मरकुस 6

नासरत गांऊँआं मन्झ यीसू री बेज्जती

(मत्ती 13:53-58; लूक. 4:16-30)

1होर यीसू कफरनहूम सैहरा ले निकली किन्हें आपणे नासरता गांऊँआं मन्झ आया, होर तेसरे चेले तेसरे साउगी चली पये। 2होर अरामा रे ध्याड़े से यहूदी सभा मन्झ उपदेस देंदा लग्या; होर बौह्त लोक सुणी किन्हें हरान हुई गये होर बोल्दे लगे, “एस जो ये गल्ला केथी ले आई? होर ये केह्ड़ा ज्ञान आ जो एस माह्णुं जो दितिरा? होर केह्ड़े सामर्था रे काम एसरे ज्रीए ले हुंहाँ ऐं? 3फेरी तिन्हें यीसू रा मजाक डूआया, आस्से एस जो जाणहां ऐं कि ये सेई तरखाण आ। जो मरियमा रा मह्ठा आ, होर याकूब, योसेस, यहूदा होर समौन एसरे भाई ऐे होर तेसरी बैहणीया एथी आस्सा रे बीच भरा रैंहयां ईं।” इधी कठे तिन्हें यीसू री गल्ला पर विस्वास नी कितेया।

4यीसूए तिन्हा किन्हें बोल्या, “नबी आपणा गांऊँ होर रिस्तेदार होर आपणे घरा जो छाडी किन्हें हर जगहा इज्जत पांहा।” 5होर से नासरत गांऊँआं मन्झ कोई होर सामर्था रे काम नी करी सकेया, सिर्फ थोड़े बौह्त ब्मार छुहे होर स्यों ठीक किते। 6होर से हरान हुई गया क्यूंकि तिन्हें तेस पर विस्वास नी कितेया। यीसू होर तेसरे चेले गांऊँआं मन्झ उपदेस देंदे लगे।

बारा चेले रा भेज्या जाणा

(मत्ती 10:5-15; लूक. 9:1-6)

7होर यीसूए तिन्हा बारा चेले जो आपणे वाले सादी किन्हें तिन्हा जो दो-दो करी किन्हें भेज्दा लग्या; होर तिन्हा जो दुस्टात्मा जो काढणे रा हक दितेया।

8होर तिन्हें चेलेया जो हुक्म दितेया, “पैंडे रे कठे सिर्फ डंडे जो लेया; ना ता रोटी, ना झोला, होर ना बटुऐ मन्झ ढब्बे। 9जूते ता पैन्ही सक्हा ऐं पर दो-दो कुरते देख्या लैन्दे।” 10होर यीसूए तिन्हा किन्हें बोल्या, “जेबे तुस्से केसी गांऊँआं मन्झ जान्घे, होर कोई तुस्सा जो आपणे घरा सादे, ता तेस घरा मन्झ ई रहुआ, जेबे तक कि तुस्से तेस गांऊँआं जो छाडी नी देंघे। 11जेस गांऊँआं रे लोके तुस्से आपणे घरा नी सादे, होर तुस्सा री नी सुणी, तेथी ले चलदे ई तुस्से आपणे पैरा री धूड़ा जो झाड़ी देआ, ताकि तिन्हारे बरखलाफ ये गुआही हो।”

12होर चेले जाई किन्हें प्रचार करदे लगे कि, पाप करणा छाडी देआ। 13होर तिन्हें बौह्त लोका ले दुस्टात्मा काढी, होर बौह्त बीमार लोका पर जैतूना रा तेल मली किन्हें स्यों ठीक किते।

यहून्ना बपतिस्मा देणे वाल़े री हत्या

(मत्ती 14:1-12; लूक. 9:7-9)

