OGOKORA KW’ABATOMWA 18

Ase Korinto

1Nyuma ase aya Paulo akarua Atene, akagenda Korinto. 2Akanyora Omoyahudi oyomo, erieta riaye Akwila, omobiare o Ponto. Ere nigo achete korwa ase ense ya Italia ase amatuko a bwango amo na Priskila mokaye, ekiagera Klaudio konya ochikire Abayahudi bonsi barue Rumi. Paulo agaika asebare, 3na ekiagera emeremo yaye na emeremo yabo neyemo, akamenya nabarabwo, bagakora emeremo eye y’okoroisia chiema. 4Akaborokereria ase chisinagogi kera Esabato, agateema koebereria Abayahudi na Abagiriki.

5Korende ekero Sila na Timotheo bachia gotirimboka korwa Makedonia, Paulo agasukigwa mono ase okorandia ring’ana na koorokia ase Abayahudi nomokia ng’a Yeso nere Kristo. 6Ekero bachia koamererania nere na komorama, agasamunsa chianga chiaye, akabatebia, “Amayinga aino nabe igoro ase emetwe yaino! Inche tindi na komocha. Korwa bono ningende ase abanto b’Ebisaku.”

7Akaimoka korwa agwo, agasoa enyomba y’omonto ore korokwa Tito Yusto, omosasimi Nyasae. Mwaye nigo yasinyaine nesinagogi. 8Krispo, omotang’ani bw’esinagogi, akamwegena Omonene amo nab’enyomba yaye bonsi; na Abakorinto abange kobachia koigwa Paulo, bakeegena, bakabatiswa. 9Omonene agatebia Paulo botuko ase okorora, “Toiroka, korende kwana, tokira, 10ekiagera inche nigo inde amo naye, nonya monto onde tari oragochere, erinde agokore bobe. Naki inche nigo inde nabanto abange ase omochie oyo.” 11Akamenya agwo omwaka oyomo na emetienyi etano nomo, akoborokereria ring’ana ria Nyasae ase egati yabo.

Galio na Paulo

12Korende ekero Galio arenge gavuna bw’Akaya, Abayahudi bakarindokera Paulo ase obomo, bakamoira bosio bw’ekegambero, 13bagateba, “Omonto oyo nigo akoebereria abanto ng’a basasime Nyasae mamincha y’amachiko.” 14Na ekero Paulo achia korigia komaanora omonwa oye, Galio agatebia Abayahudi, “Inwe Abayahudi, onye ring’ana ri’okorega gose okong’ainereria okobe ndiakoregete, rirorio anga naremereria nainwe, 15korende onye nokoboria igoro ase amang’ana, na amarieta, na amachiko aino, yarigererie inwe abanyene. Inche tindigeti koba omotorania bw’amang’ana ayio.” 16Akabaseria korwa ase ekegambero. 17Erio bonsi bakabwata Sostene, omotang’ani bw’esinagogi, bakamoaka ase obosio bw’ekegambero. Korende Galio tarora ng’a amang’ana ayio gose ngento.

Paulo okoirana Siiria

18Nyuma ase aya Paulo a kamenta komenya agwo amatuko amange, erio agatigana nabamwabo, akamanora agasoa emeeri, akagenda Siiria, na Priskila na Akwila bakagenda amo nere. Ase Kenkrea agakigita etukia yaye, ekiagera ariete eira gete. 19Bagaika Efeso, akabatiga agwo; ere omonyene agasoa esinagogi, agakwana n’Abayahudi. 20Ekero bamoboretie amente amatuko ande komenya amo nabarabwo, akaanga. 21Korende ekero agotigana nabarabwo agateba, “Ning’irane asemore naende, Nyasae karanche.” Akamanora korwa Efeso, akagenda nemeeri. 22Gaikire Kaisaria, agatiira gochia gokwania abanto b’ekanisa. Erio agatirimboka gochia Antiokia. 23Nyuma kamenyire amatuko atai make akaimoka, agaeta egati y’ense ya Galatia na Furugia, agasoa omochie ase omochie, na gokong’ia aborokigwa bonsi.

Apolo ase Efeso

24Nabo Omoyahudi oyomo, ore korokwa Apolo, omobiare bw’Aleksanderia, agaika Efeso. Ere nigo arenge omonto omanyete gokwana buya, naende nigo arenge omonto omanyete amariko buya kegima. 25Omonto oyo konya bworokererigwe enchera y’Omonene. Ase ayio omoika oye nigo orenge gwoka, agakwana na kworokereria boronge amang’ana igoro ya Yeso, korende ere nigo amanyete ebatiso ya Yohana yoka. 26Agachaka gokwana noboremu ase esinagogi. Korende ekero Priskila na Akwila bachia komoigwa bakamoira mwabo, bakamworokia enchera ya Nyasae boronge kegima. 27Ekero arigia kwamboka enyancha gochia Akaya, abaminto bakamoremia, bakarikera aborokigwa b’aroro rirube bamoroisie. Ere gaikire aroro agakonya mono baria abegenete goetera ase obuya bwa Nyasae, 28ekiagera abuete Abayahudi kegima maiso marore, okoborokia korwa ase amariko ng’a Yeso nere Kristo.

Currently Selected:

OGOKORA KW’ABATOMWA 18: EKEGUSIIBBLE

Highlight

Copy