यूहन्ना 11

लाजरा री मौत

1लाजर नौआं रा इक माहणु बमार पैईग्या। सै मरियम कने तिसारी बैहण मार्था रे गाँव बैतनिय्याह रा बसिन्दा था। 2ये सैई मरियम थी तिसे जे प्रभुये पर इत्र मल़या था कने अपणे सिरा रे बाल़ां ने प्रभुये रे पैर साफ कित्ते थे। ये बमार लाजर इसारा भाई था। 3इस खातर इस रिये भैणे तिस्सो दस्सीत्या, “हे प्रभु, देख, तिसने जे तुहें प्यार कराँ थे, सै बमार आ।” 4यीशुये ताहली जे ये सुणया तां सै बोलां, “इसा बमारिया री वजह मौत नीं; पर ये बमारी परमेशरा री महिमा परगट करने खातर इ भई इसते परमेशरा रे पुत्रा जो महिमा मिलो।”

5यीशु, मार्था, तिसारी भैण मरियम, लाजरा ने प्यार कराँ थे। 6पर ताहली जे यीशुये सुणया भई लाजर बमार हुई गरा, तां तित्थी जे सै ठैहरी रा था, तित्थी सै दो दिन होर रुकिग्या। 7दुईं दिनां ते बाद यीशुये अपणे चेलयां जो बोल्या, “औआ, अहें यहूदिया प्रदेशा रे बैतनिय्याह गाँवां जो चलिये।” 8चेलयां तिसने बोल्या, “गुरू जी, किछ दिन पैहले यहूदी अगुवे तूह पर पत्थराव करने री कोशिश करी रां थे, कने तू फेरी बी तित्थी जोई जाया राँ।” 9यीशुये जबाब दित्या, “क्या इक्की दिना च बारा घण्टे नीं हुंदे? जे कोई दिना रे उजाले च चलो तां सै ठोकर नीं खांदा, काँह्भई सै सूरजा रिया लोई जो देखां। 10पर जे कोई राति जो चलो तां सै ठोकर खां, काँह्भई राति जो लोय नीं हुन्दी।” 11तिने ये गल्लां गलाईयां कने फेरी तिन्हांने बोल्या, “अहांरा दोस्त लाजर सैईगरा, पर हऊँ तिस्सो जगाणे जाई कराँ।” 12फेरी तिसरे चेलयां तिसजो बोल्या, “हे प्रभु, जे तिसजो निन्द आईगरी, तां तिस ठीक हुई जाणा।” 13यीशु लाजरा रिया मौती रे बारे च बोल्या राँ था, पर सै समझे भई यीशु निन्दा च आराम करने रे बारे च बोल्या राँ। 14इस खातर फेरी यीशुये तिन्हांने साफ-साफ बोल्या, “लाजर मरी चुक्कया; 15कने हऊँ तुहांरिया वजह ने फैदे च रैया भई हऊँ तित्थी नीं था; काँह्भई हुण तुहें मांह पर विश्वास करी सक्को। औआ हुण अहें तिसलौ चलिये।” 16फेरी थोमा तिस्सो जे दिदुमुस बोलां ये, तिने अपणयां साथी चेलयां ने बोल्या, “औआ, अहें बी प्रभुये ने तित्थी चलिये ताकि अहें बी तिस सौगी मरी सक्को।”

यीशु इ पुनुरूत्थान कने जीवन आ

17ताहली जे यीशु बैतनिय्याह च पुज्जया तां तिस्सो पता लगया भई लाजरा जो कब्रा च रखीरे चार दिन हुईगरे। 18बैतनिय्याह गाँव यरूशलेम नगरा ते तकरीवन तिन्न किलोमीटरा रिया दूरिया पर था। 19इस खातर भाईये रिया मौती पर मार्था कने मरियमा जो शान्ति देणे खातर यहूदा प्रदेशा ते बौहत सारे लोक आईरे थे। 20ताहली जे मार्थे ये सुणया भई यीशु आई कराँ, तां सै तिसने मिलणे जो गई, पर मरियम घरें इ बैठीरी रैई। 21मार्थे यीशुये जो बोल्या, “हे प्रभु, जे तू येत्थी हुंदा तां मेरा भाई नीं मरदा। 22पर हऊँ जाणा ईं भई हुण बी तू परमेशरा ते जो किछ मंगगा, परमेशरा तिज्जो दई देणा।”

