OGOKORA KW’ABATOMWA 17

Ase Tesaloniki

1Erio kobaetire egati y’Amfipoli na Apolonia, bagaika Tesaloniki aase esinagogi y’Abayahudi yarenge. 2Na Paulo, buna anarete, agasoa ime aase barenge. Agwo ase Chisabato isato agakwana nabarabwo amang’ana korwa ase amariko, 3akaborokereria na kobatebereria ng’a Kristo nagwenerete gochandwa na koboka korwa ase abakure, agateba, “Yeso, oyo nkobarareria inwe amang’ana igoro yaye, nere Kristo.”

4Abande bakang’useka, bakabwatana na Paulo na Sila, naboigo Abagiriki abange abasigete Nyasae amo nabakungu abasike batai bake. 5Korende Abayahudi bakaba ne ribero, bakaira abanto ababe korwa ase abaomboganu, bagasangereria omoganda, na bagakora eburu‐buru ase omochie. Bagachiera abanto b’enyomba ya Yasoni, bakarigia koira Paulo na Sila isiko ase abanto. 6Ekero batabanyora, bagakurura Yasoni na abande baminto gochia ase abanene b’omochie, bagaaka eriogi, bagateba, “Abanto aba abaonchoranire ense baikire nonya naa, 7na Yasoni akabaroisia. Barabwo bonsi nigo bagokora chingencho chire mamincha ya Kaisari, bagoteba ng’a omoruoti onde nareo, okorokwa Yeso.” 8Omoganda oria na abanene b’omochie bagaichana ekero baigwete aya. 9Na barabwo kobanyorire eira y’okobatenenera korwa ase Yasoni na abamwabo, bakabatiga bagende.

Ase Beroya

10Erio bwango ase obotuko boria abaminto bagatoma Paulo na Sila gochia Beroya. Kobaikire aroro, bagasoa ase esinagogi y’Abayahudi. 11Abayahudi aba nigo baare abaya ase ogotegerera kobua baria ba Tesaloniki; nigo babwatete Ring’ana ase obwanchani, bare kona‐koriga‐rigia amariko kera rituko, erinde barore gose amang’ana ayio nabo are. 12Abanto abange korwa asebare bakeegena amo nabakungu Abagiriki abaare abasike, na abasacha batai bake. 13Korende Abayahudi ba Tesaloniki, ekero baigwete ng’a ring’ana ria Nyasae riarandigwe na Paulo ase Beroya, bakagenda aroro bakaburukania abanto na kobarubania. 14Erio kegima abaminto baria bagatoma Paulo agende goika nyancha, korende Sila na Timotheo bagatigara aroro. 15Baria bakoobete Paulo bakamoikia Atene, na ekero banyorire ogochika koirera Sila na Timotheo ng’a bache asare bwango buna eranyarekane, bakarua aroro.

Ase Atene

16Ekero Paulo abaganyete aria Atene, akarora buna omochie oria oichire nemegwekano y’ogosasimwa, akaigwa bobe ase omoika oye. 17Nabo ase esinagogi agakwana n’Abayahudi na abanto abamoirogete Nyasae, na kera rituko ase echiiro nabaria abaare gocha aroro. 18Abande abanyasemi b’Abaepikurio na Abastoiki bakaamererania nere. Abande bagateba, “Omonto oyo nomonyamang’ana mange, inki arigetie goteba?” Na abande, “Ororekanire ng’a nigo are buna omorandia bw’amang’ana e chinyasae chingeni”, ekiagera nigo arenge korandia amang’ana a Yeso na okobokigwa kw’abakure. 19Bakamobwata, bakamoira goika Areopago, bakamoboria, “Inee! Nonyare gototebia engencho y’okworokereria okwo okoyia ogokwana? 20Nigo okorenta amang’ana amageni ase amato aito; gaki ntorigetie komanya engencho y’amang’ana ayio.” 21Abaatene bonsi na abamenyi abamenyete agwo tibarenge ne ribaga ase ing’ana rinde rionsi, otatiga ogokwana na gotegerera amang’ana amayia.

Ogokwana gwa Paulo ase Areopago

22Paulo agatenena gati‐gati y’Areopago, akabora, “Inwe abasacha b’Atene! Narorire ng’a nigo more abanto abamorengereretie mono amang’ana e chinyasae, 23ekiagera ekero narenge goetanana aria na aria, na korora ebisasimero biaino, nkarora egesasimero kerikire amang’ana aya: Ase Nyasae oria otamanyekaneti. Gaki inche nigo nkobarareria chingencho chiaye ere oria inwe mogosasima motamanyeti. 24Nyasae, oyotongete ense na ebinto bionsi ebireo, tari komenya ase ebihekalu biagachire namaboko, ekiagera nere Omonene o igoro na ense, 25gose tari gokorerwa namaboko a mwanyabanto, buna oyo oremeire gento, ekiagera nere okobaa bonsi obogima na omoika, na ebinto bionsi. 26Korwa ase omonto oyomo nere otongete kera egesaku kia mwanyabanto kemenye ase ense engima, akababekera chingaki ne chimbebe chi’obomenyo bwabo, 27erinde barigie Nyasae, nonya nase ogotaba‐taba bamonyore. Nonya nigo tari are korwa ase kera oyomo oito, 28ekiagera:

“Ime asare nigo tore moyo, na togotaara,

naende nigo tore nobogima bwaito;

koreng’ana buna abarenti chingero bande baino bakwanete:

Naki intwe twensi nigo tore ababiare baye.

29Gaki, onye tore ababiare ba Nyasae, tetogwenereti gokaga ng’a obonyasae nigo bonga buna omogwekano bw’etahabu, gose efeta, gose rigena, buna ebinto bibaachire ase chisemi na obong’aini bwa mwanyabanto. 30Ebiro biria bi’ogotamanya Nyasae nigo aombetie buna tarochi, korende bono nkoranderia are abanto bonsi ba kera aase baonchoke, 31ekiagera obekire rituko eri agocha konachera abanto b’ense ekina ase oboronge ase omonto oria aragete. Ase ayio oeire abanto bonsi ogosemeria ase okomobokia korwa ase abakure.”

32Nabo ekero bachia koigwa amang’ana ’okobokigwa kw’abakure abande bagasekereria, na abande bagateba, “Inatogotegerere naende ase amang’ana ayio.” 33Erio Paulo akaimoka akabatiga. 34Abasacha bande bakabwatana nere, bakeegena, na ase abwo narengeo Dionuso, oyomo bw’ekegambero ki’Areopago, naende omokungu oyomo ore korokwa Damari, na abande amo nabarabwo.

Currently Selected:

OGOKORA KW’ABATOMWA 17: EKEGUSIIBBLE

Highlight

Copy