Luqaasi 9

Aaraa Gutte Mishiraachechinaꞌon Yesuusi Wocho

(Maatiyoosi 10:5-15; Maariqoosi 6:7-13)

1Yesuusi aaraa gutte bi dabbeenaꞌon ikkooch ceeggiꞌi yinneenaꞌo bullin asheenaꞌo toommoochee boonoshi yookkemmoyich, biiyechinaꞌonoo boonoshi wodiyemmoyich hakkoonaa ukkirittinoonon boonoshich immiye. 2Yeerichi taatittinee mishiraachee qaaroon boonoshi gettemmonaa biiyechinaꞌon boonoshi wodiyemmonoyich wochehe. 3Ishichiinoo iye: “Gumbo tuneba kojjoo, shoho tuneba gijjoo, gommoyich amoonolla yechaahote. Ittoshi tahetoyee bare tahoon yechaahote. 4Amee xaaꞌoochona shaggiꞌi ashi kexooch ittoshi giyigaata, are gafoon gawukkiꞌi ittoshi hamimmi wottoon are kexooch kotebote. 5Aabiichona beeti asheenaꞌo ittoshin iibbiyaano boonoshi qayigaata, boonoshi toommooch miixoo bi tunemmoyich ittoshi baateexi quttoon tebbeechi are gafoon gawukkiree keyote” iye. 6Ebich tiyii bulli xaaꞌooch Yeerichi mishiraachee qaaroon gettiibee, biiyechinaꞌonoo wodiibee gafoo bulliich guuddii beeheete.

Heroodisin Gaabbiiti Mooyo

(Maatiyoosi 14:1-12; Maariqoosi 6:14-29)

7Arooba Galiilee iraashoo Heroodisi Yesuusi tuniibeeti mooyo bullin waayeꞌi, gaabbiye. Ebiyoo ikkikke asheenaꞌo “Yowannisi qitoochee tiyite”, 8bareenaꞌo “Eliyaasi bekkete”, bareenaꞌoo “Ikke wonnee keemecho qitoochee tiyite” iibee boonoshi yibbaatee beetoyichiye. 9Heroodisi “Yowannisin gaata, bi qettoon kuchiihoye; ishigaata, ebi shaahe mooyo getaa ta waayaabeeti hini uro konine?” iꞌi biinna bi danemmi gommon qaawiye.

Uuche Humeenaꞌoyich Yesuusi Maanjoo

(Maatiyoosi 14:13-21; Maariqoosi 6:30-44; Yowannisi 6:1-14)

10Aroyee gubb wotta mishiraachechinaꞌo boonoshi hammitoochee wotteꞌi boonoshi shuuneti mooyo bullin Yesuusich gettiyeete. Boonoshin baach dabbiiꞌi Beetisayidi getteebeeti katemee gaꞌooch hammiye. 11Tunetaa dofee asheenaꞌo ebin ariiꞌi biin dabbiyeete; bi waan giddiiꞌi Yeerichi taatittineechon boonoshich gettiye; biiyoona iritee beetinaꞌonoo wodiihe.

12Showoo womikkoo wottemmona, Yesuusichi aaraa gutte dabbeenaꞌo bi waan giddeꞌi, “No beeto gafoo aalli xaaꞌoone; hini dofee asheenaꞌon guudeexi goyechi gafooch hamiree boonoshi qeyemmi xaaꞌoonaa boonoshi maayemmi maayoonon boonoshi danemmoyich diggiiree daachiibe” iyeete.

13Tunetaa Yesuusi wochiꞌi, “Ittoshi maanjibote” iye.

Boonoshiyoo “Uuche xekee koshonaa gutte haashoonoyee damba nooch aalloone; hammaa daakkaa no kemo qayigaata, hini dofee asho bullich bedaache” iyeete. 14Ebin boonoshi gettito, arooch beeti anaaminaꞌo baach uuche hum boonoshi bedditoyichiye.

