OGOKORA KW’ABATOMWA 8

Ogochandwa na ogoserebanigwa kw’Abakristo

1Ase rituko riria emechando emenene egacha igoro ase ekanisa ya Yerusalemu; bonsi bagaserebanigwa gochia chinse chia Boyahudi na Samaria, otatiga abatomwa bataserebanetigwe. 2Abanto abegeni bagatindeka Stefano, bakamoreera okorera okonene. 3Korende Saulo agasaria ekanisa, agasoa kera enyomba akaba ogokurura abasacha na abakungu, na kobaira ase echela.

Filipo ase Samaria

4Na baria baserebanetigwe bakagenda chinsemo ne chinsemo, bakarandia ring’ana ria Nyasae. 5Filipo agatirimboka, agasoa omochie o Samaria, akabaranderia Kristo. 6Emeganda yonsi ase omoyo oyomo bagategerera amang’ana onsi Filipo are gokwana, ekero bamoigwete na korora ebikone ebiarenge gokora. 7Ekiagera abange babwatire nebirecha bi’eubi, na ebirecha ebi bikarwa asebare, bikarera ase egeturi ekenene; abanto abarenge amagata, na baria barenge ebirema bakagwenigwa. 8Ase igo omogoko omonene okaba ase omochie oria.

Simion omorogi

9Omonto oyomo ore korokwa Simion, agwo ritang’ani nigo arenge gokora oborogi ase omochie oria; abanto ba Samaria bakamokumia, ekero are goteba ng’a ere omonyene nomonto omonene. 10Bonsi, abake na abanene, bakamotegerera, bagateba, “Omonto oyo nigo are okobua koria kwa Nyasae gokorokwa Okobua Okonene.” 11Bakamotegerera, ekiagera ase amatuko amange nigo barenge gokumia ase oborogi bwaye. 12Korende ekero bachia kwegena Filipo, gakorandia amang’ana amaya igoro y’oboruoti bwa Nyasae na erieta ria Yeso Kristo, bakabatiswa, abasacha na abakungu. 13Nonya n’Simion omonyene akeegena, na nyuma kabatisirwe akagenderera koba amo na Filipo. Ekero aroche ebikone na ogokora okonene gwe chinguru biakoretwe, agakumia.

Petero na Yohana ase Samaria

14Na ekero abatomwa ba Yerusalemu bachia koigwa ng’a Abasamaria banchire ring’ana ria Nyasae, bakabatomera Petero na Yohana. 15Barabwo bagatirimboka, bakabasabera, erinde banyore Omoika Omochenu, 16ekiagera konya torabaikera nonya noyomo obo. Barabwo nigo babatisetwe rioka ase erieta ri’Omonene Yeso. 17Erio Petero na Yohana bakababekera amaboko abo, na barabwo bakanyora Omoika Omochenu. 18Ekero Simion achia korora ng’a abanto nigo bakoegwa Omoika ase okobekerwa amaboko nabatomwa, akabarentera chibesa, 19agateba, “Ing’a nainche okobua oko, ng’a kera omonto ndabekere amaboko aane anyore Omoika Omochenu.”

20Korende Petero akamotebia, “Chifeta chiao chisire amo naye, ekiagera okagete ng’a nonyore ekeegwa kia Nyasae ase chibesa! 21Tori negetari gose nensemo ase ring’ana eri, ekiagera enkoro yao teri boronge ase obosio bwa Nyasae. 22Ase ayio onchoka korwa ase obobe bwao obo, osabe Omonene, erinde, keranyarekane, bwaberwe ebirengererio bi’enkoro yao. 23Naki nakororire ng’a nore nobororo buna endorwe, naende nigo ore ase egesibo ki’ebibe.”

24Simion akairaneria, “Insabera inwe ase Omonene, ng’a amang’ana aya mwakwanire tabaisa gocha konyora nonya nerimo riabo.”

25Erio kabaorokirie oborori na korandia ring’ana ri’Omonene, bakairana Yerusalemu, bakorandia amang’ana amaya ase ebichie ebinge bi’Abasamaria.

Filipo na Omoetiopia omogomba

26Omomalaika bw’Omonene agatebia Filipo, “Imoka ogende ensemo ya irianyi goika enchera eria egotirimboka korwa Yerusalemu ekogenda Gasa.” Eye nenchera y’erooro. 27Akaimoka, akagenda. Na rora, ekero are inchera, akarora omonto bw’Etiopia, omogomba, oyobegetwe igoro y’enibo yonsi ya Kandake, eting’ana ya Etiopia. Ere nigo agendete Yerusalemu gosasima. 28Ekero arenge koirana na oikaransete ase egari yaye, nigo arenge gosoma ebuku y’omobani Isaya. 29Erio Omoika ogatebia Filipo, “Genda ang’e negari eyio, ogende nero.” 30Filipo akaminyoka gochia asare, akamoigwa ogosoma ebuku y’omobani Isaya, akamoboria, “Inee! Kwamanyire buya aya ogosoma?”

31Akamoiraneria, “Naki ndanyare komanya otatiga omonto antang’ane?” Agatebia Filipo ariine, aikaranse amo nere. 32Amang’ana e ririko ayarenge gosoma naro aya:

“Akairwa buna eng’ondi egochia konyenywa,

na buna emanwa etari kwana ase omonachi bw’amarionya,

naboigo tamaanorete omonwa oye.

33Ase ogwekeyia kwaye ekina kiaye gekarusigwa.

Ning’o oranyare gototebia ororeria rwaye?

Ekiagera obogima bwaye bwarusigwe ase ense.”

34Omogomba oria akaboria Filipo, “Koranche ontebie igoro ya ng’o omobani oyo agokwana, igoro yaye omonyene gose igoro y’omonto onde?”

35Filipo agachaka gokwana; agachakera korwa ase ririko eri, akamoranderia amang’ana amaya igoro ya Yeso. 36Ekero bagendererete inchera, bagaika aase amache arenge. Oria omogomba akabora, “Rora amache aya! Inki kegontanga timbatiswa?”

[ 37Filipo akamotebia, “Koregene nenkoro yao yonsi, nenyarekane.” Akairaneria, “Negenire ng’a Yeso Kristo nere Omwana o Nyasae.”] 38Agachika egari eria etenene, na bonsi babere, Filipo na oria omogomba, bagatirimboka gochia ase amache ime, erio Filipo akamobatisa. 39Ekero bachia korwa ase amache, Omoika bw’Omonene ogataboria Filipo; omogomba oria tamorora naende, korende nigo agendete enchera yaye ore nomogoko. 40Korende Filipo akarorekana ase Asoto, na ekero arenge goeta, akarandia enchili ase emechie yonsi, goika agaika Kaisaria.

Currently Selected:

OGOKORA KW’ABATOMWA 8: EKEGUSIIBBLE

Highlight

Copy