Halloo 47
47
1Yooseefiyoo hammii Faroonich ishichii gettiye: “Ta nihoonaa ta maneenaꞌona boonoshi bageenaꞌonaa emmisheenaꞌonon, boonoshi miiminaꞌonoo, ebiyoommon wotta boonoshich beeto bullin yechiꞌi, Kanaanee showoochee waatinaꞌone. Boonoshiyoo and Gooshen shaggitinaꞌone” iye. 2Aroochee bi maneenaꞌo daggoochee uucheenaꞌon kaaccii deebii, Farooni aafooch neechiye.
3Farooniyoo Yooseefichi maneenaꞌon “Ittoshi shuunoo amoone?” ii echehe.
Boonoshiyoo Faroonich, “No ne guuno, no qaabbechinaꞌochoommon gijjee shiijjecho noone” iyeete. 4Wotta ishichiyeete: “Kanaanee showooch giidechi shaacoo giyaa, no bageenaꞌonaa no emmisheenaꞌonoyich no maanjemmi mooyon no muccetoyich, giisheche aaboon hini showooch koteya waato noone. Andoo ne guuno no ‘Gooshen no kotemmoyich daaggibe’ iyaa qollaabeeto noone” iyeete.
5Farooniyoo Yooseefich ishichiye: “Ne nihoonaa ne maneenaꞌona ne waan waatinaꞌone. 6Gibitsee showoo bulli ne kishoochiye. Bulliyee beshiti gaawe showoon ciiniree, ne nihoonaa ne maneenaꞌonon arooch kotiibe. Gooshen beebeete. Boonoshi daggoochee bariti ariyechinaꞌo boonoshi tunoon ne arii beetinaꞌo beegaata, areenaꞌon ta miinji qiddeenaꞌo toommooch ukkiriibe” iye.
7Aroyee gubb Yooseefi bi nihoo Yaaqobin giijjiꞌi, Farooni aafooch neechiye. Yaaqobiyoo Faroonin diggiiꞌi diiriye.
8Farooniyoo Yaaqobin, “Ambiche nati asho neene?” iye.
9Yaaqobiyoo Faroonich wochiꞌi, “Showee toommooch iibbittinoona ta beshiiti nato, balli shaashe natone. Ebiyoo ta qaabbechinaꞌo iibbittinoona beebee echeti yemeenoona tookkii bi tacheegaata, taacho qaminone; wotta iritoo woddeti yemeenoone” iye. 10Aroochee Yaaqobi Faroonin diirii diggiiꞌi kechiye.
11Yooseefiyoo bi nihoonaa bi maneenaꞌona Gibitsee showooch boonoshi kotemmoyich tuniihe. Farooni gettitoommi gommona, bulliyee beshiti gaawe xaaꞌoo tuneti Ramisesin boonoshi hajjoo tuniiꞌi immiye. 12Yooseefiyoo bi nihoyich, bi maneenaꞌonaa bi nihoo kechi asheenaꞌo bullinoyich, boonoshi bushiishoochi haddoona boonoshi maayemmi maayo ichemmoyich tuniihe.
Shaacoo Kupphee Hamo
13Showoo bulliich maayo aalletoyich, shaacoo kupphee hammiye. Ebich Gibitsee asheenaꞌonaa Kanaanee asheenaꞌona shaaceheete. 14Yooseefiyoo maayoon kemona Gibitsee showoonaa Kanaanee showoonooch beeti birewoo bullin kiciꞌi, Faroonichi taatee kexooch giijjiye. 15Gibitsee showoonaa Kanaanee showoonooch beeti birewoo ciirehooba, Gibitsee asheenaꞌo bulli Yooseef waan waaꞌi ishichiyeete: “No kishoochee birewoo ciiretone; no maayemmi maayoon nooch imbe. Ne ciini beetaa, amoyichiye shaacoona no qitemmo?” iyeete.
16Yooseefiyoo “Ittoshi birewoo ciiregaata, ittoshi gijjeenaꞌon taach deebote. Gijjeenaꞌochi shaddoon maayoon ittoshich immemmo taane” iye. 17Ebich boonoshi gijjeenaꞌon Yooseef waan deebiyeete. Biyoo boonoshi haresheenaꞌo, bageenaꞌo, emmisheenaꞌo, miiminaꞌonaa kureenaꞌonochi shaddee maayoon boonoshich immiye. Boonoshi gijjeenaꞌo bullichi shaddoon boonoshi daneti maayo aroobee nati shaacoochee boonoshin kichiye.
