लूका 22

यीशुये रे खलाफ शाजिश रचणा

(मत्ती 26:1-5; मरकुस 14:1,2; यूहन्ना 11:45-53)

1बिणा मलेड़े औल़ा रोटियां रा त्योहार, तिसरी पैहल जे फसह रे त्योहारा ते हुआं इ, नेड़े आईगरा था। 2तिस बेले मुखियायाजक कने शास्त्री यीशुये जो मारने री शाजिश रचणे च व्यस्त थे, पर सै लोकां ते डराँ थे।

यहूदा रा धोखा देणा

(मत्ती 26:14-16; मरकुस 14:10,11)

3फेरी शैतान यहूदा इस्करियोति च समाईया, सै जे यीशुये रे बारा चेलयां चते इक था। 4सै मुखियायाजक कने मन्दरा री रखवाल़ी करने औल़े मुखियां ले गया ताकि यीशुये जो पकड़ाणे रे सब्बीं ते बेहतर तरिके री गल्ल बात करी सक्को। 5यहूदा री इस सहायता रे करने ते सै बड़े खुश हुये, कने तिन्हें तिस्सो ईनामा च पैसे देणे रा बी बादा कित्या। 6सै तिन्हारे इस बादे ते सहमत हुईग्या, कने तदुआं तेई सै यीशुये जो पकड़ाणे रे येढ़े मौकयां री तलास करने लगया भई जिस बगत जे यीशुये रे नेड़े मते लोक नीं हो, तिस बेले हऊँ यीशुये जो चुपचाप पकड़वाई सक्को।

चेलयां सौगी फसह री आखरी धाम

(मत्ती 26:17-25; मरकुस 14:12-21; यूहन्ना 13:21-30)

7फेरी बिणा मलेड़े री रोटिया रे त्योहारा रा सै दिन आया, तिस दिन जे फसह रे भेडुये री बल़ि चढ़ाणा जरूरी था। 8यीशुये पतरस कने यूहन्ने जो ये बोलीने अग्गे भेज्या, भई “जाईने अहांरे खातर फसह रे खाणे री त्यारी करा, ताकि अहें सौगी बैठीने खाई सक्को।” 9तिन्हे यीशुये ते पुच्छया, “तुहें किति चाँये भई अहें खाणा बणाईये?” 10यीशुये जबाब दित्या, “तुहांरे यरूशलेम च दाखल हुन्दे इ, ऊत्थी तुहांजो पाणिये रा घड़ा चक्कीरा इक माहणु मिलणा। तिस घरा च जे सै जाओ; तुहें तिसरे पिच्छे चली जायों। 11तिस घरा रे मालका ते पुछयों, गुरुये तेरते पुछीरा, भई सै मेहमान्नां रा कमरा किति आ तिसच जे हऊँ अपणे चेलयां ने फसह रा खाणा खाई सक्कूं? 12तिस तुहांजो ऊपरलिया तरफा जो लेई जाणा तित्थी जे इक बड्डा कमरा पहले तेई सजीरा सजाईरा हूणा। तुहांरे खातर सैई जगह हूणी, कने तित्थी तुहें फसह रा खाणा बणायों।” 13फेरी सै चेले तिस नगरा जो गये कने तेढ़ा जे यीशुये तिन्हाने बोलीरा था, सब किछ तियां इ पाया कने तित्थी तिन्हे फसह रा खाणा बणाया।

प्रभु-भोज

(मत्ती 26:26-30; मरकुस 14:22-26; 1 कुरिन्थियों 11:23-25)

