यूहन्ना 12
12
यीशुये रे पैरा पर इत्र मल़णा
(मत्ती 26:6-13; मरकुस 14:3-9)
1यीशु फसह रे त्योहारा ते छे दिन पैहले बैतनिय्याह च आया तित्थी जे लाजर था, तिस्सो जे यीशुये मूईरयां चते जिऊंदा कित्या था। 2तित्थी यीशुये रा आदर करने खातर तिन्हें धाम बणाई; कने मार्था परोसया राँ थी। यीशुये सौगी रोटी खाणे औल़यां च लाजर बी था। 3तां मरियमे तिन्न सौ मिली लीटर असली जटामांसी रा बड़ा मैंहगा इत्र लेईने यीशुये रे पैरा पर मल़या, कने अपणयां बाल़ां ने तिसरे पैर साफ कित्ते, कने इत्रा रिया खुशवुआ ते सारा घर मैहकीग्या। 4पर तिसरयां चेलयां चते यहूदा इस्करियोति नौआं रा इक चेला सै जे तिस्सो पकड़वाणा चां था, सै बोलणे लगया, 5“ये इत्र तिन्न सौ दिनार#12:5 दिनार यनि चान्दिया रा सिक्का रा बेच्चीने गरीबां जो काँह नीं दित्या?” 6तिने सै गल्ल इस खातर नीं बोल्ली थी भई तिस्सो गरीबां री चिंता थी पर इस खातर बोल्ली थी भई सै चोर था, कने तिसले तिन्हांरी पैसयां री थैली रेआं थी कने तिसच सै जो किछ पां थे, सै कड्डी लेआं था। 7यीशुये बोल्या, “इसाजो रैहणे देआ तंग नीं करा, ये वगता ते पैहले मेरे दफनाये जाणे री त्यारी करया राँई। 8काँह्भई गरीब लोकां त सदा तुहां सौगी रैहणा, पर मांह सदा तुहांरे सौगी नीं रैहणा।”
लाजरा रे खलाफ शाजिश
9यहूदी लोकां री इक बड्डी भीड़ा जो ताहली जे ये पता लगया भई यीशु ऊत्थी बैतनिय्याह च था, तां लोक तिसने मिलणे जो आए। सै न सिर्फ यीशुये जो बल्कि तिस लाजरा जो बी देखणे खातर आए थे, तिस्सो जे यीशुये मूईरयां चते जिऊंदा कित्या था। 10इस खातर मुखियायाजकें लाजरा जो बी मारने री योजना बणाई, 11काँह्भई तिसरिया वजह ते बौहत सारे यहूदी लोकें अपणे अगुवेयां जो छड्डिने यीशुये पर विश्वास कित्या।
यरूशलेम च यीशुये रा स्वागत
(मत्ती 21:1-11; मरकुस 11:1-11; लूका 19:28-40)
12दुज्जे दिन बौहती लोकें त्योहारा रे आईरे थे सुणया भई यीशु यरूशलेम जो आय राँ। 13इस खातर तिने खजूरा रियां डालियां लईयां कने तिसने मिलणे जो चलीपे, कने बोलणे लगे,
“परमेशरा री जय हो!”
“आशीषित आ सै माहणु सै जे प्रभुये रे नौआं ते औआं।”
“आशीषित आ इस्राएल रा राजा!”