14होर हेरोदेस राजे यीसू रे बारे सुणेया, क्यूंकि तेसरा नांऊँ फैल्ही गईरा था, होर हेरोदेसे बोल्या कि ये, “यहून्ना बपतिस्मा देणे वाल़ा मरिरे मन्झा ले जिउंदा हुई गईरा, इधी कठे यीसू ले सामर्था रे काम हुंहाँ ऐं।”

15होर होरी लोके बोल्या, “ये ता एलिय्याह नबी आ।”

पर दूजे बोल्या कि, “ये कोई नबी आ, या ता महान पुराणे नबिया साहीं एक नबी आ।”

16हेरोदेस राजे ये सुणी किन्हें बोल्या, “जेस यहून्ना बपतिस्मा देणे वाल़े रा मूंड मैं काटी दितिरा था, से जिउंदा हुई गईरा।”

17क्यूंकि हेरोदेस राजे आप्हुए यहून्ना पकड़ाई किन्हें जेल्हा मन्झ पाई दितिरा था, तिन्हें आपणे भाई फिलिप्पुसा री लाड़ी हेरोदियासा री वजहा ले, जेस्सा किन्हें जे तिन्हें ब्याह करी लईरा था, एह्ड़ा कितेया। 18क्यूंकि यहून्ना हेरोदेस राजे किन्हें बोल्दा रैंहयां था कि, “तेरा भाई हल्ली जिन्दा आ होर तेसरी लाड़ी रखणा मूसा री व्यवस्था रे बरखलाप आ।”#6:18 लैव्य. 18:16, लैव्य. 20:21 19इधी कठे हेरोदियास यहून्ना किन्हें नफरत करहा ई थी होर ये चाहीं थी कि, तेस जो मुकाई दे, पर एह्ड़ा नी हुई सकेया।

20हेरोदेस राजा यहून्ना बपतिस्मा देणे वाल़े ले डरा था क्यूंकि से धर्मी होर पवित्र माह्णुं था, होर तेस जो बचाहां था, होर तेसरी गल्ला सुणी किन्हें बौह्त डरी जाहाँ था, फेरी भी से तेसरी गल्ला खुसी किन्हें सुणहां था।

21होर ठीक मौका आऊणें पर, जेबे हेरोदेस राजे आपणे जन्म ध्याड़े पर आपणे प्रधाना होर सेनापतिया, होर गलील जिल्ले रे बडे लोका रे कठे बडी धाम दिती। 22होर हेरोदियासा री मह्ठी अंदर आई, होर नाची किन्हें हेरोदेस राजे होर तेस साउगी बैठणे वाले लोक खुस किते।

तेबे राजे मह्ठी किन्हें बोल्या, “तू जो चाहे मेरे ले मांग मां तुजो देणा।” 23होर तिन्हें कसम खाध्ही कि, “मां आपणे आधे राज तक जो कुछ तू मेरे ले मान्घगी तुजो देई देणा।”#6:23 एस्ते. 5:3,6, एस्ते. 7:2

24तेस्से बाहर जाई किन्हें आपणी माऊआ ले पूछेया कि, “हांऊँ क्या मांगू?” तेस्से बोल्या, “यहून्ना बपतिस्मा देणे वाल़े रा मूंड मांग।”

25से झटपट राजे वाले अंदर आई, होर तेस ले अर्ज किती, “हांऊँ चाहीं कि, तू ऐबे ई यहून्ना रा मूंड एक थाली मन्झ मंगवाई दे।”

26तेबे राजा जेह्ड़ी गल तिन्हें तेस्सा मह्ठी किन्हें बोलिरी थे तेस गला ले से बौह्त दुःखी हुआ, पर आपणी कसमा री वजहा ले होर साउगी बैठी किन्हें खाणे वाले री वजहा ले, से तेस्सा जो टाल्ली नी सकेया। 27होर राजे झटपट एक स्पाही जो हुक्म दितेया कि तेसरा मूंड काटी किन्हें लई आऊआ। 28तिन्हें जेल्हा मन्झ जाई किन्हें तेसरा मूंड काटेया, होर एक थाली मन्झ रखी किन्हें लई आया होर तेस्सा मह्ठी जो दितेया, होर मह्ठीऐ आपणी माऊआ जो दितेया। 29ये सुणी किन्हें यहून्ना बपतिस्मा देणे वाल़े रे चेले आये, होर तेसरी ल्हास चकी किन्हें डुआरा मन्झ रखी दिती।

