मरकुस 5

दुस्टात्मा ले दुखी माह्णुं रा ठीक हूंणां

(मत्ती 8:28-34; लूक. 8:26-39)

1यीसू होर तेसरे चेले समुद्रा री दूजी तरफ गिरासेनिया रे ईलाके मन्झ पूजी गये, 2होर जेबे से किस्तिया ले उतरेया ता झटपट एक माह्णुं जेस मन्झ जे दुस्टात्मा थी, समसान घाटा ले निकली किन्हें तेस किन्हें मिल्या। 3से समसान घाटा मन्झ रैंहयां था। होर कोई भी तेस जो सांगला किन्हें नी बान्ही सक्दा था, 4क्यूंकि से बार-बार बेड़िया होर सांगला किन्हें बान्हीरा हुंहाँ था, पर तिन्हें सांगल त्रोड़ी दिते होर बेड़िया रे टोटे-टोटे करी दिते, होर कोई तेस जो आपणे बसा मन्झ नी करी सक्दा था। 5से लगातार राती ध्याड़ी समसान घाटा होर प्हाड़ा मन्झ चिंगा था, होर आपणे आपा जो पात्थरा किन्हें मारहा था।

6जेबे तिन्हें यीसू देख्या से दौड़ी किन्हें तेस वाले आया, होर जांढू रे भारे यीसू रे पैरा पर पई गया। 7यीसूए तेस किन्हें बोल्या, “हे दुस्टात्मा, एस माह्णुं मन्झा ले निकली जा।” 8होर तिन्हें चिंगी किन्हें बोल्या, “हे यीसू, परमप्रधान परमेसरा रे मह्ठे, तेरा मेरे किन्हें क्या रिस्ता? हांऊँ तुजो परमेसरा री कसम देहां कि, मुंजो दुःख नी दे।”#5:8 मत्ती 8:29, 1 राजा. 17:18

9यीसूए तेस ले पूछेया, “तेरा नांऊँ क्या आ?” तिन्हें यीसूए किन्हें बोल्या, “मेरा नांऊँ सेना आ; क्यूंकि आस्से बौह्त ऐं, जो एस माह्णुं मन्झ रैंहयां ऐं।” 10होर तिन्हें तेस ले बौह्त अर्ज किती, “आस्सा जो एस ईलाके ले बाहर नी भेज।”

11तेथी प्हाड़ा पर सुअरा रा एक बडा झुंड चरेया करहा था। 12होर दुस्टात्मे तेस ले अर्ज करी किन्हें बोल्या कि, “आस्सा जो इन्हा सुअरा मन्झ भेजी दे, ताकि आस्से तिन्हा मन्झ जाई सको।”

13होर यीसूए तिन्हा जो हुक्म दितेया होर दुस्टात्मा निकली किन्हें सुअरा मन्झ चली गयी, होर तेस झुंडा मन्झ करीब दो हज़ार सुअर थे, से झुंड प्रचण्ड हुई किन्हें ढलाना परा ले समुद्रा मन्झ पई गया, होर डूबी मरेया। 14होर सुअरा रे पुहाल डरी किन्हें गांऊँआं मन्झ जाई किन्हें ये खबर दिती, होर जो कुछ हुआ तेता जो देखणे रे कठे लोक आये। 15होर स्यों यीसू वाले आये, होर देखा, जेस मन्झ जे दुस्ट आत्मा री सेना समाईरी थी, तेस जो तिन्हें कपड़े पैहनी किन्हें होर आपणे पुरे होसा मन्झ ठीक हुई किन्हें बैठीरे देख्या, होर स्यों ये देखी किन्हें डरी गये। 16होर देखणे वाले जेस मन्झ जे दुस्टात्मा थी, होर सुअरा रा पूरा हाल तिन्हा जो दसेया। 17होर स्यों यीसू वाले आई किन्हें अर्ज करदे लगे कि, आस्सा रे ईलाके ले बाहर चली जा।

18होर जेबे यीसू जाणे रे कठे किस्ती पर चढ़दा लग्या, ता से जेस मन्झ जे पैहले दुस्टात्मा थी, से यीसू ले अर्ज करदा लग्या कि, “मुंजो आपणे साउगी आऊणें दे।” 19पर यीसूए तेस जो आपणे साउगी आऊणें नी दितेया, होर तेस किन्हें बोल्या, “आपणे घरा जाई किन्हें आपणे लोका जो दस कि, तेरे पर दया करी किन्हें प्रभुए तेरे कठे केह्ड़े बडे-बडे काम किते।” 20से जाई किन्हें दिकापुलिस ईलाके मन्झ एस गल्ला रा प्रचार करदा लग्या कि, यीसूए मेरे कठे केह्ड़े बडे-बडे काम किते; होर जिन्हें ये गल सुणी स्यों हरान हुए।

याईरा री मरिरी मह्ठी होर एक ब्मार ज्नाने

(मत्ती 9:18-26; लूक. 8:40-56)

