OGOKORA KW’ABATOMWA 7

Ogokwana gwa Stefano

1Omokuani omonene akaboria Stefano, “Inee! Amang’ana ayio naboigo are?”

2Stefano akairaneria,

“Abaminto na abatata, ntegerere. Nyasae bw’obonene naorokerete sokoro yaito Ibrahimu, ekero arenge ase Mesopotamia, ritang’ani ataramenya Harani, 3akamotebia: Karue ase ense yao, na ase eamate yao, ogende goika ase ense ndakworokie. 4Erio akarua ase ense y’Abakalidayo, akamenya Harani. Nyuma ise gakure, Nyasae akamong’anyia korwa aroro goika ense eye inwe momenyete bono. 5Tamoete omwando ime aa, nonya koreng’ana ase akobeka okogoro, korende akamoriera eira ng’a namoe ense eria ebe obomenyo bwaye, na obw’oroiboro rwaye nyuma yaye, nonya tarenge nomwana. 6Nyasae agakwana iga: Oroiboro rwa Ibrahimu inababe abamenyi ase ense y’abanto bande, na barabwo inababakore babe abasomba babo, na kobakorera bobe, ase engaki y’emiaka amagana ane. 7Nyasae agateba: Ninkegambie ekina egesaku keria kerabakore babe abasomba babo, na nyuma y’ayio nabaruo, na barabwo nabansasimere aase aiga. 8Akamoa okwaroka buna ekemanyererio gi’okobwatana. Erio Ibrahimu akaibora Isaka, akamosara rituko ria gatano na gatato. Isaka akaibora Yakobo, na Yakobo akaibora baria ikomi na babere, abagaaka baito ba kare.

9“Baria abagaaka baito ba kare bakarorera Yusufu ribero, bakamoonia gochia Misiri. Korende Nyasae akaba amo nere, 10akamorusia ase emechando yaye yonsi, akamoa ogwancherwa na obong’aini ase obosio bwa Farao, omoruoti o Misiri; ere akamobeka akaba gavuna igoro ya Misiri na enyomba yaye yonsi. 11Erio enchara ekaba igoro ase ense yonsi ya Misiri na Kanani, na emechando emenge, ne chisokoro chiaito tichianyora endagera echiisanete. 12Korende Yakobo gachia koigwa ng’a endagera nekare Misiri, agatoma chisokoro chiaito aroro ase orogendo rwe ritang’ani. 13Ase orogendo rwa kabere Yusufu akemanyekania ase bamura bamwabo, na eamate ya Yusufu egacha, ekamanyekana ase Farao. 14Erio Yusufu agatoma abanto gochia korangeria Yakobo ise, na eamate yaye yonsi, abanto emerongo etano na ebere na batano. 15Yakobo agatirimboka, agaika Misiri; ere agakwera aroro, ere omonyene ne chisokoro chiaito. 16Bakabogorigwa goika Sekemu, bagatindekwa ase embeera eria Ibrahimu agorete ase chifeta korwa ase abana ba Hamori, aaria Sekemu.

17“Ekero eira eria Nyasae aete Ibrahimu yachia goika ang’e gokieranigwa, abanto baria bakamenteka na kobucha mono aaria Misiri, 18goika omoruoti onde akabekwa Misiri, oyotamomanyete Yusufu. 19Oyio agakorera egesaku giaito obong’ainereria, na agakorera chisokoro chiaito amabe, na barabwo bagachikwa ng’a batugute abana babo ebing’werere, erinde tibaba moyo. 20Ekero ekio Musa akaiborwa, ere nigo arenge omuya mono, akagwenera Nyasae. Akarererwa nyomba mwa ise ase engaki y’emetienyi etato. 21Ekero achia gotugutwa, omoiseke o Farao akamoira, ’akamotuga na komorera buna omwana oye. 22Musa akorokererigwa chisemi chionsi chia Misiri, akaba omokong’u ase amang’ana na ase ogokora.

23“Ekero akoorire emiaka emerongo ene, akarengereria ase enkoro yaye kogenda korora abamwabo, Abaisraeli. 24Akarora oyomo obo ogokorerwa bobe n’Omomisiri, akamokonya; agaakanera oria orenge gochandwa egesiomba, agaaka Omomisiri oria akamoita. 25Nigo akagete ng’a abamwabo mbamanye ng’a Nyasae nabae obosibore goetera ase okoboko kwaye, korende tibamanya. 26Rituko ria kabere akaorokera Abaisraeli babere ekero baare korwana, akarigia kobatorania agateba: Abaminto, inwe nabamo, nase ki mokorwana? 27Korende oria orenge gokorera oyomwabo bobe, akamosukeria are, agateba: Ning’o okobegete koba omonene gose omogambi asetore? 28Inee! Norigetie kong’ita buna gwaita Omomisiri oria igoro? 29Ase engencho y’amang’ana aya Musa agatama gochia ase ense ya Midiani, akamenya aroro buna omomenyi. Akaiborera abana babere abamura aroro.

30“Ekero emiaka emerongo ene yachia koera, omomalaika akamoorokera ase ogwoka kw’omorero ase egetutu aaria erooro y’egetunwa gia Sinai. 31Musa agakumia ase okorora koria, na ekero achia goika ang’e gokorora, eriogi ri’Omonene rikamochera, rigateba: 32Ninche Nyasaye bwe chisokoro chiao, Nyasae o Ibrahimu, na o Isaka, na o Yakobo. Musa akaiguswa, tarenge na boremu bw’okorigereria. 33Omonene akamotebia: Rusia ebikoroto biao korwa ase amagoro ao, ekiagera aase agwo oteneine naase aachenu. 34Ekeene, narorire ogokorerwa bobe kw’abanto baane abare Misiri, naigure okorera kwabo, naikire mbasibore. Inchuo bono, ngotome goika Misiri.