चेलेया रा वापस आऊंणा होर अराम करणा

(मत्ती 14:13,14; लूक. 9:10)

30आपणी सेऊआ ले बाद बारा चुणिरे चेले यीसू वाले आये, जो कुछ तिन्हें कितेया, होर स्खाया था, सब तेस जो दसी दितेया। 31यीसूए तिन्हा किन्हें बोल्या, “आस्से केसी सुनसान जगहा मन्झ चल्हा ऐं, होर थोह्ड़ा अराम करी ले।” यीसूए ये तिन्हा किन्हें इधी कठे बोल्या क्यूंकि बौह्त लोक आया जाया करहा ऐं थे, होर तिन्हा जो खाणे रा मौका भी नी मिल्दा था।

32इधी कठे स्यों किस्तिया पर चढ़ी किन्हें सुनसान जगहा जो चली गये ताकि स्यों कल्हे रही सके।

पांज हज़ार मर्धा जो खाणा खुआणा

(मत्ती 14:15-21; लूक. 9:11-17; यहू. 6:1-14)

33होर कई लोके स्यों तेथी जांदे हुए देखी लये होर तिन्हें ये भी पछ्याणी लया कि स्यों कुणहें, होर गांऊँआं रे बौह्त लोक कठे हुई किन्हें पैदल दौड़े होर यीसू होर तेसरे चेले ले पैहले पूजी गये। 34होर तिन्हें किस्ती ले उतरी किन्हें एक बौह्त बडी भीड़ देखी, होर तेस जो लोका पर तरस आई। क्यूंकि स्यों तिन्हा भेडा साहीं थे, जिन्हारा जे कोई रखवाला नी हुन्दा, होर से तिन्हा जो परमेसरा रे राज्या री बौह्त सारी गल्ला स्खान्दा लग्या। #6:34 2 इति. 18:16, 1 राजा. 22:17

35जेबे जे ध्याड़ा ढली गया, ता तेसरे चेले तेस वाले आई किन्हें बोल्दे लगे, “ये एक सुनसान जगहा ई, होर ध्याड़ा भी बौह्त ज्यादा ढली गईरा। 36तिन्हा जो भेजी दे कि, स्यों चारो तरफा रे गांऊँआं होर बस्ती मन्झ जाई किन्हें, आपणे कठे कुछ खाणे जो लई आये।”

37यीसूए तिन्हा जो जवाब दितेया कि, “तुस्से ई इन्हा जो खाणा देआ” तिन्हें तेस किन्हें बोल्या, “क्या इन्हा लोका रे कठे खाणा खरीदणे रे कठे दो सौ ध्याड़े री मजदूरी नी लगणी?”

38यीसूए तिन्हा किन्हें बोल्या, “जाई किन्हें देखा तुस्सा वाले कितनी रोटिया ई?” तिन्हें पता करी किन्हें बोल्या, “पांज रोटिया होर दो मछिया।”

39तेबे यीसूए तिन्हा जो हुक्म दितेया कि, सभी लोका जो हरे घाहा प्रयाल्हे घीढ़ी मन्झ बठ्याली देआ। 40स्यों सौ-सौ होर पन्ज्याह-पन्ज्याहा री घीढ़ी मन्झ बैठी गये। 41होर तिन्हें तिन्हा पांज रोटिया जो होर दो मछिया जो लई किन्हें, स्वर्गा वखा देखी किन्हें परमेसरा रा धन्यावाद कितेया होर रोटिया तोड़ी-तोड़ी किन्हें चेले जो देंदा गया। ताकि स्यों लोका जो खाणा बांडी सके, होर तिन्हें दो मछिया भी तिन्हा मन्झ बांडी दिती। 42होर सभ खाई किन्हें रजी गये। 43होर खाणे ले बाद बी रोटी होर मछिया बची गई। होर चेले बचिरी रोटिया होर मछिया किन्हें भर्हिरी बारा छड़ोल्लू चक्के। 44जिन्हें जे रोटिया खाध्ही, स्यों पांज हज़ार मर्ध थे। (पर तिन्हें ज्नानिया होर बच्चे नी गिणीरे थे)

