OGOKORA KW’ABATOMWA 10

Petero na Kornelio

1Ase Kaisaria narengeo omonto ore korokwa Kornelio, omotang’ani bw’abarwani rigana bw’ekeombe ekemo ki’abarwani kiare korokwa eki’Abaitalia. 2Ere nigo arenge omonto omuya, omoirogete Nyasae, ere amo nab’enyomba yaye bonsi. Nigo are koa abanto ebiegwa ebinge na kogenderera gosaba Nyasae botambe. 3Ang’e ne chinsa kianda chia mobaso akarora ase okorora maiso marore omomalaika o Nyasae akomochera, akamotebia, “Kornelio!”

4Akamorigereria mono, akairoka, akamoboria, “Naki Omonene?” Akamoiraneria, “Ogosaba kwao na ebiegwa biao biaikire igoro, na biabeire ekeinyorio ase obosio bwa Nyasae. 5Gaki bono toma abanto Yopa barangerie Simion, oyokorokwa Petero. 6Ere nomogeni bw’omonto oyomo okorokwa Simion, omoroisia bw’amao; enyomba yaye nigo ere ang’e nengegu y’enyancha.”

7Ekero omomalaika, oria okwanete nere, aimoka korwa aroro, Kornelio akarangeria abasomba baye babere na omorwani oyomo osigete Nyasae korwa ase baria bare komokorera botambe, 8akabatebereria amang’ana onsi, akabatoma Yopa.

9Rituko ria kabere, ekero baare kogenda, kobaikire ang’e nomochie, Petero akariina kerama igoro gochia gosaba koreng’ana chinsa isano nemo chia mobaso. 10Akaba nenchara, akagania endagera arie. Korende ekero barenge koyeroisia, akabwatwa nobogondereria, 11akarora igoro amaanokire, na egento kegoika, kere buna egetambaa ekenene, kebwatire emekoba ene, kegoikigwa gocha inse. 12Ime yaye nigo biarengeo ebisaku bionsi bie ching’iti chire namagoro ane, ne ching’iti chi’orosana, na echikwagura, ne chinyoni chia igoro. 13Eriogi rikamochera, rikamotebia: “Petero, imoka onyenye orie!”

14Korende Petero akabora, “Yaya Omonene, ekiagera tinana koria nonya ng’ake egento getachenegeti gose ekere neubi.”

15Eriogi rikamochera eria kabere, rikamotebia, “Eki Nyasae achenire tokeroka ng’a tikeri egechenu.” 16Eri rigakoreka ara gatato, na egento keria gekabogorigwa gochia igoro naende.

17Ekero Petero arenge ne chitang’u‐tang’u ase omoyo oye ime ase okorora okwo aroche, engencho yaye inki, rora, abanto baria batometwe na Kornelio, kobaboririe enyomba ya Simion, bagatenena geita. 18Bakarangeria neriogi bakaboria gose Simion, oyokorokwa Petero, nao are ime.

19Na Petero, karengereretie okorora koria, Omoika okamotebia, “Rora, abanto batato bagokorigia. 20Imoka, oike, ogende amo nabarabwo, toba ne chitang’u‐tang’u ekiagera ninche nabatoma.” 21Petero agaika ase abanto baria, agateba, “Ninche ere oyo mokorigia. Igo mwacha ase engencho ki?”

22Bakamotebia, “Nigo twatomirwe na Kornelio, omotang’ani bw’abarwani rigana, omonto omoronge, omoirogete Nyasae, oyogokwanwa buya negesaku gionsi ki’Abayahudi. Natebigwa nomomalaika omochenu ng’a atome abanto asore gokorangeria ogende bwoye, anyare koigwa amang’ana korwa asore.” 23Erio Petero akabatebia basoe nyomba, babe abageni baye.