Yesuusi bi dabbeenaꞌoyich “Asheenaꞌon aachi aacha qoodiree kotiibote” iye. 15Ebich boonoshich bi gettitoommon tuniiꞌi asheenaꞌo bullin kotiiheete. 16Aroochee Yesuusi uuche xekee koshonaa gutte haashoonon tiijjii yechiꞌi, shimaajj ciinniꞌi Yeerin galletehe; koshonaa haashoonon tiichiꞌi bi dabbeenaꞌoyich “Ebin asheenaꞌo bullich qoomebote” iꞌi immiye. 17Boonoshiyoo daammiꞌi qoometaa, bulliyoo maaꞌi michiyeete. Boonoshi maatoyee gubb bi dabbeenaꞌo aaraa gutte ogooge mokkee ceeni koshonaa haashoonochi ooyoon tiijjiyeete.

Yesuusi Koni Bi Gaata Pheexiroosi Miixo

(Maatiyoosi 16:13-19; Maariqoosi 8:27-29)

18Ikke areddoon, Yesuusi bi ikkeeto corootii bi beetaa, bi dabbeenaꞌo biinna tookkii beeheete. Arooba boonoshin “Asheenaꞌo taan konine ii beeteete?” iꞌi echehe.

19Boonoshiyoo wochiꞌi, “Ikkikkeenaꞌo ‘Hini Aacona Afaallechi Yowannisine’ ii beeteete; echeenaꞌo ‘Eliyaasine’, echeenaꞌoo wotta ‘Wonnee keemecho qitoochee tiyitone’ ii beetinaꞌone” iyeete.

20Biyoo “Ittoshiyochi taan konine ii beetote?” iye.

Pheexiroosi tiyiꞌi, “Ne, Yeerichi Masihi neene” iye.

21Yesuusi wochiꞌi bi dabbeenaꞌoyich “Ebin konichona gettaahote” iye.

Bi Qitemmon Shiichii Yesuusi Geto

(Maatiyoosi 10:38-39; 16:21-28; Maariqoosi 8:34-38; Luqaasi 14:25-27)

22Yesuusi daakkiꞌi bi dabbeenaꞌoyich ishichiye: “Ashi Bushoo wodde xuuxoon beego biich echeyaani mooyone. Geeneenaꞌonaa qeeshee ukkireenaꞌona, Muusichi Sheeree dojjechinaꞌoo biin shixxemminaꞌone; wuxiishoo gettemminaꞌone; tunebaani keejje qemooba qitoochee tiyemmone” iꞌi manjii gettiye.

23-24Wotta boonoshi bullich ishichiye: “Bi kasheen wodiyoyich qaawiibeeto bulli muccemmone; tunebaani taacha iꞌi bi kasheen mucceebeeto bulli danemmone. Taan dabboon shunniibeeto koniyoona bi tunegaata, bi qelloon nookkebe; bi masqaloon qemi qemona shaagiree taan dabbibe. 25Koniyoona showee toommooch beeto bullin biicho tuniichii bi kasheen bi aalliigaata woyee bi muccegaata, amoon biich hallehe? 26Ashi Bushoo bi oogee yiiroona, bi Nihoonaa yaafe maraakeenaꞌonochi oogee yiiroona bi waahooba, biinnaa bi gettiti qaaroonoyich yeellemmo bullina, yeellemmone. 27Iberoon ittoshich gettoye: Hiniich neexee beetinaꞌo daggoochee ikkikkeenaꞌo Yeerichi taatittinoon boonoshi beeggimmi wottoon qitaachemminaꞌo beetinaꞌone” iye.