यीसू रा पाणी पर चलणा

(मत्ती 14:22-33; यहू. 6:15-21)

45तेबे यीसूए झटपट आपणे चेले किस्तिया पर चढ़ाये, ताकि स्यों तेस ले पैहले गलील समुद्रा रे पारली तरफ बैतसैदा गांऊँआं जो चली जाए, जेबे तक कि से लोका जो भेजी नी दे। 46होर तिन्हा जो भेजणे ले बाद यीसू प्हाड़ा पर प्रार्थना करणे रे कठे चली गया।

47होर जेबे सांझ हुई, ता किस्ती समुद्रा रे बीचा मन्झ थी, पर यीसू कल्हा ही जमीना पर था।

48होर जेबे यीसूए देख्या कि, चेलेयो किस्ती च्लांदे-च्लांदे बौह्त मुस्कल हुएआ करहा ई थी, क्यूंकि बागरा रा असर तिन्हा पर भारी था, भ्यागा तीन बजे रे करीब से समुद्रा पर चली किन्हें तिन्हा वाले आया; होर यीसू तिन्हा ले अगे निकलणा चाहां था।

49पर तिन्हें तेस जो समुद्रा पर चल्दे देखी किन्हें समझ्या कि, से भूत आ, होर चिंगा पान्दे लगे, क्यूंकि सभ तेस जो देखी किन्हें डरी गईरे थे। 50पर झटपट तिन्हा किन्हें गल्ला किती होर बोल्या, “हिम्मत रखा: हांऊँ यीसू आ; डरा मत।” 51तेबे से तिन्हा वाले किस्तिया पर आया, बागर रुकी गई, स्यों बौह्त हरान हुई गये। 52हलांकि तिन्हें यीसू जो रोटी होर मछि जो बढ़ान्दे हुए देखी लईरा था होर स्यों ये सभ देखी किन्हें भी यीसू री सक्ति जो नी समझी पाए, तिन्हारे मन सख्त हुई गईरे थे तेभे ता स्यों ठीक ढंगा किन्हें नी समझी सके।

गन्नेसरेत ईलाके मन्झ ब्मारा रा ठीक हूंणां

(मत्ती 14:34-36)

53यीसू होर तेसरे चेले गलील समुद्रा जो पार करी किन्हें गन्नेसरत ईलाके मन्झ पूजे, होर किस्ती जो बाढे बान्ही दितेया। 54होर जेबे स्यों किस्ती ले उतरे, ता लोके यीसू झटपट पछयाणी लया। 55ओरले परले सारे ईलाके रे लोक दौड़े, होर सारे ब्मार लोका जो मांजे प्र्याह्ले चकी किन्हें हर जगहा फिरदे रहे, जेथी भी यीसू जाहाँ था स्यों ब्मारा जो तेथी ल्याहूँआं ऐं थे। 56होर जेथी केथी से गांऊँआं, सैहरा, या बस्तिया मन्झ जाहाँ था, ता लोक ब्मारा जो बजारा मन्झ रखी किन्हें तेस ले अर्ज करहा ऐं थे कि से ब्मार लोका जो तेसरे कपड़े रा पल्लू ई छूणे दे। होर जितने तेस जो छुहां ऐं थे, स्यों सब ठीक हुई जाहें थे।

Currently Selected:

मरकुस 6: MJLNT

Highlight

Copy