Luqaasi 8
8
Yesuusin Deggiti Genneenaꞌo
1Aroyee gubb Yesuusi Yeerichi taatittinee mishiraachoon gettiibee, awaajjiibeenoo, katemoonaa gafoo bullinooch guuddii beehe; aaraa gutte bi dabbeenaꞌo biinna tookkii guuddii beeheete. 2Yesuusi yinneenaꞌon boonoshi toommoochee bi yookkitinaꞌonaa biiyoochee bi wodiiti ikkikke genneenaꞌona, eboshiyoo shabaatte yinneenaꞌon bi toommoochee bi yookkiti Magidalechi getteeti Maariyami, 3taatoo Heroodisichi kechi guudo Kuuzi mechee Yowani, Susaaninaa bare meeti genneenaꞌona boonoshi gijjoona Yesuusinaa bi dabbeenaꞌonon deggii beeheete.
Yaree Shookkechochi Shaahiyoo
(Maatiyoosi 13:1-17; Maariqoosi 4:1-9)
4Dofee asheenaꞌo boonoshi katemi katemoochee Yesuus waan waaꞌi boonoshi kiceemmona, shaahiyoona ishichiꞌi gettiye: 5“Yaree shookkecho bi yaroon yechiꞌi shookka kechiye. Shookkii bi beetaa, ikkikkoo gommi gashooch holliye; aroochaa baatoona neechehe; shimaajji kafeenaꞌoo waa maciꞌi maaheete. 6Baroo maacaa xaqqechi showooch holliye; colleꞌi kechiye; tunebaani aachaalli shuuꞌi showoo bi tunetoyich, are collo shuuqqiye. 7Baroo wotta angichi xuppo beeti showooch holliye; are angichi xuppoo naaxii kechiꞌi maayi colloona tookkii dicciꞌi maahe. 8Baroo wotta qeemi showooch holliꞌi collehe; diccii kechiꞌinoo balle kishoon aafehe” iye.
Yesuusi ebin gettiichii bi qaaroon oogichiꞌi, “Waayeebeeti waajjecho waayebe” iye.
Shaahiyoona Yesuusi Gettiti Naboo
(Maatiyoosi 13:10-17; Maariqoosi 4:10-12)
9Yesuusichi dabbeenaꞌo “Hini shaahiyoo ama getone?” iꞌi echeheete.
10Yesuusiyoo ishichiye: “Yeeri bi taatittinee maacee mooyon ittoshich arichiitone; tunebaani bareenaꞌoyich bulli mooyo bi getteebeeto shaahiyoonane. Ebiyoo,
ciinibee boonoshi beegaachemmoyich,
waayebee boonoshi shalligaachemmoyichiye”#Isi. 6:9-10 iye.
Yaree Shookkechochi Shaahiyoon Biichiꞌi Yesuusi Geto
(Maatiyoosi 13:18-23; Maariqoosi 4:13-20)
11Yesuusi daakkiꞌi ishichiye: “Yaree shookkechochi shaahiyoo ebine: Yaroo Yeerichi qaaroone. 12Gommi gashooch holliti yaroomminaꞌo geto, Yeerichi qaaroon boonoshi waayetoyee gubb daabiloosi waaꞌi, mulloon Yeeri toommooch tooꞌiiree boonoshi wodaachemmoyich, are boonoshi waayeti qaaroon boonoshi mulloochee maciꞌi bi daammiti asheenaꞌo getone. 13Wotta maacaa xaqqechi showooch holliti yaroomminaꞌo geto, Yeerichi qaaroon waayeꞌi bekkech emiroona deqqiibeeti asheenaꞌo getone. Tunebaani cammon yeshaaneenaꞌone; boonoshi mulloon Yeeri toommooch boonoshi tooꞌiibeeto andichalli, daabiloosi boonoshin gondoon shuuniiya bi qiiccehooba, gubb shokiree echemminaꞌone. 14Angichi xuppo beeti showooch holliti yaroomminaꞌo geto, Yeerichi qaaroon boonoshi waayetoyee gubb, beemi gaboo, gaannoonaa mashaamiti beemona kechii bi maatoyich, kashaalli taxxe aafoommi asheenaꞌo getone. 15Wotta qeemi showooch holliti yaroomminaꞌo geto, ibere gaawe mulloona Yeerichi qaaroon waayeꞌi ceechiibeeti asheenaꞌo getone; haaꞌiiꞌi aafoon aafee beetinaꞌone” iye.
Qiico Guuppeti Ceechoo
(Maariqoosi 4:21-25)
16“Koniyoona ceechoon bi ceechigaata, kexooch giyiibeeti ashich bi bekkemmoyich xallooch kotiihalli, qiicoon guufaache; woyee qeechi dambooch kotiyaache. 17Aacheeti mooyo bulli xalla keyo, maaceexi mooyo gaxxeeꞌi aricho echeyaachemmone. 18Illa aabichiree ittoshi waayemmo gaata, ittoshi qelloon ariibote! Beetoyich daakkaa ichemmone; tunebaani amolla aallo waanee biich beeti shaahiibeeti giishechewolla tiijjeyemmine” iye.
