लूका 9

बारा चेले भेजे जाणे

(मत्ती 10:5-15; मरकु. 6:7-13)

1फेरी यीसूए बारा चेले सादी किन्हें तिन्हा जो सब दुस्टात्मा होर ब्मारिया जो दूर करणे री सामर्थ होर हक दितेया। 2होर यीसूए आपणे चेले परमेसरा रे राजा रा प्रचार करणे, होर ब्मारा जो ठीक करणे रे कठे भेजे। 3यीसूए आपणे चेले किन्हें बोल्या, “पैंडे रे कठे कुछ देख्या लैंदे, ना ता डंडा, ना ता रोटी, ना झोला, होर ना बटुऐ मन्झ ढब्बे, होर ना दो-दो कुरते। 4होर कोई तुस्सा जो आपणे घरा सादे, ता तेस घरा मन्झ ई रहुआ, जेबे तक कि तुस्से तेस गांऊँआं जो छाडी नी देंघे। 5जो कोई तुस्सा जो नी अपनाए तेस गांऊँआं ले निकल्दे हुए आपणे पैरा री धूड़ा जो झाड़ी देआ, ताकि तिन्हारे बरखलाफ ये गुआही हो।” 6होर स्यों निकली किन्हें गांऊँआं-गांऊँआं खुसी री खबर सुणान्दे, होर हर जगहा लोका जो ठीक करदे फिरे।

हेरोदेसा रा घबराणा

(मत्ती 14:1-12; मरकु. 6:15-29)

7होर चौथाई देसा रे गलील जिल्ले रे अन्तिपास राजा ये सब गल्ला सुणी किन्हें डरी गया, क्यूंकि कई बोल्हा ऐं थे कि, यहून्ना बपतिस्मा देणे वाल़ा मरिरे मन्झा ले जिउंदा हुई गईरा। 8होर कई ये बोल्हा ऐं थे कि, एलिय्याह नबी जाहिर हुई गईरा: होरिये ये बोल्या कि, कोई महान पुराणे नबिया मन्झा ले कोई जिउंदा हुई गईरा। 9पर हेरोदेस राजे बोल्या, “यहून्ना बपतिस्मा देणे वाल़े रा ता मैं मूंड कटाई दितिरा था, ऐबे ये कुणहां, जेसरे बारे मन्झ हांऊँ एह्ड़ी गल्ला सुणहां?” होर तिन्हें तेस जो देखणे री इच्छा जाहिर किती।

पांज हजार मर्धा जो खाणा खुआणा

10फेरी यीसू रे चुणिरे चेले वापस आई किन्हें जो कुछ तिन्हें कितिरा था तेस जो दसी दितेया। होर से तिन्हा जो लई किन्हें बैतसैदा गांऊँआं जो गया ताकि स्यों कल्हे रही सके। 11पर बौह्त सारे लोक ये जाणी किन्हें कि यीसू तेथी आ तेसरे वाले चली गये। होर यीसू खुसी साउगी तिन्हा किन्हें मिल्या, होर से तिन्हा किन्हें परमेसरा रे राजा री गल्ला करदा लग्या, होर जो ब्मार ठीक हूंणां चाहें थे, तिन्हें स्यों ठीक करी दिते। 12जेबे ध्याड़ा ढल्दा लग्या, ता तेसरे बारा चेले तेस वाले आई किन्हें बोल्दे लगे, “लोका जो भेजी दे, ताकि स्यों चारो तरफा रे गांऊँआं होर बस्ती मन्झ जाई किन्हें आपणे रैहणे होर खाणे रा इंतजाम करी सके, क्यूंकि आस्से एथी सुनसान जगहा मन्झ ऐं।” 13यीसूए आपणे चेले किन्हें बोल्या, “तुस्से ई इन्हा जो खाणे रे कठे देआ।” तिन्हें बोल्या, “आस्सा वाले पांज रोटिया होर दो मछिया जो छाडी किन्हें होर कुछ नी आ, पर हां, अगर आस्से जाई किन्हें इन्हा सभी लोका रे कठे खाणा मूले खरीधगे, ता हुई सक्हा।” (तेथी लगभग पांज हज़ार आदमी थे।)

