मरकुस 3

बेजान हाथ वाले रा ठीक हूंणां

(मत्ती 12:9-14; लूक. 6:6-11)

1होर यीसू यहूदी सभा मन्झ दबारा गया; होर तेथी एक माह्णुं था, जेसरा हाथ बेजान हुई चुकिरा था। 2होर यहूदी सभा रे लोक यीसू पर दोस ल्गाणे रे कठे नजर रख्हा ऐं थे, ताकि देखी सको कि, से अरामा रे ध्याड़े तेस जो ठीक करहा की नी। 3बेजान हाथा वाले किन्हें बोल्या, “आऊ सभिरे बीच भरा खड़ा हुई जा।”

4होर यीसूए लोका किन्हें बोल्या, “अरामा रे ध्याड़े व्यवस्था रे मताबक क्या करणा ठीक आ भला या बुरा करणा, जान बचाणा या मारणा?” पर स्यों चुप रहे।

5यीसू गुस्सा हुई किन्हें चारो वखा जो देख्या, होर यीसू दुखी हुई गया क्यूंकि स्यों बड़े जिद्दी थे, होर तिन्हें तेस माह्णुं किन्हें बोल्या, “आपणा हाथ अगे कर।” तिन्हें आपणा हाथ अगे कितेया, होर तेसरा हाथ ठीक हुई गया। 6होर अराधना सभा मन्झ बैठीरे फरीसी लोक बाहर जाई किन्हें झटपट राजा हेरोदेसा रा साथ देणे वाल़े लोका साउगी मिली किन्हें यीसू रे बरखलाफ कठा हुई किन्हें चर्चा करदे लगे कि, यीसू जो किहाँ मुकाईये।

भीड़ा रा यीसू साउगी आऊंणा

7होर यीसू आपणे चेले साउगी गलील समुद्रा वखा जो चली गया: होर एक बडी भीड़ तेसरे साउगी चलदी लगी, जो गलील जिल्ले होर यहूदिया ईलाके ले, 8होर यरुस्लेम सैहरा होर इदुमिया रे ईलाके ले, होर यरदन दराऊआ ले पार वाले ईलाके ले, होर सुर होर सैदा सैहरा ले ओरे परे ले आईरी थी। कई लोक यीसू रे नौखे-नौखे काम सुणी किन्हें तेस जो देखदे आये। 9होर तेथी भीड़ बढ़ी गई इधी कठे यीसूए आपणे चेले किन्हें बोल्या कि, स्यों एक छोटी किस्ती तेसरे कठे त्यार रखे ताकि यीसू तेस्सा किस्ती मन्झ बैठी किन्हें तिन्हा जो स्खाई सके होर भीड़ तेस जो नी दबाई सके। 10क्यूंकि तिन्हें बौह्त बीमार ठीक कितिरे थे; इधी कठे जितने भी लोक बमारिया मन्झ थे, स्यों यीसू जो छूणे रे कठे तेस पर पई जाया करहा ऐं थे। 11होर जो लोक जिन्हा मन्झ दुस्टात्मा थी जेबे स्यों यीसू जो देख्ही किन्हें पई जाहीं थी, होर चिंगी किन्हें बोल्हा ई थी कि, “तू परमेसरा रा मह्ठा आ।” 12होर यीसूए दुस्टात्मा किन्हें बोल्या, “खबरदार केसियो देख्या दसदे कि हांऊँ कुणहां।”

बारा चेलेया जो चुणना

(मत्ती 10:1-4; लूक. 6:12-16)

13फेरी यीसू प्हाड़ा पर चढ़ी गया, होर तिन्हें स्यों सादे जिन्हा जो से आपणे साउगी लई जाणा चाहां था; होर स्यों तेस वाले आये। 14तेबे तिन्हें तिन्हा मन्झा ले बारा लोक नियुक्त किते होर तिन्हा जो आपणा चुणिरा चेला बोल्या, ताकि स्यों तेस साउगी-साउगी रही सको, होर से तिन्हा जो प्रचार करणे रे कठे भेजी सको। 15होर दुस्टात्मा जो काढणे रा हक रखी सको।