Yesuusichi Indeenaa Bi Maneenaꞌona
(Maatiyoosi 12:46-50; Maariqoosi 3:31-35)
19Aroyee gubb Yesuusichi indeenaa bi maneenaꞌona bi waan waaheete. Asho oogichiꞌi bi meettitoyich, bi waan shaggiꞌi danoon mawiiheete. 20Ebich asheenaꞌo daggoochee ikkikkeenaꞌo Yesuusin “Ne indeenaa ne maneenaꞌona neenna daneya qaawiꞌi maaxooch neexee beeteete” iꞌi gettiyeete.
21Yesuusiyoo wochiꞌi, “Ta indeenaa ta maneenaꞌona Yeerichi qaaroon waayeꞌi ceechii beetinaꞌone” iye.
Aachi Aayo Shashewimo
(Maatiyoosi 8:23-27; Maariqoosi 4:35-41)
22Ikke areddoon Yesuusi bi dabbeenaꞌona tookkii giishi markabeech giyiꞌi, “Baharee beqach kimbone” iye. Ebich tiyii hammiyeete. 23Hammii boonoshi beetaa, Yesuusi tokketehe. Diqqoona giidechi yongo baharee toommooch tiyiye; markabeech aaco ceenn beddiꞌi, boonoshi kashoon aalliiya bi getaa, 24bi dabbeenaꞌo giddeꞌi, “No Doonocho, no Doonocho! Aalleto noone” iibee tokketoochee Yesuusin tiijjiyeete.
Yesuusi tokketoochee tiyiꞌi yongoonaa baharee aachi aayonon noggehe. Boonoshiyoo qajjiyeete; bulli mooyo shashewimiye. 25Yesuusiyoo bi dabbeenaꞌon “Ittoshi mullee tooꞌiyoo aaye?” iye.
Yesuusichi dabbeenaꞌo shateꞌi boonoshinaa boonoshina “Yongoonaa baharee aaconon gettiꞌi waayiibeeti hini uro am shaahe ashoone?” iꞌi worganeheete.
Ikke Uroo Toommoochee Yinnoon Yesuusi Yooho
(Maatiyoosi 8:28-34; Maariqoosi 5:1-20)
26Yesuusinaa bi dabbeenaꞌona Galiilee baharee beqach beeti Gergeseenee showooch giishi markabeena shaggiyeete. 27Yesuusi markabeechee bi kindimmona, yinneenaꞌo bi toommooch beeti ikke uro are katemoochee kechiꞌi biinna danehe. Hini are uroo meeti yemeenoon shokkaachoon beehalli tahoon taheyaanoone; maashoochalli kexooch beetaanoone. 28-29Meeti aaboon are yinno tiyaa, bi kishoon sansalatoona, bi baatoonoo qoqqaannoona cuchiꞌi quyee beeheete; uroo eboshi bullin kuxxii ciichiꞌi bi toommeexi yinnoona barahooch tiishee beehe. Arooba Yesuusi uroona daneꞌi, “Hini yinnoocho, uro toommoochee tibe” iꞌi noggehe. Bekkech hini are uro Yesuusin beeggiꞌi bi baatooch dihiye. Oogichii cookiꞌi, “Beshe Nuggishoo Yeerichi bushoo Yesuuso, ta mooyooch neen amo geddiye? ‘Taan yulliyaahine’ iyaꞌa neen qollehoye” iye.
30Arooba Yesuusi “Ne shigo konine?” iꞌi echehe.
Meeti yinneenaꞌo bi toommooch boonoshi beetoyich, hini are uro wochiꞌi, “Ta shigo Legiyoono#8:30 Ikke Legiyoono, shiritte hum bede Roomi ginee naayinaꞌon yechitone. getteehe” iꞌi gettiye. 31Wotta yinneenaꞌo “ ‘Ciiraalli hoonooch hamiree gibote’ getiree noon yookkaahine” iꞌi qolleheete.
32Daakkiꞌi Yesuusin “Gudini toommooch hamiree kotebone; daaggibe” iꞌi qolleheete. Boonoshi qolleto, are geppooch qiddeenaꞌo quyeebeeti meeti gudininaꞌo beetoyichiye. Yesuusiyoo “Hamiree kotebote” iye. 33Bekkech yinneenaꞌo uro toommoochee tiyiꞌi gudininaꞌo toommooch hammii koteheete. Aroochee gudininaꞌo giidechi qaaꞌooch guufee kindii baharee gejjoona manjeheete.
