यहून्ना 12
12
यीसू रे पैरा पर कीमती खुस्बूदार इत्र दलणा
(मत्ती 26:6-13; मरकु. 14:3-9)
1फेरी यीसू फसहा रे साजा ले छेह ध्याड़े पैहले बैतनिय्याह गांऊँआं मन्झ आया, जेथी लाज़र था। जेस जो यीसूए मरिरे मन्झा ले जिउंदा कितेया था। 2तेथी तिन्हें तेसरे कठे खाणा त्यार कितेया, होर मार्था सेऊआ करेया करहा ई थी, होर लाज़र तिन्हा मन्झा ले एक था, जो तेस साउगी खाणा खांदे बैठीरा था। 3तेबे मरियमे खुस्बूदार (आधा सेर) कीमती इत्र लई किन्हें यीसू रे पैरा पर मल्या। होर आपणे बाला किन्हें तेसरे पैर पून्झे, होर इत्रा री खुसबू किन्हें सारा घर भर्ही गया। 4पर तेसरे चेले मन्झा ले यहूदा इस्करयोति नांऊँआं रा एक चेला था, जो तेस जो पकड़वाणे वाल़ा था, से बोल्दा लग्या, 5“एस इत्रा री कीमत तीन सौ ध्याड़े री कमाई रे बराबर ई, होर एता जो बेची किन्हें गरीबा जो बांडी सक्हा ऐं।” 6तिन्हें ये गल इधी कठे नी बोली कि, तेस जो गरीबा री फिकर थी, पर इधी कठे कि से चोर था होर तेस वाले एक पैसेया री थैली हुईं थी, होर तेस थैली मन्झ जो कुछ भी पाहें थे, से काढी लैहां था। 7यीसूए बोल्या, “रैहणे देआ, ऐस्सा जो नी रोका, ऐस्से मेरे दफनाए जाणे री त्यारी रे कठे, ये कीमती खुस्बूदार इत्र बचाई किन्हें रखिरा था। 8गरीब ता तुस्सा साउगी हमेसा रैहणे, पर मां तुस्सा साउगी हमेसा नी रैंह्णां।”
लाजरा जो मारणे रे कठे सलाह
9यहूदी लोका जो पता चल्या कि यीसू यरुस्लेम सैहरा रे बैतनियाह गांऊँआं मन्झ आ। तेबे लोका री भीड़ ना सिर्फ यीसू जो देखणे पर लाज़रा जो बी देखणे आई, जेस जो यीसूए मरिरे मन्झा ले जिउंदा करी दितिरा था। 10तेबे मुख्य याजके लाज़रा जो भी मारणे रे कठे सलाह बणाई। 11क्यूंकि लाजरा री वजहा ले बौह्त लोक यहूदी अगुवे री सुणदे लगीरे थे, होर स्यों लोक यीसू पर विस्वास करदे लगे।
यरुस्लेम सैहरा मन्झ यीसू रा दाखल हूंणा
(मत्ती 21:1-11; मरकु. 11:1-11; लूक. 19:28-40)
12अगले ध्याड़े बौह्त सारे लोक साजे मन्झ आईरे थे। तिन्हें ये सुणी किन्हें कि यीसू यरुस्लेम सैहरा मन्झ आया करहा, 13तिन्हें खजरे रे पांगे लये, होर यीसू किन्हें मिलणे रे कठे निकली गये, होर चिंगी -चिंगी किन्हें बोलदे लगे, “परमेसरा री बड़ाई हो! धन्य आ इस्राएल देसा रा राजा, जो प्रभु रे हका ले आहूँआं।” 14जेबे यीसू यरूस्लेम सैहरा मन्झ आया करहा था ता तेस जो गधे रा बच्चा मिल्या, ता से तेस पर बैठी गया। 15ये इधी कठे हुआ कि जेह्ड़ा पवित्र सास्त्रा मन्झ लिखिरा आ कि,
