लूका 19

चुंगी लैणे वाल़ा जक्कई

1यीसू यरीहो सैहरा मन्झा ले हुई किन्हें जाया करहा था। 2तेथी जक्कई नांऊँआं रा एक माह्णुं था जो चुंगी लैणे वाल़े रा मुखिया था। होर से अमीर आदमी था। 3से यीसू जो देखणा चांहां था कि से कुणहां? पर भीड़ा री वजहा ले से तेस जो देखी नी सकेया, क्यूंकि से बौणा था। 4तेबे तेस जो देखणे रे कठे जक्कई आगे दौड़ी किन्हें एक अंजीरा रे डाला प्रयाह्ले चढ़ी गया, क्यूंकि यीसू तेस पैंडे ले हुई किन्हें जाया करहा था। 5जेबे यीसू तेस अंजीरा रे डाला वाले पुज्हेया, ता तिन्हें गास देखी किन्हें तेस जो बोल्या, “हे जक्कई झटपट उतरी जा, क्यूंकि आज मेरा तेरे घरा मन्झ रैंह्णां जरूरी आ।” 6से झटपट डाला ले थाले उतरेया होर आपणे घरा यीसू जो लई गया, होर खुसी किन्हें तेसरा स्वागत कितेया। 7ये देखी किन्हें सभ लोक बड़बड़ान्दे लगे, “से ता एक पापी माह्णुं रे घरा चली गया।” 8खाणा खांदी बारी जक्कई ऐे खड़ी किन्हें प्रभु किन्हें बोल्या, “हे प्रभु यीसू, देख हांऊँ आपणी आधी जायदाद गरीबा जो देई देहां, होर अगर मैं केसी रा कर भी बईमानी करी किन्हें लई लईरा हो, ता तेस जो मां चार गुणा वापस करी देणा।” 9तेबे यीसूए तेस किन्हें बोल्या, “आज एस घरा रे लोका मन्झ उद्धार आईरा, इधी कठे कि ये भी अब्राहमा रा एक मह्ठा। 10क्यूंकि जो लोक परमेसरा ले दूर हुई गईरे तिन्हा जो तोपणे होर तिन्हारा उद्धार करणे रे कठे हांऊँ माह्णुं रा मह्ठा आईरा।”

दस मोहरा रा उदाहरण

(मत्ती 25:14-30)

11जेबे स्यों लोक ये गल्ला सुणदे लगिरे थे, ता यीसूए एक होर उदाहरण बोल्या। यीसू यरुस्लेम सैहरा रे नेडे था, इधी कठे लोके सम्झेया कि परमेसरा रा राज ऐबे आऊणें वाल़ा आ। 12एता कठे तिन्हें बोल्या, “एक अमीर आदमी दूर देसा जो चली गया ताकि से राजे रा पद पाई किन्हें वापस आये। 13होर तिन्हें आपणे नौकरा मन्झ ले दस सादे होर तिन्हा जो दस मोहरा दिती। (एक मोहर सो ध्याड़े री कमाई रे बराबर) होर तिन्हा किन्हें बोल्या, ‘मेरे वापस आऊणें तक लेण देण करी किन्हें तेता जो बढ़ाई देआ।’ 14पर तेसरे गांऊँआं मन्झ रैहणे वाल़े तेस किन्हें बैर रख्हा ऐं थे, होर तेसरे पीछे दूता रे ज्रीए सादा भेज्या, आस्से नी चाहंदे कि, ये आस्सा रा राजा बणे। 15जेबे से राजे रा पद पाई किन्हें वापस आई गया, ता एह्ड़ा हुएया कि तिन्हें आपणे नौकरा जो जिन्हा जो तिन्हें पैसे देई दितिरे थे, स्यों आपणे वाले सादे ताकि ये जाणी सके कि लेण देण करी किन्हें क्या-क्या कमाया। 16तेबे पैहले नौकरे आई किन्हें बोल्या कि, ‘हे मेरे माल्क, तुस्से मुंजो एक मोहर दितिरी थी, मैं एता ले दस मोहरा होर कमाई।’”