34Gudichi qiddeenaꞌo tuneti mooyon beeggiꞌi, wocona hammiꞌi katemoonaa bi guudeexi goyechi gafoonooch gettiyeete. 35Ebin waayeti asheenaꞌo “Hini mooyo amo gaata beegone” iꞌi boonoshi gafoochee kechiꞌi Yesuus waan hammiyeete. Yesuusi yinnoon bi toommoochee bi yookkiti uro bi mullo yeshaa, bi tahoon taheꞌi Yesuusichi gaꞌooch kotee beeton beeggiꞌi shattiyeete. 36Shiichiꞌi boonoshi aafoona beeggiti asheenaꞌo, yinneenaꞌo bi toommooch beeti hini are uro aabichiꞌi bi wodito gaata boonoshich gettiyeete. 37Ebi Gergeseenee showee asheenaꞌo bulli oogichiꞌi boonoshi shattitoyich, “No waanee hambe” iꞌi Yesuusin qolleheete. Ebich Yesuusi markabee toommooch kechii koteꞌi wottee hamma tiyiye.
38Yesuusi hamma bi tiyimmona, yinneenaꞌon bi toommoochee bi yookkiti uro “Neenna tookki beebona” iꞌi qollehe. Tunebaani Yesuusi 39“Yeeri am shaahe ooge mooyon neech bi tuniito gaata ne kexooch wotte hamiree gete” iꞌi daachiihe. Uroo hammiꞌi Yesuusi am shaahe ooge mooyon biich bi tuniito gaata are katemoo bulliich guuddiꞌi gettiye.
Qititi Busheenaa Biiyeti Ureenon Yesuusi Wodiyoo
(Maatiyoosi 9:18-26; Maariqoosi 5:21-43)
40Yesuusi baharee beqachee bi wottemmona, biin quyeebeeti dofee asheenaꞌo emiriibee biinna daneya kechiyeete. 41Arooba Yaaroosi getteebeeti uro waahe. Biyoo Ayihudeenaꞌo kiceebeeti kechi ukkiroone; Yesuusichi baatooch dihiꞌi, “Ta kexooch wobe” iꞌi qollehe.
42Ishichiꞌi bi qolleto, ikke mixxe aaraa gutte nati bi bushee biiyaꞌa bi mawiitoyichiye.
Yesuusi tiyiꞌi hammii bi beetaa, asho meettiꞌi kashi bi wochemmi xaaꞌoon mucciihe. 43Arooba are asheenaꞌo daggooch aaraa gutte naton damoo ufeebeeti ure beehan. [Aroyee aaf meeti aakumeenaꞌo waan shaꞌaabee bi gijjoon shaccaa ciichiyanalli,] koniyoona biin wodiyoon hakkaanoone. 44Yesuusichi gubbaa hammaꞌa bi qoreddee caappoon yechahan; ufeebeeti bi damoo bekkech neexehe.
45Yesuusiyoo, “Taan yechito konine?” iꞌi echehe.
Asheenaꞌo bulli “No yeshaano noone” iyeete. Arooba Pheexiroosi tiyiꞌi, “Ta Doonocho, dofee asheenaꞌo neen guuddiꞌi boonoshi xuqqii beetaa, aabichaꞌa ishichinne?” iye.
46Tunetaa Yesuusi “Iberoon ikke asho taan yechitone; biiyechon wodiyee giidoo ta achoochee bi keyo taach arichetone” iye.
47Ureyoo bi shuuneto aacheyee bi qayon ariiꞌa, qewaabee waa bi baatooch dihaachaa, Yesuusin bi yecheti naboonaa bekkech bi wodoonon asheenaꞌo bulli aafooch gettahan. 48Biyoo “Ta busheene, ta toommooch mulloon ne tooꞌiyoo neen wodiitone; diggoona hambe” iye.
49Yesuusi ebin getooch bi beetaa, ikke uro Ayihudeenaꞌo kiceebeeti kechi ukkiroo kexoochee waaꞌi Yaaroosin “Ne bushee qititine; illa Dojjechon iritiyaahine” iye.
50Tunebaani Yesuusi ishin waayeꞌi Yaaroosin “Shattaahine, Yeerich baach kuxe; ne bushee wodemmine” iye.
51-54Yesuusi uroo kexooch bi shaggimmona asheenaꞌo bulli boonoshi getoon qicciibee, woowo iibee eefee beeheete.
Yesuusiyoo “Eeppaahote; bushee tokketaanalli bi ito, qitaaneene” iye.
Yesuusi ishichimmona, asheenaꞌo bushee qitoon ariiꞌi oogichii biin cooneebee miiceheete.
Tunebaani Yesuusi bushee qeyaabeeti gatooch giyiye. Pheexiroosi, Yaaqobi, Yowannisi, busheechi nihoonaa indeenoyee damba koniyoona biinna tookki giyemmoyich daaggaanoone. Aroochee bushee kishoon yechiꞌi, “Hini busheene, tibe” iye. 55Busheechi kashoo wottehe; bekkech motekkimaa tiyahan. Yesuusiyoo “Busheyich maayoon imbote” iye.
56Ebi mooyona busheechi indeenaa nihoona worganeheete; tunebaani Yesuusi boonoshich “Hini mooyon konichona gettaahote” iꞌi gettiye.
Currently Selected:
Luqaasi 8: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.