14ताहली जे ठीक वगत आया, यीशु अपणे बाराँ प्रेरितां सौगी मेज़ा पर खाणा खाणे बैट्ठे। 15यीशुये तिन्हाने गलाया, “हऊँ बड़िया बेसवरिया ने इसा घड़िया रे इन्तजारा च था भई मेरा दुख भोगणे रा बगत औणे कने मरने ते पहले तुहांजो सौगी बैठीने फसह रा खाणा खाऊं। 16काँह्भई हऊँ तुहांजो सच्च बोलां, भई तदुआं तक जे परमेशरा रे राज्जा च फसह रे त्योहारा रा मकसद पूरा नीं हुईजो, तदुआं तक मांज इसजो नीं खाणा।” 17फेरी यीशुये अंगूरां रे रसा रा प्याल्ला लेआ कने पिता परमेशरा रा धन्यवाद करने ते बाद गलाया, “इस प्याल्ले जो लेईने इक दुज्जे च बन्डी लौआ। 18तदुआं तक जे परमेशरा रा राज नीं आई लैन्दा, तदुआं तक मांज अज्जा ते अंगूरां रा रस कदीं नीं पीणा।” 19फेरी तिन्हे रोटी लेई; कने परमेशरा रा धन्यवाद करीने तोड़ी, फेरी अपणे चेलयां जो येढ़ा गलांदे हुयां दित्ति, “ये रोटी मेरे शरीरा रा प्रतीक आ तिसजो जे हऊँ तुहांरे खातर बलिदान चढ़ाईराँ, इसाजो खावा कने मिन्जो याद करने खातर ये रोटी खाया करा।” 20खाणा खाणे ते बाद तिन्हे अंगूरां रे रस्सा रा इक होर कटोरा लेआ कने गलाया, “ये अंगूरां रा रस्स परमेशरा रिया तरफा ते, तिन्हारे नये वायदे रा प्रतीक आ, कने ये येढ़ा करार आ तिस पर हऊँ अपणा खून बगाई ने तुहांरे खातर मोहर लगाणे औल़ा। 21पर इस मेचा पर अहां च इक येढ़ा माहणु बैठिरा, तिस जे हऊँ पकड़वाणा। 22माहणुये रे पुत्रा जो त परमेशरा रिया योजना रे मुतावक मरना इ हाया, पर लाणत इ तिस माहणुये पर तिस जे सै पकड़वाणा!” 23फेरी सै चेले अप्पूँ चियें इक दुज्जे ते पुछणे लगे भई अहां चते कुण आ सै जे येढ़ा करी सक्कां?

महान कुण? इस पर बैहस

24सै अप्पूँ चियें ये बैहस करने लगे भई तिन्हां चते सब्बीं ते महान कुण आ? 25यीशुये तिन्हाने गलाया, “अन्यजातियां रे राजा कने बड्डे-बड्डे नेते अपणे लोकां पर हक जमाई ने रक्खां ये, कने अप्पूँजो लोकां रा मित्र कैहलवाणा चाँये।” 26पर तुहें तेढ़े नीं हुयों बल्कि तुहां बिच सै जे सब्बीं ते महान आ, सै छोट्टे साई कने सै जे प्रधान आ, सै सेवका साई बणो। 27आमतौर पर मालक मेचा पर बैठीने रोटी खायें कने तिसरे सेवक तिसरिया सेवा च रैं, पर मेरने येढ़ा निआं! काँह्भई हऊँ तुहांरे बिच तुहांरे सेवका साई आ।

28पर तुहें सैये, सै जे मेरी परीक्षां च लगातार मेरे सौगी रै। 29इस खातर तियां जे मेरे पिता मिन्जो इक राज दित्तिरा, तियां इ हऊँ बी तुहांजो राजा बणने रा हक देआं ताकि, 30तुहें तिस राज्जा च मेरे मेचा पर खाई पी सक्को, कने तुहां राजयां रे आसणा पर बैट्ठीने इस्राएल रे बारा गोत्राँ रा फैसला करगे।

पतरस रे इन्कारा रा भविष्यवाणी

(मत्ती 26:31-35; मरकुस 14:27-31; यूहन्ना 13:36-38)

31“प्यारे शमौन! देख, शैताने परमेशरा ते तुहां सारयां लोकां री परीक्षा लेणे री अनुमति मंग्गी, खरे जो बुरे ते लग करने री, काँह्भई इक करसाण कणका जो भूआ ते लग करां। 32पर शमौन, प्राथना च मैं तेरे खातर बिनती किति भई तेरा विश्वास टुटी नीं जाओ, इस खातर ताहली जे तू अपणे पापां ते मन फिराई ने मेरले वापस आई जाओ, ताहली अपणे भाईयां#22:32 भाईयां यनिके चेलयां जो बी विश्वासा च मजबूत करयां।” 33पर पतरसे बोल्या, “प्रभु जी, हऊँ तेरे खातर जेल्ला जाणे जो त्यार आ, कने येत्थी तक भई तेरे सौगी मरने रे खातर बी त्यार आ।” 34फेरी यीशुये तिसने गलाया, “पतरस, हऊँ तेरने बोलां भई तदुआं तक जे तू तिन्न बार मेरा इन्कार नीं करी लेंगा भई हऊँ तिस्सो नीं जाणदा, तदुआं तक आज्ज कुकड़ा बांग नीं देणी।”