17माल्के तेस नौकरा किन्हें बोल्या, “साबास, ‘खरे सेऊआदार, तू धन्य आ, तू बौह्त थोह्ड़े मन्झ भरोसे रे लायक निकल्या, ऐबे मां तुजो दस गांऊँआं री जिम्मेदारिया देणी।’ 18दूजे नौकरे आई किन्हें बोल्या, ‘हे माल्क, मैं तुस्सा री दितिरी मोहरा किन्हें पांज मोहरा होर कमाई।’ 19माल्के तेस किन्हें बोल्या कि, मां तुजो भी पांज गांऊँआं री जिम्मेदारिया देणी। 20त्रीजे आई किन्हें बोल्या, ‘हे माल्क, तेरी मोहर ऐे ई, जो मैं तौलिए मन्झ बान्ही रखिरी। 21क्यूंकि हांऊँ तेरे ले डरी गईरा था, इधी कठे कि तू एक कठोर आदमी आ, जो तैं नी रखिरा तेस जो तू चकी लैहां, होर जो तैं नी बाहीरा, तेस जो काटी देहां।’”

22“माल्के तेस किन्हें बोल्या, ‘हे दुस्ट सेऊआदार, मां तेरे ग्लाणे रे मताबक तेरा न्याय करणा। तू मुंजो जाणहां था कि हांऊँ कठोर आदमी आ। होर जो मैं नी रख्या तेस जो हांऊँ चकी लैहां, होर जो मैं नी बाहिरा, तेस जो काटहा। 23ता तैं मेरे पैसे सौहकारा वाले जम्हा कि नी कुराहें, ताकि हांऊँ आई किन्हें ब्याजा समेत लई लैंदा।’ 24होर जो लोक नेडे खड़ीरे थे, माल्के तिन्हा किन्हें बोल्या, ‘से मोहर तेस ले लई लऊआ, होर जेस वाले जे दस मोहरा ई तेस जो देई देआ।’ 25तिन्हें तेस किन्हें बोल्या, ‘हे माल्का, तेस वाले दस मोहरा ई।’ 26हांऊँ तुस्सा किन्हें बोल्हा आ कि, ‘जेस वाले जे हाया तेस जो होर दितेया जाणां। होर जेस वाले जे नी आ तेस ले से भी लई लैणा जो तेस वाले हाया। 27पर मेरे दुस्मण जो नी चाहंदे कि, हांऊँ तिन्हारा राजा बणुं, तिन्हा जो एथी ल्याई किन्हें मेरे साम्हणें जानी ले मारी देऊआ।’”

यरुस्लेम सैहरा मन्झ यीसू रा दाखल हूंणा

(मत्ती 21:1-11; मरकु. 11:1-11; लूक. 12:12-19)

28ये गल्ला बोली किन्हें यीसू तिन्हारे अगे-अगे यरुस्लेम सैहरा वखा जो चल्दा लग्या। 29होर जेबे से जैतूना रे प्हाड़ा पर बैतफगे होर बैतनिय्याह गांऊँआं वाले पूजे, ता तिन्हें आपणे चेले मन्झा ले दो ये बोल्या किन्हें भेजे कि, 30“साम्हणें रे गांऊँआं मन्झ जाई किन्हें तुस्सा जो एक गधी रा बच्चा मिलणा जेस पर जे कधी कोई चढ़ीरा नी हो। से तुस्सा जो बान्हिरा हुआ मिलणा, तेस जो खोल्ही किन्हें ल्याऊआ। 31होर अगर कोई तुस्सा ले पूछे कि, तुस्से एस जो किधियो खोलेया करहा ऐं, ता ये बोली देआ कि, प्रभु जो एसरी ज्रूरत ई।”

