OGOKORA KW’ABATOMWA 4

Petero na Yohana bosio bw’ekegambero

1Ekero barenge gokwana nabanto, abakuani abanene, na omonene bw’abarendi be Hekalu, na Abasadukai bakabaorokera, 2bagechirie, ekiagera abatomwa barenge kworokereria abanto na koraria okobokigwa korwa ase abakure gokonyorekana ase Yeso. 3Bakababwata, bakababeka echela ime goika mambia, ekiagera konya riabeire mogoroba. 4Korende abange ase abwo abaigwete amang’ana aya bakeegena; na omobaro bw’abasacha nigo obete koreng’ana chilifu isano.

5Mambia kobwakia, abanene babo, na abagaaka, na aborokia b’amariko bagasangererekana Yerusalemu, 6amo na Anasi, omokuani omonene, na Kayafa, na Yohana, na Aleksanderi, na bonsi abarenge b’eamate y’omokuani omonene. 7Ekero babegete abatomwa gati‐gati, bakababoria, “Inwe nase nguru ki, naende nase erieta ria ng’o mogokora aya?”

8Erio Petero agaichorwa n’Omoika Omochenu, akabatebia, “Abanene b’abanto, na abagaaka, 9onye tokoborigwa rero igoro y’ogokora okuya akoreirwe omonto oria omorwaire, na ase enchera ki agwenigwa, 10manya inwe mwensi na Abaisraeli bonsi ng’a erieta ria Yeso Kristo o Nazareti, ere inwe mwabambete, na Nyasae akamobokia korwa ase abakure, erieta erio riagwenirie omonto oyo kegima, oteneine bosio bwaino. 11Yeso nere rigena riangetwe na inwe abaagachi, korende obeire rigena rinene ri’ekoona. 12Gose gotooreka tikori ase onde bwensi, ekiagera erieta rinde tiriri inse ase erioba intwe mwanyabanto twaetwe eriranyare gototooria.”

13Bono ekero abanene baria bachia korora oboremu bwa Petero na Yohana, na bakamanya ng’a nigo bare buna banto bande bonsi, batari ne chisemi, bagakumia. Erio bakamanya ng’a Petero na Yohana nigo konya babeire amo na Yeso. 14Ekero bachia korora omonto oria ogwenetigwe, oteneine amo nabarabwo, tibaba na ing’ana rinde bagokwana. 15Bakabachika basoke korwa ase ekegambero, bagakora ekina barabwo ase barabwo, 16bagoteba, “Inki torakorere abanto aba? Ekiagera egekone eke giakorirwe nabarabwo kere maiso marore ase abanto bonsi abamenyete Yerusalemu, titokonyara kogekana. 17Korende ring’ana eri tiricha gosiarerwa egati y’abanto; tiga tobagose, tibakwana na monto onde bwensi ase erieta eri.” 18Bakabarangeria, bakabatianera tibabaisa gokwana gose kworokereria ase erieta ria Yeso. 19Korende Petero na Yohana bakabairaneria, “Onye mboronge ase obosio bwa Nyasae kobaigwera inwe kobua Nyasae, monache inwe abanyene, 20ekiagera titokonyara gotiga gokwana ayatwaroche na koyaigwa.” 21Na ekero abanene baria babagosire naende, bakabasibora. Tibanyora enchera y’okobaa egesusuro ase engencho y’abanto, ekiagera abanto bonsi barenge komobaka Nyasae ase ayio akoregete. 22Emiaka y’omonto oria egekone gi’okogwenigwa giakoregete asare nigo yarenge goetania emerongo ene.

Petero na Yohana bakairana ase abasani babo

23Ekero basiboirwe bakagenda ase abasani babo, bakabatebia aya onsi abakuani abanene na abagaaka babatebetie. 24Ekero bachia koyaigwa, bagaakera Nyasae amariogi abo amo, bakobora, “Omogambi omonene, aye naye gwakorete igoro na ense, na enyancha, na ebinto bionsi ebire imeo. 25Naye gwakwanete n’Omoika Omochenu goetera ase omonwa o sokoro yaito Daudi, omosomba oo,

“Nase ki abanto b’ebisaku bagokora riroroche,

na abanto bagokora emeroberio ere bosa?

26Abaruoti b’ense bebekire ang’e,

na abagambi nigo bakogamba amo

ase okwanga Omonene na Kristo oye.

27Naki ekeene, ase omochie oyo Herode na Pontio Pilato amo nabanto b’Ebisaku, na Abaisraeli, bagasangererekana igoro y’Omosomba oo omochenu, Yeso, oyokwaagete amaguta koba Masihi, 28erinde bakore aya okoboko kwao na omoroberio oo biare goteba korwa kare akoreke. 29Na bono Omonene, rigereria okogosa kwabo, okonye abasomba bao bakwane ring’ana riao noboremu bwonsi, 30orambore okoboko kwao ase okogwenia, na ebikone na amakumia bikoreke ase erieta ri’Omosomba oo omochenu, Yeso.”

31Kobakoorire ogosaba, aase aria basangererekanete agatengechigwa, bonsi bagaichorwa n’Omoika Omochenu, bakagenderera gokwana ring’ana ria Nyasae noboremu.

Enibo y’obomo

32Omoganda bw’abanto abegenete nigo orenge nenkoro eyemo na omoyo oyomo, na onde bwensi tarenge ore goteba ng’a gento kende gionsi eki arenge nakio nekia ye omonyene, korende bakaba nebinto bionsi ase obomo. 33Abatomwa bakagenderera koba birori ne chinguru chinene igoro y’okoboka kw’Omonene Yeso; na obuya obonge nigo bwarenge igoro asebare bonsi. 34Na monto onde tarenge ase egati yabo oyorenge nokoremerwa, ekiagera abanto bonsi abarenge nemegondo ne chinyomba nigo babioonetie, bakarenta chibesa chi’ebinto biria biaoonetigwe, 35bagachibeka ase amagoro ’abatomwa; na kera omonto akagaberwa koreng’ana buna aremeire. 36Na Yusufu ore korokwa nabatomwa Barnaba (engencho yaye, “Omwana bw’Oboremia”), Omolawi, omonto o Kuporo, 37narenge nomogondo, akayoonia, akarenta chibesa, agachibeka ase amagoro ’abatomwa.

Currently Selected:

OGOKORA KW’ABATOMWA 4: EKEGUSIIBBLE

Highlight

Copy