14फेरी यीशुये जो गधे रा इक बच्चा मिलया कने तियां जे सै यरूशलेम नगरा च आया सै तिस पर बैठिग्या, तियां जे पवित्रशास्त्रा च लिखिरा तियां इ हुया:
15“यरूशलेम रे लोको, घबरान्दे मता;
देक्खा, तुहांरा राजा गधे रे बच्चे पर बैठीने आया रां।”
16तिसरे चेले ये गल्लां पैहले नीं समझे थे, पर तंजे यीशुये री महिमा प्रगट हुई तां तिन्हांजो याद आया भई ये गल्लां तिसरे बारे च लिखी रियां थिआं, कने होरीं लोकें तिसने इस तरिके राई बर्ताब कित्या था।
17भीड़ा चते तिन्हें लोकें गवाही दित्ति सै जे तिस वक्त तिस सौगी थे ताहलूं जे लाजरा जो कब्रा चते सद्दीने जिऊंदा कित्या था। 18बौहत सारे लोक यीशुये ने मिलणे खातर आये थे, काँह्भई तिन्हें इस चमत्कारा रे बारे च सुणया था। 19तां फरीसी अप्पूँ चियें बोलणे लगे, “सोच्चा अहें किछ मनी करी सकदे। देक्खा, संसारा रे सारे लोक इसरे इ पिच्छे चली परे।”
यूनानियां रा यीशुये जो टोल़णा
20तित्थी किछ यूनानी थे सै जे इस त्योहारा च अराधना करने खातर यरूशलेम आईरे थे। 21तिन्हें गलील प्रदेशा रे बैतसैदा नगरा रे रैहणे औल़े फिलिप्पुसा ले जाईने विनती कित्ती, “श्रीमान! अहें यीशुये ने मिलणा चांये।” 22फिलिप्पुसे आईने अन्द्रियासा ने बोल्या, तां अन्द्रियासे कने फिलिप्पुसे जाईने यीशुये जो बोल्या।
23पर यीशुये तिन्हांजो बोल्या, “सै वगत आई गरा भई माहणुये रे पुत्रा री महिमा हो। 24हऊँ तुहांजो सच-सच बोलां भई तदुआं तकौ जे कणका रा दाणा मिट्टिया च मिलीने मरी नीं जान्दा, तदुआं तकौ सै कल्हा इ रई जां; पर तंजे मरी जां, तां मता फल़ ल्यावां। 25सै जे अपणे प्राणा ने प्यार कराँ, सै तिस्सो नाश करां; कने सै जे इस संसारा च अपणे प्राणा ने बैर करां, सै अनन्त जीवन पाणे खातर तिस्सो संभाली रक्खां। 26जे कोई मेरी सेवा करना चाओ, तां सै मेरे चेले बणो; कने तित्थी जे हऊँ आ, तित्थी मेरा सेवक बी हूणा। जे कोई मेरी सेवा करो, तां पिता परमेशरा तिसरा आदर करना।
क्रूसा रिया मौती रा संकेत
27“हुण मेरा जी घबराया राँ। इस खातर हुण हऊँ क्या बोलूं? ‘हे पिता, मिन्जो इस दुखा रिया घड़िया ते बचा?’ काँह्भई हऊँ इस इ वजह ते इस संसारा च आया ताकि दुख सहूँ। 28हे पिता परमेशर, अपणी महिमा परगट कर।” तिस इ वगत स्वर्गा ते ये अवाज़ आई, “मैं इसरी महिमा कित्ती, कने फेरी दोबारा करनी।” 29फेरी सै लोक जे तिथी खढ़िरे थे कने सुणया राँ थे तिन्हें बोल्या भई “बद्दल़ गरजया।” होरसी बोल्या, “कोई स्वर्गदूत इसने गलाया।” 30इस पर यीशुये तिन्हांजो बोल्या, “ये अवाज मेरे खातर नीं, पर तुहां लोकां रे फायदे खातर थी। 31हुण इस संसारा रे लोकां रा न्याय करने रा वगत आईगरा, कने हुण परमेशरा इस संसारा पर राज करने औल़े शैतान्ना रिया शक्तिया जो खत्म करी देणा; 32कने ताहली जे हऊँ धरतिया परा ते थोड़ा ऊपर चढ़ाया जाणा, तां मांह सब्बीं लोकां री अगुवाई करनी।” 33येढ़ा बोलीने तिने ये संकेत दित्या भई तिसरी मौत किस तरिके री हूणी। 