23यीशुये तिसाजो बोल्या, “तेरे भाईये दोबारा जिऊंदे हुई जाणा।”

24मार्थे तिसने बोल्या, “हऊँ जाणाँ इ भई न्याय रे दिन तिस भीं ते जिऊंदे हूणा, ताहली जे हर कोई जिऊंदा हुई जाणा।”

25यीशुये तिसाने बोल्या, “हऊँ सै आ सै जे मूईरयां लोकां जो न्याय रे दिन जीवना च वापस लैई औवां; सै जे माह पर विश्वास कराँ, भले इ सै मरी जो, तिस जिऊंदा रैहणा, 26कने सै जे कोई मांह च जीआं कने मांह पर विश्वास कराँ, तिस कदीं नीं मरना। मार्था क्या तू इसा गल्ला पर विश्वास कराँ इ?” 27तिसे यीशुये ने बोल्या, “हाँ प्रभु, हऊँ विश्वास कराँ इ, भई परमेशरा रा पुत्र मसीह सै जे संसारा च औणे औल़ा था, सै तूई हाया।”

यीशु रोया

28फेरी इतणा बोलीने मार्था ऊत्थीते चलीगी, कने अपणी भैण मरियमा जो कल्ही सद्दीने बोल्या, “गुरू येत्थी हाया, कने तिज्जो सदया राँ।” 29ताहली जे मरियमे येढ़ा सुणया सै ताहलूं इ उट्ठीने तिसने मिलणे जो चलीपी। 30यीशु अजें तका बी गाँवां ते बाहर इ था, सै हल्तियें बी तिसा इ जगह था तित्थी जे मार्था तिसने मिली थी। 31फेरी यहूदी लोक सै जे मरियमा सौगी घरें थे कने तिसाजो शान्ति देया राँ थे, तिन्हें देख्या भई मरियम छोड़चा ने उट्ठीकने बाहर चलीगी, इस खातर सै तिसारे पिच्छे-पिच्छे ये सोच्चीने गये भई सै रोणे जो कब्रा पर जाया राँई।

32ताहली जे मरियम तित्थी पुज्जी तित्थी जे यीशु था, तां यीशुये जो देखीने तिसरे पैरा पर पईगी कने बोल्या, “हे प्रभु जे तू येत्थी हुंदा तां मेरा भाई मरदा नीं।”

33यीशुये ताहली जे मरियमा जो कने तिसा सौगी आईरे यहूदी लोकां जो रोंदे कने बिलखदे देख्या, तां तिसरी आत्मा तड़फी गी। सै बौहत परेशान था, 34कने बोल्या, “तुहें तिस्सो किति दफनाईरा?” तिन्हें तिस्सो बोल्या, “हे प्रभु, औआ कने देक्खा।”

35यीशुये रिया आक्खीं ते परौल़े निकल़णे लगे।

36इस पर यहूदी लोकें बोल्या, “देक्खा, ये लाजरा ने कितना प्यार कराँ थे।”

37पर तिन्हां चते कईयें बोल्या, “क्या ये सै माहणु आ तिने जे अन्हेयां रियां आक्खीं ठीक कित्तियां थी, क्या ये लाजरा जो बी मरने ते नीं बचाई सकदा?”

लाजरा रा जिऊंदा कित्या जाणा

38फेरी यीशु अपणे मना च इक बार भीं बौहत जादा परेशान हुया कने कब्रा पर आया। ये कब्र इक गुफा साई थी कने गुफा रा दरवाजा इक्की पत्थरा ने ढक्कीरा था।

39यीशुये बोल्या, “पत्थरा जो कब्रा रे दरवाजे ते कण्डे करा।” तिस मूईरे री भैण मार्था तिसने बोलणे लगी, “हे प्रभु, तिस चते त हुण बुरी बास आयरदी हूणी, काँह्भई तिस्सो मूईरे जो चार दिन हुईगरे।”

40यीशुये तिसाजो बोल्या, “क्या मैं तेरने नीं बोल्या था भई जे तू विश्वास करगी, तां परमेशरा री महिमा जो देखगी।”