“हे सिय्योन सैहरा#12:15 यरुस्लेम सैहरा रा दूजा नाऊँ सिय्योन सैहरा आ रे लोको, मत डरा;
देख, तुस्सा रा राजा गधे रे बच्चे पर चढ़ी किन्हें आऊंदा लगीरा।”
16तेसरे चेले, ये गल्ला पैहले नी समझीरे थे; पर जेबे यीसू री महिमा जाहिर हुई, ता तिन्हा जो याद आया कि, जेह्ड़ा सब कुछ यीसू साउगी हुआ स्यों गल्ला ठीक-ठीक तेसरे बारे मन्झ लिखिरी थी। 17तेबे भीड़ा रे लोके जो तेस टैम तेस साउगी थे होरिया किन्हें बोल्या कि तिन्हें लाज़रा जो डुआरा मन्झा ले सादी किन्हें, मरिरे मन्झा ले जिउंदा कितेया था। 18बौह्त लोक यीसू किन्हें मिलदे आये, क्यूंकि तिन्हें सुणिरा था कि, यीसूए ये चिन्ह दसेया। 19तेबे फरीसी लोके एक दूजे किन्हें बोल्या, “ये सही गल ई कि आस्से यीसू जो रोकणे मन्झ नाकामयाब हुई गईरे: देखा! एह्ड़ा लग्हा जिहां संसारा रे हरेक जण तेसरे चेले बणया करहा ऐं।”
यूनान देसा रे लोका रा यीसू जो तोपणा
20जो लोक तेस साजे मन्झ अराधना करदे आईरे थे तिन्हा मन्झा ले कई यूनान देसा रे लोक थे। 21तिन्हें गलील जिल्ले रे बैतसैदा गांऊँआं रे रैहणे वाले फिलिप्पुसा वाले आई किन्हें तेस ले अर्ज किती कि, “जनाब आस्से यीसू किन्हें मिलणा चाहें।” 22फिलिप्पुसे अन्द्रियासा वाले आई किन्हें एता रे बारे बोल्या, तेबे अन्द्रियासे होर फिलिप्पुसे इन्हा गल्ला रे बारे यीसू किन्हें बोल्या। 23एता पर यीसूए तिन्हा किन्हें बोल्या, “से सही टैम आई गईरा कि हांऊँ माह्णुं रे मह्ठे री महिमा हो। 24हांऊँ तुस्सा किन्हें सच्च -सच्च बोल्हा कि, जेबे तक कणका रा दाणा जमीना मन्झ पई किन्हें मरी नी जांदा, से कल्हा रही जाहाँ पर जेबे से मरी जाहाँ, से बौह्त फल्हा फुल्हा। (होर मेरे किन्हें भी हूंणा) 25जो आपणी जाना जो प्यारा जाणहां, तेस अनंतकाला री जिन्दगी गुआई देणी। होर जो एस संसारा मन्झ आपणी जान जो नी चाहन्दा, तेस आपणी जान अनंत जिन्दगी तक बचाई किन्हें रखणी। 26अगर जो कोई मेरी सेऊआ करणा चाहां, ता से आई किन्हें मेरा चेला बणे; होर जेथी हांऊँ आ तेथी मेरा सेऊआ करणे वाल़ा भी हूंणां। अगर कोई मेरी सेऊआ करघा, ता बापू तेसरी इज्जत करणी।”
क्रूसा री मौता वखा जो इसारा
27“ऐबे मेरा मन दुआस हुई गईरा होर हांऊँ क्या बोलू कि, ‘हे बापू, मुंजो दुःखा री एस्सा घड़ीया ले बचाई ले?’ पर एस्सा दुःखा री घड़ीया रे कठे ता ही हांऊँ एस संसारा मन्झ आईरा। 28हे बापू आपणे नांऊँआं री महिमा कर!”