34इस पर लोकें तिस्सो बोल्या, “अहें पवित्रशास्त्रा री गल्ल सुणिरी भई मसीह सदा जिऊंदा रैहणा, फेरी तू काँह बोलां, भई माहणुये रे पुत्रा जो ऊच्चे पर चढ़ाया जाणा जरूरी आ? ये माहणुये रा पुत्र कुण आ?” 35फेरी यीशुये तिन्हांने बोल्या, “जोति तुहांरे बिच हल्तियें किछ वगत होर रैहणी, तदुआं तका जे जोति तुहांले इ अग्गे बधदे रौआ, किति येढ़ा नीं हो भई अन्धेरा तुहांजो घेरी लो; सै जे अन्धेरे च चलां सै नीं जाणदा भई सै कितो जाया राँ। 36तदुआं तका जे जोति तुहांले इ, जोतिया पर विश्वास करा, तिसते जे तुहें जोतिया रे बच्चे बणी सक्को।”
यहूदियां रा अविश्वासी बणीरा रैहणा
ये गल्लां बोलीने यीशु चलिग्या कने तिन्हांते दूर रैहणे लगया। 37यीशुये तिन्हांरे सामणे इतणे जादा चमत्कार दस्से, तां बी तिन्हे तिस पर विश्वास नीं कित्या; 38येढ़ा इस खातर हुया भई यशायाह भविष्यवक्ते सै जे बोल्या था सै पूरा हो;
“प्रभु, किन्हिये बी अहांरे सन्देशा पर विश्वास नीं कित्या,
कने कोई नीं समझदा भई ये तेरी पराक्रमी सामर्थ इ?” 39सै इस वजह ते विश्वास नीं करी सक्के, काँह्भई यशायाह दोबारा बोलां:
40“तिने तिन्हांरियां आक्खीं अन्ही करी तियां,
ताकि सै देक्खी नीं सक्को, कने तिन्हांरे डमाक बंद करीते ताकि सै समझी नीं सक्को। नैत सै मेरी तरफ मुड़ी जान्दे कने हऊँ तिन्हांजो ठीक करी देंदा।”
41यशायाह ये गल्लां इस खातर बोलियां भई तिने खुद यीशुये री महिमा देक्खी, कने तिने तिसरे बारे च गल्लां बी कित्ती यां। 42तां बी अधिकारियां चते बौहतीं तिस पर विश्वास कित्या, पर सै फरीसियां रिया वजह ते यीशुये जो सब्बीं रे सामणे इस खातर नीं ग्रहण करां थे, भई सै किति यहूदी सभा घर चते तिन्हाजो कड्डी नीं देओ; 43काँह्भई तिन्हांजो परमेशरा रे आदरा रे बजाय माहणुआं रा आदर करना जादा प्यारा लगां था।
यीशुये रे बचन न्याय रा आधार
44यीशुये ऊच्चिया अवाज़ा च बोल्या, “सै जे मेरे पर विश्वास कराँ, सै मेरे पर नीं पर मेरे भेजणे औल़े पर विश्वास कराँ। 45कने सै जे मिन्जो देक्खां सै मेरे भेजणे औल़े जो देक्खां। 46हऊँ संसारा च जोत बणीने आईरा, इस खातर भई सै जे मेरे पर विश्वास करगा सै अन्धेरे च नीं रौ। 47जो कोई मेरियां गल्लां सुणीने नीं मन्नो, तां मांह तिस्सो दोषी नीं बनाणा; काँह्भई हऊँ संसारा च दोषी बनाणे नीं आईरा, पर संसारा जो बचाणे खातर आईरा। 48सै जे मिन्जो छोट्टा जाणाँ सै मेरियां गल्लां मनदा निआं तिस्सो दोषी बनाणे औल़ा त इक आ; मतलब सै जे वचन मैं बोल्या, तिस इ न्याय रे दिन तिस्सो दोषी ठराना। 49काँह्भई मैं अपणिया खा ते गल्लां नीं कित्ती यां; पर पिता तिने जे मिन्जो भेज्या तिने इ मिन्जो हुक्म दितिरा भई क्या-क्या बोलूं कने क्या-क्या नीं बोलूं? 50कने हऊँ जाणा भई तिसरा हुक्म अनन्त जीवन आ इस खातर हऊँ जो किछ बोलां, सै तेढ़ा जे पिता मिन्जो बोल्या तेढ़ा इ हऊँ बोलां।”
Currently Selected:
यूहन्ना 12: KFSNT
Highlight
Share
Copy
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