14तेबे यीसू आपणे चेले किन्हें बोल्या, “तिन्हा जो पन्ज्याह-पन्ज्याहा री घीढ़ी मन्झ बठ्याली देआ।” (स्यों पांज हज़ार मर्ध थे पर तिन्हें ज्नानिया होर बच्चे नी गिणीरे थे) 15चेले तेह्ड़ा ई कितेया, होर सब लोक बठ्याली दिते। 16तेबे तिन्हें स्यों पांज रोटिया होर दो मछिया लई, होर स्वर्गा री तरफा जो देखी किन्हें धन्यावाद कितेया, होर रोटिया तोड़ी-तोड़ी किन्हें तिन्हा चेले जो देंदे गये, ताकि स्यों लोका जो बांडी सके। 17होर स्यों खाई किन्हें रजी गये। होर खाणे ले बाद बी रोटी होर मछिया बची गई, होर तिन्हें बचीरी रोटिया री बारा भर्हिरी छड़ोल्लू चक्के।

पतरस रा यीसू जो मसीह रे रूपा मन्झ मनणा

18जेबे यीसू कल्हे प्रार्थना करेया करहा था, ता चेले तेस साउगी थे, होर तिन्हें तिन्हा ले पूछेया कि, “लोक मुंजो क्या बोल्हा ऐं की हांऊँ कुणहां?” 19तिन्हें जवाब दितेया, “कई लोक बोल्हे कि यहून्ना बपतिस्मा देणे वाल़ा, कई लोक बोल्हा ऐं कि तू एलिय्याह नबी आ, होर कुछ एह्ड़ा भी बोल्हे कि पुराणे नबिया मन्झा ले कोई जिउंदा हुई गईरा।” 20यीसूए तिन्हा ले पूछेया, “पर तुस्से मुंजो क्या बोल्हा ऐं की हांऊँ कुणहां?” पतरसे जवाब दितेया, “तू परमेसरा रा भेजिरा मसीह आ।” 21तेबे यीसूए स्यों खबरदार किते कि, “ये गल केसी किन्हें देख्या बोल्दे कि हांऊँ मसीह आ।”

यीसू रे ज्रीए आपणी मौता रे बारे मन्झ भविस्यवाणी

22होर यीसूए बोल्या कि, “हांऊँ माह्णुं रे मह्ठे रे कठे जरूरी आ कि हांऊँ बौह्त दुःख उठाऊँ, होर यहूदी मुखिये, मुख्य याजक होर व्यवस्था स्खाणे वाल़े मुंजो बेकार समझी किन्हें मारी दे, होर हांऊँ त्रीजे ध्याड़े जिउंदा हुई जाऊँ।”

यीसू रा चेला बणने रा मतलब

23यीसूए सभी किन्हें बोल्या, “जो कोई मेरा चेला बणना चाहां, से आपणी इच्छा पूरा करणे रे बजाए दुःखा रा क्रूस चकी किन्हें मेरा चेला बणे। 24जो कोई आपणी जान बचाणा चाहां, तेस अनंतकाला री जिन्दगी खोई देणी, पर जो कोई मेरे कठे आपणी जान गुआई देह्न्गा, तेस ही हमेसा री जिन्दगी पाणी। 25होर अगर तुस्से पूरे संसारा री चीज़ा कठा करी ले, फेरी भी अनंत जिन्दगी नी पाई सके, होर तेता जो गुआई दे, ता तेस जो क्या फायदा हूंणा? 26जिन्हा मेरे होर मेरे बचना री वजहा ले मेरा इनकार करणा, मां माह्णुं रे मह्ठे जेबे पवित्र स्वर्गदूता किन्हें आपणे बापू री महिमा साउगी आऊंणा, तेबे मां भी, तिन्हारा इनकार करणा। 27हांऊँ तुस्सा किन्हें सच्च बोल्हा कि, एथी बौह्त लोक खड़ीरे कि तिन्हा परमेसरा रा राज देखी लैणा, होर तेबे ही तिन्हा मरणा।”

यीसू रा रूप बधलणा

(मत्ती 17:1-8; मरकु. 9:2-8)

