Halloo 48

Yaaqobi Efreeminaa Minaasinon Diiroo

1Ebi mooyo tunetoyee gubb, “Ne nihoo biiyetone” ii Yooseefich gettiyeete. Ebich Yooseefi bi gutte bushiishoo Minaasinaa Efreeminon yechiꞌi bi nihoo waan hammiye. 2Yooseefi shaggimmona, “Ne bushoo Yooseefi waatone” ii Yaaqobich gettiyeete. Israꞌeeliyoo haaꞌii kuppheꞌi qeenooch tiyii kotehe.

3Yaaqobiyoo Yooseefich ishichiye: “Beshe Hakkechi Nuggishoo Kanaanee showooch beeti, Luuzaa taach bekkehe; taanoo aroochaa diiriye; 4taach ishichiye: ‘Bushiishoon neech meechemmo taane; ne yaroonoo woddiyemmo taane; meeti aagetoo tunemmo neene; hini showoon neyee gubbi ne shiijjereenaꞌoyich bulli yemeenee boonoshi hajjoon tuniiree immemmo taane’ iye.

5“Hini showooch ta womoyee shiichaꞌa, Gibitsee showooch beechaa ne shiyeti, ne gutte bushiisheenaꞌo illa ta bushiisheenaꞌon tuniitaa haddeyemminaꞌone. Roobeelinaa Simoonina ta bushiisheenaꞌo boonoshi tunetoommon Efreeminaa Minaasina ta bushiisheenaꞌo tunemminaꞌone. 6Boonoshiyee gubb ne shiyemmi bushiisheenaꞌo neechinaꞌo tunebeete; boonoshiyoo iristee qoodeyoochaa boonoshi maneenaꞌochi shigoona haddeyemminaꞌone. 7Mesopotaamee wottee Efiraata shagg ta beddaahaa, ne indee Raaheeli Kanaanee showoochaa bi qitaa, oogeton ayinaa muushenoye. Efiraata daammiibeeti gommi gashooch duukkoye” iye. Efiraati and Beetilehemi getteebeeti katemoone.

8Israꞌeeliyoo Yooseefi bushiishoon bi beeggiyooba, “Eboshi koni konine?” ii echehe.

9Yooseefiyoo bi nihoyich “Eboshi Yeeri taach immiti ta bushiishoone” ii wochiye.

Israꞌeeliyoo “Ta waan ne giddiitaa, boonoshin diiribona” iye.

10Ebiyooba Israꞌeeli geenittinoochee tiyitona bi aafo yaametoyich, manjiiꞌi ciinon hakkaanoone. Yooseefi bi bushiishoon bi nihoo aafooch katichiye. Biyoo shummii tiqqehe.

11Israꞌeeliyoo Yooseefich “ ‘Ne aafoon wochinnoon beeggemmo taane’ iyaa gabaano taane; tunebaani Yeeri ne bushiishoon wotta ta beeggemmoyich tuniitone” iye.

12Yooseefiyoo bi bushiishoon bi nihoo aafoochee badd wochiichii, baroona showooch guufeꞌi goyinnehe. 13Aroochee Yooseefi gutte bi bushiishoon yechiꞌi, Efreemin bi waanaa qanne badd, Israꞌeel waanaa yooche badd, Minaasin bi waanaa yooche badd, Israꞌeel waanaa qanne badd tuniiꞌi katichiye. 14Tunebaani Israꞌeeli bi kisheenaꞌon shaaddiiꞌi, bi qanne kishoon guuchoo Efreemi shimbooch kotiihe; bi yooche kishoon qanne kishee toommona beshiiꞌi, gutenee bushoo tuneti Minaasichi shimbooch kotiihe.

15Aroyee gubb Yaaqobi Yooseefin ishichii diiriye:

“Ta nihinihoo Abrahaminaa ta nihoo Yisaaqina

boonoshi shaaddo bullin bi aafooch boonoshi tuniiti Nuggishoo,

hanaach beddaahaa, ta yemeeno bullin

taan quyeti Nuggishoo,

16gonde mooyo bulliichee taan wodiiti Maraakoo,

aroo hini bushiishoon diiribe.

Boonoshiyoo ta shigoona,

ta nihinihoo Abrahaminaa ta nihoo Yisaaqinochi shigoona ceekkebeete;

showee toommooch shiijje shiijjere meeteete” iye.

17Yooseefiyoo bi nihoo qanne bi kishoon Efreemi shimbooch bi kotiitoyich emiraanoone; Efreemi shimboochee tiijjiꞌi Minaasichi shimbooch kotiyoyich bi nihoo kishoon yechiꞌi, 18“Taabbo, ebi toonoone; gutenee bushoo hinine. Ebich ne qanne kishoon bi shimbooch kotiibe” iye.

19Tunebaani Yaaqobi “Ariibeeto taane. Ta bushoocho, ariibeeto taane. Aroo wotta aagetoon tunemmone; oogoo tunemmone. Tunetaa, guuche bi manoo biyee besho tunemmone; bi shiijjereenaꞌo meeti aageteenaꞌon tunemminaꞌone” iꞌi qajjiye. 20Arooba boonoshin ishichii diiriye:

“Ittoshi shigoona Israꞌeeleenaꞌo

‘Yeeri ittoshin Efreeminaa Minaasinoommon tuniibe’

getiree diiremminaꞌone” iye.

Ebiyoommona Efreemin Minaasiyee shiichiihe.

21Ebiyee gubb, Israꞌeeli Yooseefich ishichiye: “Ta qitemmi aabo shaggitone; tunebaani Yeeri ittoshina tookki tunemmone; ittoshi qaabbechinaꞌo showooch ittoshin wochi daammemmone. 22Wotta ta goraadoona, ta maꞌoonoo Amooreenaꞌo kishoochee ta deqqeti, qeemi showoon, Shekeemin, ne maneenaꞌoyich tuneyaanoon, neech baach immeto taane” iye.

Currently Selected:

Halloo 48: KBRC

Highlight

Copy