21जेबे यीसू गलील समुद्रा री दूजी तरफ पुज्हेया ता, एक बडी भीड़ तेसरे साम्हणें कठी हुई; होर से समुद्रा रे बाढे ई खड़ीरा था। 22होर यहूदी सभा रे मुखिये मन्झा ले एक याईर नांऊँआं रा मुखिया आया, होर तेस जो देखी किन्हें से तेसरे पैरा पर पई गया। 23होर तिन्हें ये बोली किन्हें बौह्त अर्ज किती कि, “मेरी छोटी बेटी मरणे वाली ई: तू आई किन्हें तेस्सा जो छुही ले, ताकि से ठीक हुई जाए होर जीऊन्दी रहे।” 24तेबे यीसू होर तेसरे चेले यहूदी सभा रे मुखिये साउगी गये; होर बडी भीड़ तेसरे पीछे चली पई, एथी तक कि लोक तेस पर पई जाया करहा ऐं थे।

25होर एक ज्नाने थी, जेस्सा जो बारा साला ले खून बैहणे री ब्मारी थी। 26होर से कई बैदा ले लाज करान्दे-करान्दे बौह्त दुःखी हुई चुकीरी थी होर तेस्से आपणा सभ कुछ खर्च करी दितिरा था, पर कुछ फायदा नी हुआ, पर होर जादा ब्मार हुई गईरी थी। 27जेबे तेस्से यीसू जो लोका जो ठीक करणे रे बारे मन्झ सुणेया से भीड़ा मन्झ तेसरे पीछे आई, होर तेसरे कपड़े छुही लये। 28क्यूंकि तेस्से आपणे मना मन्झ बोल्हा ई थी कि, “अगर हांऊँ तेसरे कपड़े छुही लैन्घी, ता मां ठीक हुई जाणा।” 29होर झटपट तेस्सा रा खून बैहणा बंद हुई गया; होर तेस्से आपणे सरीरा मन्झ जाणी लया कि, हांऊँ तेस्सा ब्मारी ले ठीक हुई गयी।

30यीसूए तेबे ई जाणी लया कि, मेरी सामर्थे कोई ठीक किती रा, होर से भीड़ा मन्झा ले पीछे मुड़ेया होर पूछेया, “मेरे कपड़े कुने छुहे?”

31होर तेसरे चेले तेस किन्हें बोल्या, “तू देख्हा कि, भीड़ तेरे पर पई जाया करहा ई, होर तुस्से पुछ्हा ऐं; कि हांऊँ कुने छुहेया?” 32तेबे यीसूए तेस्सा ज्नाने जो देखणे रे कठे जेस्से जे ये काम कितिरा था, चहुँ वखा जो देख्या।

33तेबे तेस्से ज्नाने ये जाणी किन्हें कि, तेस्सा किन्हें केह्ड़ी भलाई हुई, से डरदी होर काम्दी हुई आई, होर तेसरे पैरा पर पई किन्हें, तेस किन्हें सारा हाल सच्च-सच्च बोली दितेया। 34यीसूए तेस्सा किन्हें बोल्या, “मह्ठीऐ, तैं विस्वास कितेया कि हांऊँ तुजो ठीक करी सक्हा, इधी कठे तू ठीक हुई, सांति किन्हें जा, होर आपणी एस्सा ब्मारी ले बची रैह।” #5:34 लूक. 8:48

35यीसू तेस्सा ज्नानिया साउगी हल्ली तक ये बोल्या ई करहा था, तेबे यहूदी सभा रा मुखिया, याईरा रे घरा रे लोके आई किन्हें तेस किन्हें बोल्या कि, “तेरी बेटी मरी गयी; ऐबे तू गुरु जो किधियो परेसान करेया करहा?”

36जो गल्ला स्यों करेया करहा ऐं थे, यीसूए स्यों गल्ला अनसुणी करी किन्हें, यहूदी सभा रे मुखिये याईरा किन्हें बोल्या, “मत डर; सिर्फ विस्वास रख।”

37होर तिन्हें पतरस होर याकूब होर याकूबा रे भाई यहून्ना जो छाडी किन्हें, होर केसी जो आपणे साउगी नी आऊणें दितेया। 38होर यहूदी सभा रे मुखिये रे घरा मन्झ पुज्ही किन्हें, तिन्हें लोका जो बौह्त रोंदे होर चिंगदे देख्या।

39तेबे यीसूए अंदर जाई किन्हें तिन्हा किन्हें बोल्या, “तुस्से किधियो हाल्ला पाईरा होर रोंदे लगिरे? मह्ठी मरीरी नी, पर सया करहा ई।”

40स्यों सुणी किन्हें स्यों तेसरा मजाक डुआन्दे लगे, पर तिन्हें सभ बाहर काढे होर मह्ठी रे माऊ-बापू होर आपणे चेले लई किन्हें से अंदर गया, जेथी जे मह्ठी पईरी थी। 41होर मह्ठी रा हाथ पकड़ी किन्हें तिन्हें तेस्सा किन्हें बोल्या, “तलीता कूमी” जेसरा मतलब ये आ कि “हे मह्ठीऐ, हांऊँ तेरे किन्हें बोल्हा, उठी जा।” 42होर मह्ठी झटपट उठी किन्हें चल्दी फिरदी लगी; होर से बारा साला री थी। होर स्यों लोक बौह्त हरान हुई गये। 43फेरी यीसूए तिन्हा जो खबरदार करी किन्हें हुक्म दितेया कि ये गल केसी जो पता नी चले होर ये भी बोल्या कि, “एस्सा मह्ठीया जो कुछ खाणे रे कठे देआ।”

Currently Selected:

मरकुस 5: MJLNT

Highlight

Copy