OGOKORA KW’ABATOMWA 5

Anania na Safira

1Korende narenge omonto oyomo ore korokwa Anania. Amo na Safira mokaye akaoonia omogondo oye, 2korende akabisa ensemo ye rigori riaye, na mokaye nere namanyete aya. Akarenta ensemo eyemo, akayebeka ase amagoro ’abatomwa. 3Erio Petero akamoboria, “Anania, nase ki Saitani aichoire enkoro yao, okong’aina Omoika Omochenu na kobisa ensemo ye rigori ri’omogondo? 4Inee! Ekero otaraoonigwa, torenge oyoo? Naende ekero oonigwe, chibesa tichiarenge ase okobua kwao? Nase ki kwarengereretie ring’ana eri ase enkoro yao ime? Totebeti mwanyabanto oborimo, korende Nyasae.” 5Ekero Anania achia koigwa amang’ana aya, agaaka inse, agakwa. Omoondoko omonene okanyora abanto bonsi abaigwete aya. 6Abamura bakaimoka, bakamotuba egetambaa, bakamobogoria gochia isiko, bakamotindeka.

7Nyuma ye chinsa isato gachiaetire mokaye agasoa, ere tamanyete aya akoregete. 8Petero akamoboria, “Ntebia, igo mwaoonetie omogondo ase rigori erio?” Akairaneria, “Ee, ase rigori erio.”

9Petero akamoboria, “Naki abete mogancherana goteema Omoika bw’Omonene? Rora, amagoro abo abatindeka omosacha oo nao are agwo gesieri, na barabwo nabakobogorie aye gochia isiko.” 10Erio kegima akagwa ase amagoro aye, agakwa. Abamura baria bagasoa, bakamonyora okure. Erio bakamobogoria gochia isiko, bakamotindeka ase omosacha oye ensemo. 11Omoondoko omonene okabwata ab’ekanisa yonsi na abanto bonsi abaigwete aya.

Ebikone na amakumia bigakorwa nabatomwa

12Ase amaboko ’abatomwa ebikone ebinge na amakumia amange bigakoreka ase abanto. Na barabwo bonsi nigo barenge amo ase omoyo oyomo ase Egesona gia Sulemani. 13Onde tarenge korwa isiko obete noboremu kobwatana nabarabwo, korende abanto bakabasika ogosika okonene. 14Abamwegenete Omonene bakagenderera komenteka koba abange, abasacha na abakungu; 15nonya nase chinchera chinene bagasokia abarwaire isiko, bakabareria igoro ase amarere na emeito, erinde, ekero Petero agoeta, omorengari oye okune abande b’abwo. 16Nonya nabanto korwa ase emechie eria yaetanaine Yerusalemu bagesangereria, bakarenta abarwaire amo nabwo babwatire nebirecha bi’eubi, na bonsi bakagwenigwa.

Petero na Yohana bosio bw’ekegambero naende

17Omokuani omonene akaimoka, na bonsi abarenge amo nere; abwo nabwo barenge b’Abasadukai. Bagaichorwa ne ribero, 18bakabwata abatomwa, bakababeka ase echela ime. 19Korende omomalaika bw’Omonene akaigora ebisieri bi’echela botuko, akabasokia, agateba, 20“Genda, motenene ase Hekalu ime, motebie abanto amang’ana onsi igoro y’Obogima obo.” 21Na ekero bachia koigwa aya, bagasoa Hekalu ime ekero kia mambia, bakorokereria.

Ekero omokuani omonene na abwo barenge komo bacha, bagasangereria abanto b’ekegambero na abagaaka bonsi b’Abaisraeli, bagatoma abanto ase echela, erinde barente abatomwa baria. 22Korende ekero abarendi bachia goika, tibabanyora echela ime. Bakairana, bagateba, 23“Echela nigo twayenyora esiekire buya kegima, na abarendi bateneine bisieri, korende twachia koigora titwanyora monto onde ime.” 24Na ekero omonene bw’abarendi be Hekalu na abakuani abanene bachia koigwa amang’ana aya, bagasogwa nomoichano omonene ase engencho yabo, naki arabe amang’ana aya. 25Omonto oyomo agacha, akabatebia, “Rora, abanto baria mwabegete echela ime nigo bateneine ase Hekalu ime kworokereria abanto.” 26Erio omonene bw’abarendi akagenda amo nabanto baye, bakabarenta, korende tari ase chinguru, ekiagera barenge nobwoba ng’a mbaakwe amagena nabanto.

27Ekero babarentire bakababeka ase ekegambero. Omokuani omonene akababoria, 28“Inee! Titwabakanetie bokong’u ng’a timworokereria ase erieta eri? Na rora, mwaichoirie Yerusalemu nokworokereria kwaino, naende morigetie korenta amanyinga ’omonto oria igoro asetore.”

29Korende Petero na abatomwa bande bakairaneria, “Netogwenerete koigwera Nyasae kobua mwanyabanto. 30Nyasae bwe chisokoro chiaito obogetie Yeso, ere inwe mwaitete, mokamosunga ase omote. 31Nyasae akamoimokereria igoro ase ensemo y’okoboko kwaye gw’okorio abe Omoraai na Omotooria, erinde aonchore Abaisraeli, abae okwaberwa kw’ebibe. 32Intwe na Omoika Omochenu, oyio Nyasae aeire bonsi abamoigwerete, nigo tore birori ase amang’ana aya.”

33Ekero bachia koigwa aya bakagechigwa, bakarigia kobaita. 34Korende Omofarisai oyomo ore korokwa Gamalieli, oyomo bw’ekegambero, omworokia bw’amachiko, omonto osikire nabanto bonsi, agachika ng’a abanto aba babekwe isiko ake. 35Akabatebia, “Inwe abasacha b’Abaisraeli, erende buna morakorere abanto aba. 36Naki ase amatuko aetire Theuda naimoka, agetogia ng’a ere nomonto omonene; abanto koreng’ana amagana ane bakabwatana nere, korende ere agaitwa, na abatunyani baye bonsi bagaserebekana, bagasira. 37Nyuma yaye Yudas Omogalili nere akaimoka ase amatuko aria ekero abanto baare korikwa, akang’usa abanto abange bamotunyane. Nere boigo agasira, na bonsi abamotunyanete bagaserebekana. 38Na bono nabatebirie, eatanane korwa ase abanto aba, batige, ekiagera onye ring’ana eri, gose emeremo eye, neya mwanyabanto, nesarigwe, 39korende onye neya Nyasae, timokonyara koyesaria nonya ng’ake; mobaise kororekana ng’a Nyasae mokorwania!”

40Bagancha amang’ana aye, na ekero barangeretie abatomwa, bakabaaka, bakabachika tibakwana ase erieta ria Yeso. Erio bakabatiga bagende. 41Na barabwo bakarua ase ekegambero keria, bagogete ekiagera konya babarirwe ng’a bagweneire korenterwa obosooku ase engencho y’Erieta eri. 42Na kera rituko, ase Hekalu ime na ase chinyomba chiabo tibatigete kworokereria na korandia amang’ana amaya igoro ya Yeso, ng’a nere Kristo.

Currently Selected:

OGOKORA KW’ABATOMWA 5: EKEGUSIIBBLE

Highlight

Copy