16होर स्यों बारा चेले जो तिन्हें नियुक्त किते स्यों यूंआं ऐं, समौन जेसरा नांऊँ यीसूए पतरस रख्या। 17होर जब्दी रा मह्ठा याकूब होर यहून्ना, जेसरा नांऊँ तिन्हें बूअनरगिस, मतलब “गर्जना रा मह्ठा” रख्या। 18होर अन्द्रियास, होर फिलिप्पुस, होर बरतुल्मै, होर मत्ती, होर थोमा, होर हलफईसा रा मह्ठा याकूब; होर तद्दै, होर समौन कनानी। 19होर यहूदा इस्करयोति, जिन्हें बादा मन्झ यीसू पकड़वाया था।

यीसू होर दुस्टात्मा रा मुखिया सैतान

(मत्ती 12:22-32; लूक. 17:14-23; 12:10)

20होर यीसू घरा आया होर दबारा इतनी भीड़ कठी हुई गयी कि, यीसू होर तेसरे चेलेया जो रोटी खाणे रा टैम भी नी मिल्या। 21जेबे तेसरे घरा वाले ये सुणेया, ता स्यों यीसू जो घरा वापस ल्याउणे रे कठे आये; क्यूंकि तिन्हा जो एह्ड़ा लग्हा था कि से आपणे होसा मन्झ नी आ।

22होर व्यवस्था स्खाणे वाल़े, जो यरुस्लेम सैहरा ले आईरे थे, ये बोल्हा ऐं थे कि, “यीसू मन्झ सैतान आ,” होर सैतान दुस्टात्मा रा मुखिया आ, होर ये भी बोल्हा ऐं थे कि, “से तेसरे सहारे दुस्टात्मा काढा आ।”

23होर यीसूए सब लोक आपु वाले सादी किन्हें, तिन्हा किन्हें उदाहरणा मन्झ बोल्दा लग्या, “सैतान किहाँ आपणी ई दुस्टात्मा जो काढी सक्हा? 24होर अगर केसी राज्या रे लोका मन्झ फूट पई जाए, ता से राज्य किहाँ मजबूत बणी रही सक्हा? 25होर अगर केसी घरा रे लोका मन्झ फूट पई जाए, ता क्या घर मजबूत बणी रही सक्हा? 26होर अगर सैतान आपणे ही बरखलाफ हुई किन्हें फूट पाई दे, ता से किहाँ मजबूत बणी रही सक्हा? तेसरा ता खात्मा हुई जाणा। 27मुंजो ये गल साफ तरीके किन्हें दसणे दे। कोई आदमी सैताना साहीं केसी पैहलवाना रे घरा मन्झ बड़ी किन्हें तेसरी चीजा नी चोरी सक्दा, जेबे तक कि से पैहले तेस पैहलवाना जो बान्ही नी ले; होर तेबे से तेसरे घरा जो लुटी सक्हा। 28हांऊँ तुस्सा किन्हें सच्च बोल्हा कि, जो पाप माह्णुं करहा ऐं, तिन्हारे सब पाप होर बदनामी माफ किती जाणी। 29पर जो कोई पवित्र आत्मा रे बरखलाफ निंदा करघा, परमेसरा से कधी माफ नी करणा: पर तेस अनंत पापा रा अपराधी बणना।” 30यीसूए इधी कठे बोल्या क्यूंकि व्यवस्था स्खाणे वाल़े एह्ड़ा बोल्हा ऐं थे कि, “यीसू अंदर दुस्टात्मा ई।”

यीसू री माऊ होर भाई

(मत्ती 12:46-50; लूक. 8:19-21)

31होर यीसू री माऊ होर तेसरे छोटे भाई आये, होर घरा बाहर खड़ी रहे, होर यीसू जो बुलाणे कठे केसी जो अंदर भेज्या। 32होर भीड़ तेसरे ओरे परे बैठी किन्हें तेस जो सुणदी लगिरी थी, होर तिन्हें यीसू के बोल्या, “तेरी माऊ होर तेरे छोटे भाई बाहर तुजो तोपेया करहा ऐं।”

33यीसूए तिन्हा जो जवाब दितेया कि, “मेरी माऊ होर मेरे भाई कुणहें?” 34होर जो तेसरे ओरे परे बैठीरे थे, तिन्हा जो देखी किन्हें तिन्हें बोल्या, “मेरी माऊ होर मेरे भाई यों ऐं। 35क्यूंकि जो कोई परमेसरा री इच्छा पर चल्हा, सेई मेरा भाई, होर मेरी बैहण होर मेरी माऊ ई।”

Currently Selected:

मरकुस 3: MJLNT

Highlight

Copy