तेबे स्वर्गा ले परमेसरे बोल्या कि, “मैं तेसरी महिमा किती, होर दबारा बी करणी।”
29तेबे जो लोक खड़े हुई किन्हें तेस अवाज जो सुणेया करहा ऐं थे, तिन्हें बोल्या कि, बादल गरजया। होरिये बोल्या, स्वर्गदूते तेस किन्हें गल किती।
30एता पर यीसूए तिन्हा जो जवाब दितेया, “ये अवाज मेरे कठे नी ई पर तुस्सा रे कठे ई। 31ऐबे परमेसरा संसारा रा न्याय करणा, होर एस संसारा रा मुखिया सैतान काढी देणा। 32पर जेबे हांऊँ धरतीया ले उचे पर चढ़ाया जान्घा, ता मैं सभ आपणे वाले लई आऊणें।” 33एह्ड़ा बोली किन्हें यीसूए ये दसी दितेया कि, तेस केह्ड़ी मौत मरणा? 34एता पर लोके तेस किन्हें बोल्या कि, “आस्से पवित्र सास्त्रा मन्झ पढ़ेया कि, मसीहा हमेसा जीणां। फेरी तू किधियो बोल्हा कि, मां माह्णुं रे मह्ठे मरी जाणा, ये माह्णुं रा मह्ठा कुणहां?” 35यीसूए तिन्हा किन्हें बोल्या, “प्रयासा थोह्ड़ी देरा तक तुस्सा रे बीचा मन्झ आ। जेबे तक जोत तुस्सा साउगी ई तेबे तक चलदे रहा; एह्ड़ा नी हो कि न्हयारा तुस्सा जो घेरी ले; जो न्हयारे मन्झ चल्हा से नी जाणदा कि केथीयो जाहाँ। (ये जोत यीसू मसीहा जो दस्हा ई) 36जेबे तक प्रयासा तुस्सा साउगी आ, प्रयासे पर विस्वास करा ताकि तुस्से प्रयासे री बच्चे बणा।” ये गल्ला बोली किन्हें यीसू चली गया होर तिन्हा ले ल्हुखिरा रैहया।
यहूदी अगुवे रा विस्वास नी करणा
37होर यीसूए, तिन्हारे साम्हणें इतने चिन्ह दसे, तेबे बी तिन्हें यीसू पर विस्वास नी कितेया। 38ये इधी कठे हुआ ताकि यसायाह नबी रा बचन पूरा हुई जाए तिन्हें बोल्या कि,
“हे प्रभु, आस्सा री खबरा पर केसिए विस्वास नी कितेया?
होर प्रभु रा बडा सामर्थ केस पर जाहिर हुआ?”
39एता कठे स्यों विस्वास नी करी सके, क्यूंकि यसायाह नबिये दबारा बोल्या,
40“तिन्हें तिन्हारी हाखिया काणी, होर तिन्हारा मन कठोर करी दितेया,
केते एह्ड़ा नी हो कि, स्यों हाखिया ले देखदे,
होर मना ले समझे, होर मेरे वखा जो फिरी नी जाए,
होर हांऊँ तिन्हा जो चंगा करूं।”
41यसायाह नबिये ये गल्ला इधी कठे बोली, क्यूंकि तिन्हें यीसू री आऊणें वाली महिमा देखीरी थी, होर तिन्हें तेसरे बारे मन्झ गल्ला किती। 42तेबे बी कई खास अगुवे मन्झा ले कई लोके तेस पर विस्वास कितेया, पर फरीसी लोका री वजहा ले खुल्ही किन्हें तेस जो नी मन्नदे थे। तिन्हो डर था कि तिन्हो यहूदी सभा मन्झा ले काढी नी दे। 43क्यूंकि तिन्हो माह्णुं री बड़ाई ले परमेसरा री बड़ाई ले ज्यादा बांकी लगी।
ज्योति मन्झ चलणा
44यीसूए जोरा किन्हें भीड़ा किन्हें बोल्या, “जो मेरे पर विस्वास करहा, से मेरे पर नी, बल्कि मेरे भेजणे वाले पर विस्वास करहा ऐं। 45होर जो मुंजो देख्हा, से मेरे भेजणे वाले जो देख्हा। 46हांऊँ संसारा मन्झ प्रयासा बणी किन्हें आईरा ताकि जो कोई मेरे पर विस्वास करहा, से नह्यारे मन्झ नी रही सको। 47अगर कोई मेरी गल्ला सुणी किन्हें नी मनदे, ता मां से दोसी नी मनणा, क्यूंकि हांऊँ संसारा रे लोका जो दोसी बनाणे रे कठे नी, पर संसारा रे लोका रा उद्धार करणे रे कठे आईरा। 48जो मुंजो बेकार जाणहां होर मेरी गल्ला नी मन्नदा, मेरे बोलिरे सच्चे बचना से दोसी ठैहराणा होर एस बचना आखरी ध्याड़े तेसरा न्याय करणा। 49क्यूंकि मैं आपणे आपा किन्हें कोई गल्ला नी किती, पर बापू जिन्हें हांऊँ भेजिरा तिन्हें ई मुंजो हुक्म दितेया कि, हांऊँ क्या बोलू? होर किहाँ बोलू? 50होर हांऊँ जाणहां कि, तेसरा हुक्म अनंत जिन्दगी देहां, इधी कठे जो कुछ हांऊँ बोल्हा, ठीक तेह्ड़ा हांऊँ बोल्हा, जेह्ड़ा बापूए मुंजो बोलणे रा हुक्म दितिरा।”
Currently Selected:
यहून्ना 12: MJLNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