बटुआ, झोल़ी कने तलबार

35फेरी यीशुये अपणे चेलयां ते पुच्छया, “जिस वगत मैं तुहांजो खुशखबरिया रा प्रचार करने खातर बाहर भेज्या, कने तुहांले पैसा नीं था, झोल़ी नीं थी, कने नांत कपड़यां री कोई होर जोड़ी थी; तां क्या तुहांजो किसी चीज़ा री कमी महसूस हुई?” तिन्हे गलाया, “किसी बी चीज़ा री नीं।” 36फेरी यीशुये गलाया, “पर हुण लोक अहांरे बरोधा चे, इस खातर अप्पूँ सौगी झोल़ी कने पैसे रखी लौआ कने जे किसी ले तलवार नीं तां सै अपणा कोट बेच्चीने इक तलवार खरीदी लो! 37काँह्भई हऊँ तुहांजो दस्सां भई पवित्रशास्त्रा च सै जे लिखिरा : तिस्सो अपराधियां ने सौगी गिणया गया, ये मेरे बारे च कित्ती री भविष्यवाणी थी, हुण तिसारा मांह् च पूरा हूणा जरूरी आ; काँह्भई मेरे बारे च सै जे किछ लिखिरा, सै सब किछ पूरा हूणा।” 38चेलयां गलाया, “प्रभु, अहांले येत्थी दो तलवारां इयां।” यीशुये तिन्हाने गलाया, “बौहत इयां!”

जैतून रे पहाड़ा पर यीशुये री प्राथना

(मत्ती 26:36-46; मरकुस 14:32-42)

39फेरी सै ऊत्थीते उट्ठीने हर रोज्जा साई जैतून पहाड़ा पर गया। कने तिसरे चेले बी तिसरिया सौगी चलीपे। 40ताहली जे सै तिसा जगह पुज्जे तां यीशुये तिन्हाने गलाया, “प्राथना करा भई तुहांजो परीक्षा च नीं पौणे पौ।” 41सै चेलयां ते थोड़े जे दूर गया कने गोडयां रे भार प्राथना करने लगया, 42“पिता, जे तुहें चाओ तां, मिन्जो इन्हां कष्टां ते छुड़ाई सक्कां ये। पर हऊँ चाँह भई मेरी नीं तेरी ही इच्छा पूरी ओ।” 43फेरी स्वर्गा ते इक दूत आया, कने तिने यीशुये जो सामर्थ दित्ति। 44यीशु बड़ा बेचैन हुईने प्राथना करने लगया। तिसरिया आत्मा रा दर्द इतणा बधीग्या भई तिसरा परसीन्ना खून्ना रे टेपयां साई धरतिया पर टपकणे लगया। 45फेरी सै प्राथना ते उट्ठीने अपणे चेलयां ले गया, पर दुखा रिया वजह ने सै दवास हुईने सुत्तीरे दिखे। 46यीशुये तिन्हाते पुच्छया, “तुहें कजो सुत्तीरे? उट्ठा कने प्राथना करा, भई तुहें किसी परीक्षा च पैईने पाप नीं करो।”

प्रभु यीशुये जो धोखे च पकड़ना

(मत्ती 26:47-56; मरकुस 14:43-50; यूहन्ना 18:3-12)

47यीशु हल्तियें बोल्या इ कराँ था, ताहली लोकां री इक बड्डी भीड़ तिसा जगह आई पुज्जी। तिन्हां बारा चेलयां चते इक, तिसरा नौं जे यहूदा था, तिसा भीड़ा ते मूरे-मूरे चलीरा था। यहूदा यीशुये जो चुमणे खातर तिसरे नेड़े आया। 48फेरी यीशुये तिसने गलाया, “यहूदा, तू गल़े लाईने माहणुये रे पुत्रा जो कियां धोखा देई सक्कां?” 49सै जे किछ हुणे औल़ा था, तिस्सो देखीने यीशुये रे साथियें गलाया, “प्रभु जी, क्या अहें इन्हांजो तलवारी ने बार करिये?” 50कने तिन्हां चा ते इक्की अपणी तलवार महायाजका रे दास्सा पर चलाई कने तिसरा सज्जा कान्न बड्डीत्या। 51पर यीशुये गलाया, “बस, हुण बड़ा हुईग्या!” कने यीशुये तिसरे कन्ना ने छोईने तिसजो ठीक कित्या। 52फेरी यीशुये पर हमला करने आईरे मुखियायाजकां, मन्दरा रे रखवाल़यां रे मुखियां जो, कने बजुर्गां जो गलाया, “क्या हऊँ कोई चोर या डाकू आ, भई तुहें मिन्जो पकड़ने खातर तलवारां कने डन्डे लेईने आईरे? 53ताहली जे हऊँ हर रोज मन्दरा च तुहांजो सौगी हुआं था, तां तुहें तिस बगत मिन्जो काँह नीं पकड़या? पर ये तुहांरा बगत आ, सै बगत, ताहली जे अन्धेरे री ताकत काम्म कराँ इ।”