Keejje Bi Dabbeenaꞌo Aafoochaa Yesuusi Shaddeyoo

(Maatiyoosi 17:1-8; Maariqoosi 9:2-8)

28Yesuusi ebin bi gettiti shimitte qemi bedoyee gubb Pheexiroosin, Yowannisinaa Yaaqobinon yechiꞌi corootiya guudi toommooch kechiye. 29Aroochaa corootii bi beetaa, bi malleto shaddeehe; bi taheti tahoo nacceꞌi phaqqiye. 30-31Diqqich gutte asheenaꞌo, boonoshiyoo Muusinaa Eliyaasina, oogee yiiroona bekkeꞌi Yesuusina tookkii yibbaatee beeheete; boonoshi yibbaateebeetoo, Yerusaalemaa tunemmi mooyichon, ebiyoo hini showoon qayiree hammemmo bi tunooniye. 32Tunebaani Pheexiroosinaa biinna tookkii beetinaꞌona geepphirona daadeeꞌi tokketeheete; tokketoochee tiyiꞌi Yesuusichi oogee yiiroonaa biinna tookkii neexeebeeti gutte asheenaꞌonon beeggiyeete. 33Are gutte asheenaꞌo Yesuus waanee boonoshi hammimmona, Pheexiroosi tiyiꞌi Yesuusin “Ta Doonocho, hiniich beemo nooch gaawiye. Ebich keejje bashoon, ikkoon neech, ikkoon Muusich, ikkoonoo wotta Eliyaasich bashibone” iye. Tunebaani ama bi ii beeto gaata ariyaanoone.

34Ishin getooch bi beetaa, qubo waaꞌi boonoshin yiirehe; quboo boonoshin kaappimmona shattiyeete. 35Qubee daggoochaa “Ta kaacceti ta Bushoo hinine; bi waanee waayebote” immi qaaroon waayeheete. 36Ishi qaaroon boonoshi waayeti hillooch, Yesuusi baach beeton beeggiyeete. Arooba boonoshiyoo cikkii qajjiyeete; boonoshi beeggiti mooyoochee ikkoonolla ashich getaaneenaꞌone.

Maachi Biiyo Yechiti Bushoon Yesuusi Wodiyoo

(Maatiyoosi 17:14-18; Maariqoosi 9:14-27)

37 Dechara Yesuusinaa hini are keejje bi dabbeenaꞌona guudi toommoochee boonoshi kindimmona, dofee asheenaꞌo Yesuusina daneheete. 38Are asheenaꞌo daggoochee ikke uro ishichiꞌi cookiye: “Dojjechocho, hini bushoo taach ikke mixxoone; taach ne beeggemmoyich neen qollehoye. 39Biin maachi biiyo yechiꞌi diqqich cookii beetone; umboonoo aapphiibee qaferii beetone; qicciibee bi achoon kachiichii, iritiichiiniye bi gawukkiibeeto. 40Ne dabbeenaꞌon ‘Ta bushoon hini maachi biiyoochee wodiibote’ iyaꞌa ta qolletaa, boonoshiyoo mawiitinaꞌone” iye.

41Yesuusi wochiꞌi, “Hini, Yeeri toommooch mulloon tooꞌiyaani xumme shiijjereenaꞌote! Aati wottoon ittoshina tookki beebee haaꞌiyehote? Eke ta waan ne bushoon deebe” iye.

42Bushoo batt Yesuus waan hammii bi beetaa, hini are yinno showooch dichiichii biin qaferiihe. Yesuusi yinnoon noggeꞌi bushoon wodiihe; bi nihoyichoo immiye. 43Asheenaꞌo bulli Yeerichi ooge giidoon boonoshi beeggitoyich worganeheete.

Bi Qitemmon Guttinnoon Yesuusi Geto

(Maatiyoosi 17:22-23; Maariqoosi 9:30-32)

Asheenaꞌo bulli Yesuusi shuuneebeeto bullin worganee boonoshi beetaa, Yesuusi bi dabbeenaꞌoyich, 44“Ittoshi hini mooyon ittoshi mulloona manjiiree yeshote. Ashi Bushoon ashi kishooch beshiiree imma ii beetinaꞌone” iye. 45Tunetaa ebi mooyo boonoshich giyaanoone; boonoshich bi aacheetoyich, boonoshi mullooch giyaanoone. Ebich hini mooyon wochii biin echoon shattiyeete.

