegena Omonene na Musa, omosomba oye.
Currently Selected:
OKONG’ANYA 14: EKEGUSIIBBLE
Highlight
Share
Copy
Want to have your highlights saved across all your devices? Sign up or sign in
OLD EKEGUSII BIBLE PROTESTANT EDITION
©Bible Society of Kenya, 2020