28इन्हा गल्ला रे कुछ आठ ध्याड़े ले बाद, यीसूए पतरस, यहून्ना होर याकूबा जो साउगी लेई किन्हें प्रार्थना करणे रे कठे प्हाड़ा पर गया। 29जेबे यीसू प्रार्थना करेया ई करहा था, ता तेसरे चेहरे रा रूप बदली गया, होर तेसरा कपड़ा चीटा हुई किन्हें चमक्दा लग्या। 30तेबे मूसा होर एलिय्याह नबी, ये दो माह्णुं यीसू साउगी गल्ला करेया करहा ऐं थे। 31ये महिमा साउगी जाहिर हुए; होर स्यों तेसरे मरणे री चर्चा करेया करहा ऐं थे, जो यरुस्लेम सैहरा मन्झ हूंणे वाल़ा था। 32पतरस होर तेसरे साथी निंद्रा किन्हें भर्ही रे थे, होर जेबे स्यों पूरी तरह जागी गये, ता तिन्हें तेसरी महिमा; होर दो माह्णुं, जो तेस साउगी खड़ीरे थे। 33जेबे मूसा होर एलिय्याह नबी तेस वाले ले जांदे लगे, ता पतरसे यीसू किन्हें बोल्या, “हे माल्का, आस्सा रा एथी रैहणां ठीक आ। इधी कठे आस्सा तीन तरपाला वाले डेरे बनाणे, एक तेरे कठे, एक मूसा नबी रे कठे, होर एक एलिय्याह नबी रे कठे।” से नी जाणदा था कि से क्या बोल्या करहा। 34से ये बोल्या ई करहा था कि, एक बादले आई किन्हें स्यों घेरी लये, होर जेबे स्यों बादला किन्हें घिरदे लगे ता डरी गये। 35होर तेस बादला मन्झा ले परमेसरे बोल्या कि, “ये मेरा लाडला मह्ठा आ, जो मेरा चुणिरा आ, एसरी सुणां।” 36ये अवाज हुंदे ई यीसू कल्हा ई रही गया, होर स्यों चुप रहे, होर तेस टैम तिन्हें जो कुछ देख्या तेता मन्झा ले कोई भी गल तिन्हें केसी किन्हें नी बोली।

दुस्टात्मा ले दुखी बच्चे रा ठीक हूंणा

(मत्ती 17:14-18; मरकु. 9:14-27)

37जेबे यीसू होर तेसरे त्राय चेले प्हाड़ा ले उतरी गये, तेता रे अगले ध्याड़े एक बडी भीड़ तेस किन्हें आई मिली। 38तेबे भीड़ा मन्झा ले एक माह्णुंऐ चिंगी किन्हें बोल्या, “हे गुरु, हांऊँ तुध ले अर्ज करहा कि मेरे मह्ठे पर दया कर, क्यूंकि से मेरा एकलौता मह्ठा आ। 39होर एक दुस्टात्मा तेस जो पकड़ाई, होर से अचानक चिंगा पांदा लग्हा। होर दुस्टात्मा तेस जो मरोड़ा ई होर से मुंहा ले झाग निकल्दा लग्हा, होर तेस जो जमीना पर पटकी देहां ई, होर बड़ी मुस्किला किन्हें छाडा ई। 40होर मैं तेरे चेले ले अर्ज किती कि, स्यों तेस्सा दुस्टात्मा जो काढी दे; पर स्यों नी काढी सके।” 41यीसूए जवाब दितेया, “हे विस्वास नी करणे वाले होर जिद्दी लोको, मां कधी तक तुस्सा साउगी रैंह्णां, होर कधी तक तुस्सा री सैहणी? आपणे मह्ठे जो एथी मेरे वाले ल्याऊआ।” 42यीसू आया ही करहा था कि, दुस्टात्मे तेस जो पटकी किन्हें मरोड़ेया। यीसूए दुस्टात्मा प्रुआची होर मह्ठे जो ठीक करी किन्हें तेसरे बापू वाले भेजी दितेया। 43तेबे सब लोक परमेसरा रे बड़ी सामर्थ देखी किन्हें हरान हुई गये। पर जेबे सब लोक तिन्हा सभ कामा ले जो से करहा था, हरान हुएआ करहा ऐं थे,

आपणी मौता रे बारे मन्झ यीसू री दबारा भविस्यवाणी

44ता तिन्हें आपणे चेले किन्हें बोल्या, “तुस्से मेरी गल्ला बड़े ध्याना किन्हें सुणां, हांऊँ माह्णुं रा मह्ठा, मेरे दुसमणा मुंजो पकड़णे वाल़े।” 45पर स्यों एस गल्ला जो नी समझ्दे थे, होर ये गल इन्हा ले ल्हुखी रही; कि स्यों समझी नी पाए, होर स्यों एस गल्ला रे बारे मन्झ तेस ले पूछणे ले डरहा ऐं थे।

सभी ले बडा कुणहां?