32जो भेजीरे थे, तिन्हें जाई किन्हें जेह्ड़ा यीसूए तिन्हा किन्हें बोलिरा था, तेह्ड़ा ई तिन्हें पाया। 33जेबे स्यों गधे रे बच्चे जो खोलेया करहा ऐं थे, ता तेसरे माल्के तिन्हा ले पूछेया, “एस बच्चे जो किधियो खोलेया करहा ऐं?” 34तिन्हें बोल्या, “प्रभु जो एसरी ज्रूरत ई।” 35स्यों गधी रे बच्चे जो यीसू वाले लई आये होर तेस पर कपड़े ब्छ्याए होर यीसू तेस पर बैठी गये। 36जेबे यीसू जाया करहा था, तिन्हें तेसरा स्वागत करणे रे कठे आपणे कपड़े पैंडे मन्झ ब्छ्याये। 37होर नेडे आऊंदे-आऊंदे जेबे से जैतूना रे प्हाड़ा री ढलाना पर पुज्हेया, ता चेलेया री सारी मण्डली तिन्हा सभी चमत्कार जो तिन्हें देखिरे थे, खुस हुई किन्हें जोरा-जोरा किन्हें परमेसरा री बड़ाई करदे लगी गये।

38“धन्य आ से राजा, जो प्रभु रे हका ले आहूँआं; स्वर्गा मन्झ सांति होर आसमान मन्झ महिमा हो#19:38 भज. 72:18-19, भज. 118:26।”

39तेबे भीड़ा मन्झा ले कितने फरीसी लोक तेस किन्हें बोल्दे लगे, “हे गुरु आपणे चेले जो झिड़का इन्हें जे एह्ड़ा बोल्या।” 40यीसूए जवाब दितेया, “हांऊँ तुस्सा किन्हें बोल्हा, अगर ये लोक चुप रैहे, ता इन्हा पात्थरा चिंगी किन्हें मेरी महिमा करणी।”

यरुस्लेम सैहरा रे कठे रोणा

41जेबे यीसू यरुस्लेम सैहरा रे नेडे पूजी गया ता तिन्हें सैहरा जो देखी किन्हें तेथी रे लोका रे कठे रोंदा लगेया। 42होर बोल्या, “क्या ई खरा हुन्दा कि, तू हां, तू ई, आज इतना ई समझी लैन्दा कि सांति रा मतलब क्या आ! पर ऐबे ये गल्ला तेरी हाखिया ले ल्हुखी गईरी। 43क्यूंकि स्यों ध्याड़े तुध पर आऊणें कि तेरे दुस्मणा कान्ध बान्ही किन्हें तू घेरी लैणा, होर चहुँ वखा ले तू दबाणा। 44होर दुस्मणा ये सैहर तबाह करी देणा होर एस सैहरा साउगी-साउगी तेरे बाल बच्चे भी नास करी देणे होर जेबे तिन्हा सभ कुछ तबाह करी बैठणा। तेबे तेथी ये पात्थरा किन्हें बणिरा सैहर नी बचणा। होर ये सभ कुछ इधी कठे हूंणां क्यूंकि तैं से टैम नी पछ्याणया जेबे परमेसर तुजो बचान्दा आईरा था।”

मन्दरा मन्झा ले व्पारी काढे जाणे

(मत्ती 21:12-17; मरकु. 11:15-19; यहू. 2:13-22)

45तेबे यीसूए यरुस्लेम मन्दरा मन्झ जाई किन्हें व्य्पारिये बाहर काढे। 46होर यीसूए तिन्हा किन्हें बोल्या, “पवित्र सास्त्रा मन्झ लिखिरा कि, ‘मेरा मन्दर प्रार्थना रा घर हूंणां,’ पर तुस्से ये डाकुआ रा आडा बणाई दितिरा।” 47होर हर रोज यीसूए मन्दरा मन्झ तिन्हा जो उपदेस दितेया: होर मुख्य याजक होर व्यवस्था स्खाणे वाल़े होर मुख्य लोक तेस जो मारणे री ताका मन्झ रैहन्दे लगी रैहे। 48पर कोई उपाय नी काढी सके; कि ये केस तरीके किन्हें करिए क्यूंकि सभ लोक तेसरी बड़ी चाऊआ किन्हें सुणहां ऐं थे।

Currently Selected:

लूका 19: MJLNT

Highlight

Copy