Rituko ria kabere akaimoka akagenda amo nabarabwo, na abande bamwabo korwa Yopa bakagenda amo nere. 24Rituko rigotunya erio bagasoa Kaisaria. Na Kornelio nigo arenge obaganyete, konya osangereirie eamate yaye amo nabanchi baye. 25Ekero Petero achia gosoa omochie, Kornelio agasoka komorotota, akagwa inse ase amagoro aye, akamosasima. 26Korende Petero akamoimokia, akamotebia, “Tenena! Inche boigo mwanyabanto inde.” 27Ekero are gokwana na Kornelio, agasoa ime, akanyora abanto abange basangererekaneteo. 28Akabatebia, “Mwamanyire ng’a tari boronge omonto Omoyahudi abwatane nomonto ore bw’egesaku ekeao, nonya nokomochiera, korende Nyasae onyorokirie ng’a timoroka onde bwensi ng’a tari omochenu, gose tachenegeti. 29Ase engencho eyio, ekero narangeretigwe ngacha, tinaanga. Nkoboria nde: Ing’ana ki mwandangereretie?”

30Kornelio akamoiraneria, “Rero nerituko ria kane, korwa ekero narenge gosaba nyomba mwane chinsa buna echi, chinsa kianda. Ani! Omonto nateneine bosio bwane obekeire chianga chikomeka‐meka. 31Agantebia: Kornelio, ogosaba kwao kwaigurwe, na ebiegwa biao biainyoirwe ase Nyasae. 32Ase igo, toma abanto Yopa, orangerie Simion, oyokorokwa Petero; ere nomogeni are nyomba mwa Simion, omoroisia bw’amao, nigo amenyete ang’e nengegu y’enyancha. 33Erio bwango ngatoma abanto asore, na aye gwakorire buya gwachire. Na bono twensi nao tore aiga ase obosio bwa Nyasae, tonyare koigwa aya onsi Omonene agochikire gokwana.”

Ogokwana gwa Petero

34Erio Petero agachaka gokwana, akabora, “Ase ekeene naikire komanya ng’a Nyasae tari nogwanchereria, 35korende ase kera egesaku omonto omoirogete na gokora oboronge nigo agwancherwa nere. 36Agatoma ring’ana eri ase Abaisraeli, akarandia amang’ana amaya ay’omorembe korwa ase Yeso Kristo, oyore Omonene o bonsi. 37Inwe momanyete, ng’a ring’ana eri riararetigwe ase Boyahudi yonsi, rigachakera Galili nyuma y’ebatiso eria Yohana arandetie, 38igoro ya Yeso o Nazareti, buna Nyasae amoete Omoika Omochenu ne chinguru, na buna ataarete na gokora emeremo emiya, na kogwenia bonsi abaregetwe na Saitani, ekiagera Nyasae nigo arenge amo nere. 39Na intwe nigo tore abarori b’amang’ana onsi aya arenge gokora ase ense y’Abayahudi na ime ya Yerusalemu. Bakamoita, bakamosunga ase omote, 40korende Nyasae akamobokia ase rituko ria gatato, akamwanchera kooroka, 41tari ase abanto bonsi, korende nasetore, abatwachoretwe na Nyasae tobe abarori. Intwe nigo tware koria na konywa amo nere nyuma y’okoboka kwaye. 42Agatochika toranderie abanto, na tobe birori ng’a nere ochoretwe na Nyasae abe omogambi bw’abare moyo na abakure. 43Oyo ababani bonsi baberete birori, ng’a onde bwensi omwegenire nigo aranyore okwaberwa kw’ebibe ase erieta riaye.”

Abanto b’Ebisaku bakonyora Omoika Omochenu na ebatiso

44Ekero Petero arenge gokwana aya Omoika Omochenu ogaikera bonsi abaigwete amang’ana aya. 45Abegenete korwa ase abarogete abachete amo na Petero, bagakumia, ekiagera nonya nabanto b’Ebisaku banyorire ekeegwa ki’Omoika Omochenu. 46Naki babaigwete bagokwana ase emenwa, bagotogia Nyasae. Erio Petero akabora, 47“Inee! Omonto nanyare gokania aba amache, tibabatiswa, abanyorire Omoika Omochenu koreng’ana buna intwe?” 48Agachika babatiswe ase erieta ria Yeso Kristo. Erio bakamoboria amente komenya amo nabarabwo amatuko atai make.

Currently Selected:

OGOKORA KW’ABATOMWA 10: EKEGUSIIBBLE

Highlight

Copy