46फेरी चेले आपु मन्झ ये बैहस करदे लगे कि, आस्सा मन्झ बडा कुणहां? 47पर यीसूए तिन्हारे मना रा विचार जाणी लया, होर एक बच्चा लई किन्हें आपणे वाले खड़ा कितेया, 48होर तिन्हा किन्हें बोल्या, “जो कोई मेरे साउगी प्यार करहा से एस बच्चे जो अपनाहां, से मुंजो अपनाहां, होर जो कोई मुंजो अपनाहां से मुंजो नी, पर मेरे भेजणे वाल़े परमेसरा जो अपनाहां। क्यूंकि जो तुस्सा मन्झ सभी ले छोटे ले छोटा आ, सेई बडा आ।”

जो आस्सा रे बरखलाफ नी आ से आस्सा वखा जो आ

49तेबे यहून्ने बोल्या, “हे माल्क, आस्से एक माह्णुं जो तेरे नांऊँआं ले दुस्टात्मा जो काढ़दे देख्या, होर आस्से तेस जो नांह किती, क्यूंकि से आस्सा साउगी तेरे चेले बणने रे कठे नी आऊंदा।” 50यीसूए तिन्हा किन्हें बोल्या, “तेस जो नांह नी करा; क्यूंकि जो तुस्सा रे बरखलाफ नी आ, से तुस्सा वखा जो आ।”

सामरी लोका रा यीसू रे बरखलाफ हुई जाणा

51जेबे यीसू रे स्वर्गा जो उठाए जाणे रे ध्याड़े पुरे हूंणे वाल़े थे, ता तिन्हें यरुस्लेम सैहरा जो जाणे रा पक्का विचार बणाया। 52होर तिन्हें आपणे दूत पैहले ई भेजी दिते: स्यों सामरिया ईलाके रे एक गांऊँआं मन्झ गये, ताकि स्यों तेसरे कठे जगहा त्यार करहे। 53पर तिन्हें लोके यीसू रा तेथी स्वागत नी कितेया, क्यूंकि से यरुस्लेम सैहरा जो जाया करहा था। 54ये देखी किन्हें तेसरे चेले याकूब होर यहून्ने बोल्या, “हे प्रभु; क्या तू चाहां कि आस्से हुक्म देईऐ कि, आसमाना ले आग पई किन्हें तिन्हा जो भस्म करी दे।” 55पर तिन्हें मुड़ी किन्हें स्यों झिड़के होर बोल्या, “तुस्से नी जाणदे कि तुस्से केह्ड़ी आत्मा रे ऐं। 56क्यूंकि हांऊँ माह्णुं रा मह्ठा लोका रे प्राणा जो नास करणे रे कठे नी पर बचाणे रे कठे आईरा।” होर स्यों केसी होर गांऊँआं मन्झ चली गये।

यीसू रा चेला बणने री कीमत

(मत्ती 6:19-22)

57जेबे यीसू होर तेसरे चेले पैंडे मन्झ चल्या करहा ऐं थे, ता केसिए तेस किन्हें बोल्या, “जेथी-जेथी तुध जाणा, मां तेरा चेले बणने रे कठे तेरे साउगी आऊंणा।” 58यीसूए तेस किन्हें बोल्या, “लोमड़ीया रे डुआर होर आसमाना रे चिड़ुआ रे कोह्ल हुंहाँ ऐं, पर हांऊँ माह्णुं रे मह्ठे रे कठे सौणे जो घर बी नी हाया।” 59यीसूए दूजे माह्णुं किन्हें बोल्या, “आ मेरा चेला बण।” तिन्हें बोल्या, “हे प्रभु, मुंजो पैहले जाणे दे। मेरे बापू रे मरणे रे बाद हांऊँ तेस जो दबाई दूं, तेबे मां तेरा चेले बणने रे कठे तेरे साउगी आऊंणा।” 60यीसूए तेस किन्हें बोल्या, “मरिरे या जो आपणे मुर्दे आपु दबाणे दे, पर तू जाई किन्हें परमेसरा रे राज्या रा प्रचार सुणा।” 61एकी होरिये भी बोल्या, “हे प्रभु, मां तेरा चेला बणना; पर पैहले मुंजो जाणे दे कि हांऊँ आपणे घरा रे लोका किन्हें ग्लाई आऊँ?” 62यीसूए तेस किन्हें बोल्या, “अगर कोई आपणी डोर्ही मन्झ हल च्लाणा सुर्हू करी दे होर फेरी पीछे देख्दा लगी जाए, से परमेसरा रे राजा रे लायक नी आ।”

Currently Selected:

लूका 9: MJLNT

Highlight

Copy