41तां लोकें तिस पत्थरा जो कण्डे करित्या। यीशुये स्वर्गा खा देखीने बोल्या, “हे पिता, हऊँ तेरा धन्यवाद कराँ काँह्भई तैं मेरी सुणी ली। 42हऊँ जाणा भई तू सदा मेरी सुणा, पर सै जे भीड़ चऊँ पासयां खढ़िरी थी, ये तिन्हां रिया वजह ते मैं तिन्हांरे खातर ऊच्चिया अवाजा च बोल्या, तिसते जे सै ये विश्वास करी सक्को भई तैं मिन्जो भेज्जिरा।”

43ये बोलणे ते बाद तिने ऊच्ची अवाज़ च हाक पाई, “लाजर, बाहर निकल़ी औ!” 44सै जे मरीगरा था सै कफणा ते हाथ पैर बन्धोई रेई बाहर निकल़ी आया, कने तिसरा मुँह पर्ने कने लिपटीरा था।

यीशुये लोकां ने बोल्या, “इस्सो खोली देआ कने जाणे देआ।”

यीशुये रे खलाफ शाजिश

(मत्ती 26:1-5; मरकुस 14:1-2; लूका 22:1,2)

45इसते बाद मरियमा सौगी आईरे यहूदियां चते बौहत लोकें यीशुये रे इस कम्मा जो देखीने तिस पर विश्वास कित्या, 46पर तिन्हां चते किछ लोक फरीसियां ले गै कने यीशुये रे कम्मा री खबर दित्ति। 47फेरी मुखियायाजकें कने फरीसियें महासभा सद्दी,

कने बोल्या, “अहांजो क्या करना चाहिन्दा? ये माहणु बौहत सारे चमत्कारी नशाण दस्यारां। 48जे अहें हुण इस्सो येढ़ा करदे हुये नीं रोकया, तां सारयां तिस पर मसीहा समझीने विश्वास करने लगी जाणा, कने रोमी लोकां आईने अहांरे मन्दरा कने अहांरे लोकां रा नाश करी देणा।”

49फेरी तिन्हां चते इक्की सभा रे सदस्य, तिसरा नौं जे कैफा था कने सै जे तिस साल्ला रा महायाजक था, तिसने बोल्या, “तुहें लोक किछ मनी जांणदे; 50कने नां तुहें समझा ये भई तुहांरा भला इस चा भई अहांरे लोकां खातर सिर्फ इक माहणु मरो, कने सारी जाति नाश नीं हो।”

51ये गल्ल तिने अपणिया तरफा ते नीं बोल्ली, पर तिस साल्ला रा महायाजक हुईने भविष्यवाणी किति, भई यीशुये इस्राएली लोका खातर मरना; 52कने नां सिर्फ तिन्हांरे खातर, पर इस खातर बी भई तिस परमेशरा रे होरीं बच्चयां खातर बी मरना, सै जे धरतिया पर बिखरीरे ताकि सै इक हुईजो। 53इस खातर तिस इ दिना ते सै तिस्सो मारने री साजस रचणे लगे।

54फेरी यीशुये तिस बगता ते यहूदियां रे सामणे खुल्लेआम औणा जाणा बन्द करित्या, फेरी सै सुनसान इलाके च एप्रैम गाँवां जो चलिग्या; कने अपणयां चेलयां सौगी तित्थी रैहणे लगया।

55यहूदियां रा फसह रा त्योहार नेड़े था, कने बौहत लोक फसह ते पैहले इ गाँवां ते यरूशलेम नगरा जो गये भई यहूदी नियमा रे मुतावक सै अप्पूँजो पवित्र करो। 56इस खातर सै यीशुये जो टोलणे लगे कने मन्दरा च खड़ीने अप्पूँ चियें बोलणे लगे, “तुहें क्या सोच्चां यें? क्या तिस इस त्योहारा च नीं औणा?” 57मुखियायाजकें कने फरीसियें यीशुये जो गिरफ्तार करने रे मकसदा ने ये हुक्म दित्या था भई जे किसी माहणुये जो पता चली जो भई यीशु किति आ? तां सै इसरी सूचना अहांजो देओ, ताकि अहें तिस्सो पकड़ी सक्को।

Currently Selected:

यूहन्ना 11: KFSNT

Highlight

Copy