35“Musa nere oyio bangete, bagateba: Ning’o okobegete koba omonene gose omogambi? Nere otometwe na Nyasae, goetera ase amaboko ’omomalaika oria omoorokerete ase egetutu keria, koba omonene na omosibori. 36Omonto oyio nere obarusetie korwa aroro nyuma gakorire amakumia na ebikone ase ense ya Misiri, na ase Enyancha Embariri, naende ase erooro ase engaki y’emiaka emerongo ene. 37Musa oyio nere otebetie Abaisraeli ng’a: Nyasae nabaimokerie omobani onga buna inche korwa ase egati y’abamino. 38Naende nere orenge ase baria basangererekanete ase erooro amo nomomalaika oyokwanete nere ase egetunwa gia Sinai, naende amo ne chisokoro chiaito; nere oetwe amang’ana ’obogima atoe. 39Omonto oyio chisokoro chiaito chikaanga koinoigwera, chikamosukeria are. Na ase ebirengererio biabo bakairana Misiri, 40bagatebia Haroni: Tokorere chinyasae echiranyare gototang’ana. Titomanyeti eriamonyorire Musa, oyotorusetie ase ense ya Misiri. 41Ase amatuko aria bagakora omogwekano bw’emori, bakarenta ekeng’wanso ase omogwekano oria basasimete, bakagokera emeremo y’amaboko abo. 42Korende Nyasae akeonchora korwa asebare, akabatiga basasime erioba na omotienyi ne ching’enang’eni chia igoro, buna arikire ase ebuku y’ababani:

“Inwe Abaisraeli,

Inee, ase engaki y’emiaka emerongo ene,

eyio mwarenge ase erooro,

mwandeterete ebing’wanso amo nokoruegwa konde?

43Yaya, nigo mwabogoretie Moleki, enyasae yaino,

na eng’enang’eni y’enyasae Refani,

emegwekano eyio mwakorete, erinde moyesasime.

Ase ayio nimbang’anyie goika ng’umbu ya Babeli.

44“Eema y’oborori nigo yarenge amo ne chisokoro chiaito ase erooro, buna Nyasae achigete, ekero atebetie Musa ng’a ayekore buna ekiorokererio keria aroche. 45Chisokoro chiaito nchiayenyorete buna omwando, chikayesoyia amo na Yoshua, ekero bairete ense y’ebisaku biria Nyasae aseretie korwa ase obosio bwe chisokoro chiaito. Nigo babete nero goika amatuko a Daudi, 46oyio onyorete ogwancherwa ase obosio bwa Nyasae, agasaba ng’a anyorere Nyasae o Yakobo obomenyo. 47Korende Sulemani nere omoagacherete enyomba. 48Korende Ere Oyore Igoro Mono tari komenya ase chinyomba chiagachire namaboko, buna omobani agoteba:

49“Igoro nekerogo kiane ki’obonene,

na ense negeteni kiane ki’amagoro.

Omonene otebire: Inyomba ki moranyare kong’agachera?

Gose ng’ai aase are ndanyare gotimokera?

50Inee! Tari okoboko kwane gwakorete ebinto ebi bionsi?

51“Inwe abamore nebigoti ebikong’u, motarogeti ase chinkoro, nonya namato, motaonchogeti; botambe nigo mokoamereria Omoika Omochenu. Buna chisokoro chiaino chiarenge gokora, nainwe nabo mogokora. 52Ning’o ase ababani chisokoro chiaino chitachandete? Na barabwo mbaitete baria babanete amang’ana igoro y’ogocha kw’oria Omonyene Oboronge. Inwe bono mwabeire abamorua na abamoiti. 53Inwe abamwanyorete amachiko ayarentetwe nabamalaika, korende timwayabwata.”

Ogokwa gwa Stefano

54Ekero bachia koigwa amang’ana aya, bakagechigwa ase chinkoro chiabo ime, bakamoromananeria amaino. 55Korende ere oichire n’Omoika Omochenu, akarigereria mono gochia igoro, akarora obonene bwa Nyasae, na Yeso oteneine ensemo y’okoboko gw’okorio kwa Nyasae. 56Agateba, “Rora, narorire igoro amaanokire, na Omwana‐o‐mwanyabanto oteneine ensemo y’okoboko gw’okorio kwa Nyasae.”

57Korende bagaaka egeturi ase eriogi rinene, bagakuneka amato abo, bakamorindokera bonsi amo, 58bakamosokia isiko y’omochie, bakamoaka amagena. Na abarori bakabeka chianga chiabo ase amagoro ’omomura oyomo, ore korokwa Saulo. 59Bagaaka Stefano amagena ekero arenge gosaba, ogoteba, “Omonene Yeso, ira omoika one.” 60Akabeka amaru inse, akarera ase eriogi rinene, “Omonene, tobabarera ebibe ebi!” Ochia gokoora gokwana aya, agakwa.

Na Saulo nigo aroche buya ase ogoitwa kwaye.

Currently Selected:

OGOKORA KW’ABATOMWA 7: EKEGUSIIBBLE

Highlight

Copy