Bulliyee Besho Konigaata Yesuusi Geto

(Maatiyoosi 18:1-5; Maariqoosi 9:33-40)

46Yesuusichi dabbeenaꞌo “No daggoochee konine besho?” iꞌi gajjiteyooch giyiyeete. 47Yesuusiyoo boonoshi mullee gaboon ariiꞌi ikke giisheche bushoon deebii bi gaꞌooch neechiꞌi, 48boonoshich ishichiye: “Koniyoona taacha iꞌi ebiyoommi giisheche bushoon bi shunigaata taan shunnii beetone; wotta koniyoona taan bi shunigaata, taan deejjiti Yeerin shunnii beetone; ittoshi bulli daggoochee giishecho bulliyee besho tunemmone” iye.

49Wotta Yowannisi tiyiꞌi Yesuusin “Ta Doonocho, ikke uro ne shigoona ashi toommoochee yinnoon yookkii bi beetaa beeggaꞌa, noochoommon neen dabboo bi qajjitoyich bajjehone” iye.

50Tunebaani Yesuusi wochiꞌi “Ittoshin mooyona koyaano ittoshi guuphone; ebich bajjaahote” iye.

Shamaaree Asheenaꞌo Yesuusin Iibbiyee Qayo

51Yesuusi hini showoochee shimaayooch bi kechemmi aabo katinaa, Yerusaalem hamoyich kuxxii tiyiye. 52Shiichiꞌi wocheyechinaꞌon bi aaf daachiihe. Boonoshiyoo bulli mooyon biich qanniyoyich Shamaaree showeexi ikke gafooch hammiꞌi giyiyeete. 53Yesuusichi gaboo Yerusaalem hamo bi tunetoyich, are Shamaaree asheenaꞌo biin iibbiyaachone iꞌi qajjiyeete. 54Bi dabbeenaꞌo Yaaqobinaa Yowannisina ebin beeggiꞌi Yesuusin “Doonocho, ‘Qaaqqoo shimaayoochee kindiree boonoshin aalliibe’ getona?” iꞌi echeheete.#2 Taat. 1:9-15 55Yesuusiyoo boonoshi waan wotteꞌi boonoshin noggehe. 56Aree hillooch Yesuusinaa bi dabbeenaꞌona bare gafooch hammiyeete.

Biin Dabbiya Qaawiti Asheenaꞌoyich Yesuusi Geto

(Maatiyoosi 8:19-22)

57Yesuusinaa bi dabbeenaꞌona gommon hammii boonoshi beetaa, ikke uro Yesuusin “Ne hammemmo bulliich neen dabbemmo taane” iye.

58Yesuusiyoo “Boqqelleenaꞌoyich oppo, shimaajji kafeenaꞌoyichoo kexo beetone; tunebaani Ashi Bushoyich giyi bi qeyemmi xaaꞌoo aalloone” iye.

59Yesuusi bare uroon “Taan dabbibe” iye.

Aroo “[Ta Doonocho,] shiichiree, hami ta nihoon duuhiichibona” iye.

60Yesuusi wochiꞌi, “Qiteenaꞌo qititi boonoshi asheenaꞌon duuheete; tunetaa ne Yeerichi taatittineechon ashich hamiree gete” iye.

61Wotta bare uro “Ta Doonocho, neen dabbemmo taane; tunebaani shiichi ta kechi asheenaꞌon ta diggiyemmoyich taan daaggibe” iye.

62Tunetaa Yesuusi “Koniyoona gattee kashoon yechii gochiibee, gubb beeton ciinna wuuqqeechii gochiibeeto Yeerichi taatittineyich gaaccemmi asho toonoone” iye.

Currently Selected:

Luqaasi 9: KBRC

Highlight

Copy