18Ebi are nato beshetoyee gubb, bi hilleexi natooba asheenaꞌo waaꞌi, Yooseefich ishichiyeete: “Illa no doono neech no aachemmi mooyo amolla aalloone. No birewoo ciiretone; no gijjeenaꞌonoo immeto noone. Illa and no doono neech no immemmo, no showoonaa no qelloonoyee besh, amolla nooch aalloone. 19Ne ciini beetaa, amoyichiye shaacoona no qitemmo? No showoo amoyichiye ashaalli shokko bi echemmo? Noonnaa no showoonon deꞌiichi, no maayemmi maayoon nooch imbe. No, Faroonichi guunon tunebone; no showoo bi hajjoon tunebe. Qitaanoon kashoona no beeyemmoyich, no showoo ashaalli xafoon bi echeyaachemmoyich, no shookkemmi maayi yaroon nooch imbe” iyeete.
20Ebich Yooseefi Gibitsee showoo bullin Faroonich kemehe. Giidechi shaacoo giyitoyich, Gibitsee asheenaꞌo bulli ikkolla echeyaanoon, boonoshi showoon kemmiyeete. Showoo bulliyoo Farooni hajjoo tunehe. 21Yooseefiyoo Gibitsee showoo bulliich beeti asheenaꞌo bullin Faroonichi guuninaꞌo tuniihe. 22Tunetaa Yooseefi qeesheenaꞌo showoon kemeyaanoone. Ebiyoo, Faroon waanee kuxeyaanoon boonoshich icheebeeti maayi qoodoo bi beetoyichiye. Ebich boonoshi showoon kemaaneenaꞌone.
23Arooba Yooseefi asheenaꞌoyich ishichiye: “Ittoshinaa ittoshi showoonon hanaach Faroonich kemeto taane. Ebi yaroon daamiree, ittoshi showooch shoohote. 24Tunebaani maayi qecci goorooch, uuchoochee ikke beeroon Faroonich giijjemmo ittoshine. Awudde beeroon wotta ittoshi shookkemmi yaroo, ebiyoommon ittoshich, ittoshi kechi asheenaꞌonaa ittoshi bushiishoonoyich maayo tuniyemmo ittoshine” iye.
25Boonoshiyoo “No doonocho, no kashoon wodiito neene; deꞌittinoon nooch bekkiito neene. Illa Faroonich guunon tunemmo noone” iyeete.
26Ebich Yooseefi “Shaggiti maayoochee uuchoochee ikke beeroo Faroonich gibe” immi sheeroon Gibitsee showooch neechiye. Ebi sheeroo hanaach beddaahaa shuunee beetone. Ebiyooba Faroonichi kishooch giyaani showoo qeesheenaꞌo showoo baachiye.
Ciiroochaa Yaaqobi Echeti Mooyo
27Israꞌeeleenaꞌo Gibitsee showooch, Gooshen koteꞌi, oogichii gaanneheete; shiijjee shiijjeree meettiyeete.
28Yaaqobiyoo Gibits aaraa shabaatte naton kotehe; biyoo balli aabbaa shabaatte nati ashoon tunehe. 29Israꞌeeliyoo bi qitemmi aabo katinaa, bi bushoo Yooseefin ceeggii deebiꞌi ishichiye: “Taan shunnaabeeto ne tunegaata, ne kishoon ta doshee dechiich gediree, deꞌittinoonaa iberittinoonon taach ne bekkiyemmoyich wogebe. Gibitsee showooch taan duukkaahine. 30Ta qaabbechinaꞌo waan ta xaꞌeehooba, Gibitsee kichi daamiree, ta qaabbechinaꞌo duukketi maashooch taan duuhe” iye.#Hal. 49:29-32; 50:6
Yooseefiyoo “Deꞌa, ne gettetoommon tuniyemmo taane” iye.
31Yaaqobiyoo “Eke wogebe” iye. Yooseefiyoo wogehe. Israꞌeeliyoo bi qeyiibeeti qeenoochaa Yeerich goyinnehe.
Currently Selected:
Halloo 47: KBRC
Highlight
Share
Copy
Want to have your highlights saved across all your devices? Sign up or sign in
SIM International, 2020.