पतरसा रा इन्कार

(मत्ती 26:57,58,69-75; मरकुस 14:53,54,66-72; यूहन्ना 18:12-18,25-27)

54तिन्हे यीशु पकड़या कने महायाजका रे घरें लेईगे, कने पतरस दूर-दूर तिन्हारे पिच्छे चलीरा था। 55पैहरेदारें अंगणा च आग्ग बाल़ी कने तिसारे चऊँ पासयां बैठीगे, कने पतरस बी तिन्हारे बिच जाईने बैठिग्या। 56इक दासिये अग्गी रिया लोई च तिस्सो बैठिरा देख्या, कने सै तिसखा घूरदी रैई। तिसे गलाया, “ये माहणु त यीशुये रे चेलयां चा ते इक आ!” 57पतरसे इसा गल्ला ते नां किति कने गलाया, “नारी, हऊँ त तिस्सो जाणदा तक निआं!” 58थोड़िया देरा बाद, इक होर माहणुये तिसखा देख्या कने गलाया, “तू त तिन्हां चा ते इक आ!” पतरसे तिसने गलाया, “भाई जी, हऊँ तिन्हां चते निआं!” 59तकरीवन इक घण्टे बाद इक होर माहणुये जोर देईने गलाया, “पक्का, ये बी त तिस सौगी था; काँह्भई ये बी गलीली आ।” 60पर पतरसे गलाया, “भाई जी, हऊँ नीं जाणदा तू किस रे बारे च बोलीराँ।” तियां जे तिन्हें ये शव्द बोल्ले, तियां इ कुकड़े झांग देईती। 61तिसा इ घड़िया प्रभुये पतरसा खा जो मुड़ीने देख्या, फेरी तिस्सो याद आया भई प्रभुये गलाया था, “आज्ज ताहली जे कुकड़ा झांग देणी, ताहलुआं तक तिन्न दफा तू मेरा इन्कार करी चुक्कया हूणा।” 62फेरी पतरस तिस अंगणा ते निकल़ीने बाहरौ चलिग्या कने बिलकी-बिलकी ने रोणे लगया।

प्रभु यीशुये रा आगमन

(मत्ती 26:67,68; मरकुस 14:65)

63हुण सै पैहरेदार तिन्हे जे यीशु पकड़ीरा था, सै तिन्हारा मजाक डुआणे लगे कने तिन्हाजो मारने कुटणे लगे। 64तिन्हे यीशुये री आक्खीं पर पट्टी बन्हीती; कने तिसजो कुटया कने तिन्हाते पुच्छया, “भविष्यवाणी करने औल़े, हुण दस्स; तिज्जो किने कुटया?” 65तिन्हे तिसरी निंध्या करने खातर तिसजो होर बी मतियां गल्लां गलाईयां।

बड्डिया सभा रे सामणे यीशु

(मत्ती 26:59-66; मरकुस 14:55-64; यूहन्ना 18:19-24)

66ताहली जे दिन हुया तां मुखियायाजकां कने शास्त्रियां समेत लोकां रे बजुर्ग नेतयां री इक सभा हुई; फेरी सै लोक तिस्सो अपणी बड्डी सभा च ली आये। 67सै यीशुये ने बोलणे लगे, “जे तू मसीह आ तां अहांने बोल्ली दे!” पर यीशुये जबाब दित्या, “जे हऊँ तुहांजो दस्सूं, तां तुहां विश्वास नीं करना।” 68कने जे हऊँ तुहांते स्वाल पुछूं, तां तुहां बी जबाब नीं देणा। 69पर सै बगत जल्द आईराँ, ताहली जे माहणुये रे पुत्रा, सर्वशक्तिमान परमेशरा रे सज्जे पासे बैठणा। 70फेरी तिन्हे गलाया, “तां तुहांरे बोलणे रा मतलब येआ भई तुहें परमेशरा रे पुत्र ये?” यीशुये तिन्हाजो जबाब दित्या, “तुहें ठीक गलाया, हऊँ हाया।” 71तिन्हे गलाया, “हुण अहांजो होर गवांह री क्या जरूरत इ? तिस्सो येढ़ा गलांदे हुये अहें खुद सुणया!”

Currently Selected:

लूका 22: KFSNT

Highlight

Copy